#ثمن_الخطايا
#الحلقة_10
كنا امقمعزين في الصالة سمعنا صوت سيارة وقفت على الحوش
نزل محمد من سيارته : ارجن اشوي انتأكد من الحوش قبل تنزل أمي وحني
ماجدة : باهي تمام
حول محمد نظارته وجاء طق على الباب ....لابست أنا وشاح ومشيت نبي نفتح ..وصلت لعند الباب دوبي فتحت ونسمع بدر يعيط ورايا 😨
بدر : وين ماشية 😡
أنا التفتت فيه : الباب ايدق
بدر : خشي جوا بسرعة 😡
خشيت وبدر طلع لاقى محمد امصبي عند السيارة
بدر : خير يا شاب تفضل
محمد جاء وسلم عليه : السلام عليكم ..شن اخبارك
بدر : وعليكم السلام.....تمام...تفضل يا خوي
محمد : ايزيد فضلك صحيت...هذا حوش عمر خليفة ياخيي
بدر : وصلت..تفضلوا
محمد بحت في السيارة : مشكور يا طيب ..امعايا هل الحوش
بدر فتح الباب : مرحبا بيهم ..تفضلوا تفضلوا
عدا بدر بعيد عن الباب وجاء محمد صبا امعاه...وانزلن الصبايا وخشن جوا
محمد هدرز مع بدر اشوي وطلع ..طبعا نحن نسكنوا في منطقة قريبة من المدينة ..ومحمد مايعرفش حد ..عدا وكسد في كافي
أنا كنت مازلت واقفة في الممر ..خشن الصبايا وجيت سلمت عليهن ..وكل وحدة كانت شايلة بوكس مغلف وماجدة شايلة بوكس وباقة ورد ..كانت في طاولة في الصالة نزلن عليهن البوكسات ..وخش بدر شايل صندوقين عصير عطهن له محمد حطهن في الكوجينة وطلع من الحوش...ونحن خشينا لدار المقعد كانت ماما وخالتي امقمعزت وبدور امصبية ..صبن ماما وخالتي وسلمن عليهن ..سلمنا وقمعزنا وبدأن ايتعرفن على بعضهن ..أنا وبدور طلعنا وقعدنا مع بشرى في الكوجينة
صاح نحن حوشنا طبعا مش نفس حوش هل أشرف ..فيلا كبيرة على دوريين وجنان كبير واثاث فخم ..لكن الحمدالله ماما كانت في الصيف دايرة صيانة كاملة وزواق والاثاث كان ماشالله..ذوقي أنا وبشرى 😊
ماجدة تحكي مع ماما : كيف حالك ياعمتي إن شالله صحتك اكويسة
ماما : الحمدالله بخير ..الله يسلمك
ماجدة : هذه أمي ..وأجديدة ..وهذه انجيوة عمتي اخت باتي ..وهذه عمتي مبروكة جارتنا لكن نحن نعتبروا فيها أخت لأمي 😊
ماما : بالجودة بيكن ..شرفتنا ☺️
انجيوة : بيك أجود ..إن شالله معرفة خير .ونبقوا عائلة وحدة
ماما ابتسمت وأنحرجت
خالتي : إن شالله
ماما : هذه أختي حليمة وهذه سلوى مرات ولدي بشير
