#ثمن_الخطايا
#الحلقة_14
بشرى خايفة : أشرف نبي انقولك حاجة 🥺
أشرف قمعز وبحت في وجهها : كنك حبيبي شن في
بشرى زمطت ريقها : بس ماتزعلش عشان خاطري 😫
أشرف : مادام حاجة اتزعل اجليها يوم اخرى مش اليوم
بشرى : مانقدرش أنجلها ضروري تعرفها توا😣
أشرف ركز امعاها أكثر : شن في خوفتيني راه
بشرى طبست : أشرف .أنا ..أنا مريضة
أشرف أنصدم : مريييييضة ..كيف يعني ؟؟؟؟؟
بشرى : مافيهاش كيف أنا مريضة 😥
أشرف : مريضة ..شن اتحسي ..مريضة من شنوا ؟؟؟!!
بشرى : أشرف أفهمني ..أنا مش مريضة مرض ..قصدي أنا توا لقيت ...أشرف مريضة خلاص أفهمها 😣
أشرف غمض اعيونه وعض على فمه ..وخبط يده على وجهه 🤦♂️
بشرى ضحكت على ردة فعله : 😂
أشرف وجهه تغير : عليش تضحكي 😒 مافيش شي ايضحك😑
بشرى ماسكة ضحكتها : لا والله خلاص...لكن أنت ماتزعلش مني 🤭
أشرف : كم يوم😒
بشرى انحرجت منه : خمسة
أشرف تنهد وقرب منها ضمها : الله غالب نصبروا ...لكن رد بالك اتزعليني في الخمس الايام الجايات اللي فيا سادني 😒
بشرى : نجك ليا 😂...وأنا نقدر انزعلك
أشرف باعدها عنه ورفع وجهها بيده : أهم حاجة عندي أنك جنبي وأمعايا ...والكلام لاخر كله ملحوق عليه
بشرى ضماته وحطت وجهها على كتفه : ربي ايخليك ليا ..ولايحرمني منك
أشرف ضمها وبأسها على رأسها : ولايحرمني منك
*************************
ثاني يوم كان في فرش يبي غسل لكن بصراحة معاش في جهد عندنا ..ماما قالت اندزوه للمغسلة ...لمينا الفرش وحطينه في سيارة بابا وخذاه باسم للمغسلة ..وبدينا في الحوش تسييق وتلميع وانردوا في كل حاجة مكانها ..كانت امعانا خالتي حليمة وسلوى حتى هيا اتساعد فينا
أنا خذيت دوسات الحوش كله وقعدت نغسل فيهم وأمعايا بنات بشير ..دايرات اروحن ايساعدن فيا👧👶 😂
ماما طيبت غداء ..وأنا بعد كملت خشيت امعا خالتي حليمة ودرنا حملة على الكوجينة ..وبدور وسلوى ايلمن في الحوش
مع جيت باسم
باسم : بدور ..يا بدور
بدور طالعة من جوا : نعم شن تبي
باسم واقف على باب الكوجينة : عطيني لابشارة
بدور مستغربة : عليش ...اها النتيجة اطلعت😫
باسم : مبروك النجاح ..الترتيب الثاني
