#ثمن_الخطايا
#الحلقة_31
محمد بحت في اعيوني وفي كل مكان من وجهي ورفع ايديه ومسك وجهي بين ايديه وقرب همس : أنا نبيك أنتي يابسمة هذا كله ومازلتي ماعرفتي شن نبي
أنا توترت ونزلت ايديه من على وجهي : أنت دوختني امعاك مرة اتقولي اصدقاء ومرة اتسيبني ومرة تحكي امعايا معاش عرفت شي أنت شنو بالضبط....كل م ...
محمد قطع كلامي ومسك وجهي بين ايديه وحط وجه على وجهي وغمض اعيونه : أنا انحبك ..أنحبك يا بسمة ❤❤
مش عارفة شن صارلي لكن جسمي كله يرجف وحسيت قلبي يبي يطلع من مكانه ..اااااه وأخيرا ياحمادي قلتها يانعليا يا قلبي كيف تبي اتحمل هذا كله ..الكلمة هذه اول مرة نسمعها ومن من ؟؟ من أكثر أنسان تمنيت نسمعها منه أكثر انسان تعبت عشان نوصل للحظة هذه امعاه
محمد وخر وبحت في وجهي : كنك سكتي
ابتسمت منحرجة وطبست ..ومحمد رفع وجهي : أحكي كنك انحرجتي
أنا ضحكت وحطيت ايديا على وجهي وبرمت نبي نمشي : خلاص نبي نرقى يا محمد
لحقني ومسكني لفني شوره : تعالي مازلت ما كملت كلامي
وقفت نرجف وهو قرب مني ومسك ايديا وضغط عليهن : بسمة قولي هيا
أنا : شن انقول
محمد : امبدري اشوي كنتي امصدعتني ..نحن شنو وأنت كنك ومش عارف شنو ..توا خلاص مش عارفة شن اتقولي
ضحكت وطبست : محمد مش قادرة انقول شي توا
محمد : تي شن صارلك أنتي كنك ترجفي
سحبت ايديا منه : نبي نرقى خايفة خليني نمشي
مسك يدي : تعالي قبل
خذاني تحت الشجرة وقف ومسك ايديا : بسمة سمعتي الكلمة اللي قلتها لك هنا
أنا : سمعتها
طبس علياويحكي بصوت واطي : الكلمة هذه ماقلتهاش وخلاص ..الكلمة هذه طلعت ابروحها وغصبا عني ..معاش قدرت نمسك روحي أكثر من هك ...لكن نبيك تعرفي انها مش كلمة نقدر انقولها لاي وحدة ..هذه لك أنتي وبس فاهمة عليا
أنا خلاص في عقلي ارحمني وخليني نمشي قريب يغمى عليا معاش اتزيد عليا 🥺
محمد ايبحت فيا وأنا هزيت رأسي : اها
محمد رفع رأسه وبحت في الشجرة : وباهي اللي اعترفتلك بيها هنا هذا أحسن مكان عندي
أنا رفعت رأسي وبحتت : عليش ..شن المعنى يعني
محمد : لان في المكان هذا كان اول مرة انشوفك فيها
أنا بحتت فيه مستغربة : امتى
عزق رأسه لاوراء يضحك : والله مانك متذكرة
أنا : شن نذكر ..عمري ما شفتك هنا من قبل
