#ثمن_الخطايا
#الحلقة_29
لعند يوم العشية كنت نشرب في قهوة أنا وبدور وسلوى ..رن فوني القيته محمد قعدت اشوي وبعدها صبيت رنيت عليه
محمد : الو
أنا : الو
محمد : شن اخبارك
أنا خاطري انقوله امرايفة عليك ونبي انشوفك : تمام شخبارك
محمد : تمام ..اسمعي
أنا : نعم
محمد : نبي انشوفك توا
أنا : وين 😳
محمد : أنا قاعد في السيارة برا في الشارع
أنا قلبي طاح : اي شارع 😣
محمد : في شارعكم ..اي شارع يعني 😑
أنا : اهييييي 😳😨
محمد : الو وينك؟؟؟!!
أنا : قصدك قاعد برا أنت
محمد : اها ..اطلعي نبي انشوفك
أنا : استنى اشوي ..مش عارفة الوضع شنو بصراحة
محمد : كان الجو فاضي تمام ..كان في حد قاعد بلاش مانبيش انسببلك مشكلة
أنا : تمام خليني انشوف جو الحوش توا انرن عليك
محمد : اوكيه ..تمام
صكرت المكالمة ومشيت برمت في الحوش كله مافيش حد بدور وسلوى يحضرن في مسلسل ..مشيت برمت على روحي كنت لابسة استريتش اسود وتيشرت اسود في ابيض طويل وعليه ورد وردي و حطيت وشاح وبخيت عطر ومشيت لجنان رنيت عليه
محمد : ايوا شن صار
أنا : الحوش تمام بس مش عارفة الجو برا
محمد : الشارع فاضي تقريبا مافيش حد الا اعيال جيرانكم اصغار يلعبوا برا
أنا : مش عارفة خايفة بصراحة 😣
محمد : ماتخافيش اطلعي انشوفك على السريع واتخشي
أنا : اووووفه ياربي
محمد : كان ماتبيش عادي نمشي مش ضروري
أنا في عقلي يانعليا امرايفة عليك وميتة على شوفتك ..لكن قهرني كيف مش ضروري 😡
أنا : خلاص عدي كان مش ضروري 😒
محمد : تؤ تؤ ...تي كنك زعلتي أنتي
أنا : مازعلتش لكن أنت اتقولي فجاة نبي انشوفك وأنا قتلك خايفة بس 😒
محمد : باهي وانا شن قلت كان خايفة وماتبيش تطلعي خلاص مش ضروري تطلعي
أنا : عليش جاي لعند هنا مادام مش ضروري 😡
محمد : باهي اسف مش قصدي ...تبي تطلعي والا لا 😑
أنا تعقدت : لا مانبيش نطلع 😒
