#ثمن_الخطايا
#الحلقة_3
بعد طلعت من الدار روان اطبق في الدبش لاقت تيشرت باسم من غير ماتفطن لروحها رفعاته اتشم فيه
في اللحظة هذه باسم جاء حول جاكته وحطها في المربوعة خش لحمام المربوعة غسل وتوضى للمغرب ..وخش جوا حول التيشرت امتاعه يبي ايغيره خش للدار وانصدم كان ماسك التيشرت في يده ولابس سروال بس لاقى روان قدامه😳😳
و روان انفجعت من الجهيتين اولا باسم خش عليها وهي ماسكة ادبشه وتشم فيه ..وثانيا لانه خش عليها هك في دارهم
روان وجهها تم الوان وحطت التيشرت وراء ظهرها..باسم انحرج وطبس ولانه ارتبك اول ماخش عليها مركزش على الدبش اللي في يدها
باسم منحرج ويبي يطلع : خي... خير
روان صبت : اااااهلين...تعالى خش نبي نمشي أنا
خشيت أنا عليهم وشفت روان كيف منحرجة: خير باسم امتى جيت
باسم فتح دولابه : توا ..ونبي نطلع
أنا : كنا انطبقوا في الدبش أنا وروان ...تعالي روني خلاص
روان : هيا نبي انروح اصلا
طلعنا أنا وروان ومشيت امعاها لعند الباب قبل نبيها تقعد اتعشاء امعانا عشان نحكيلها على مرضت ماما كنت نبي حد انفضفله ..لكن روان كانت مستعجلة وقالتلي لليل توا انتلاقوا بكرا
عدت روان وأنا خشيت مع بدور في دارنا نكتبوا في واجباتنا وماما وخالتي حليمة وبشرى ايهدرزنا في الكوجينة وبشرى اطيب في عشاء
**************
محمد في العشية بعد جيت صلاح طلع هو وياه لكن كل واحد في سيارته ..صلاح كان يبي هدية للخطيبته ..مشوا للمحل محمد امتاع عطور وهدايا ..صلاح اختار مجموعة عطور مع بعضهم في علبة ومحمد غلفها له ..ومشى صلاح خذا علبة شكلاطة وباقة ورد وعدا لخطيبته
محمد جاءه عادل في المحل وكسدوا مع بعضهم...لعند وقت العشاء وبعدها كل واحد روح للحوشهم
محمد خش لاقهم ايراجوا فيه على العشاء ...غسل وقعد تعشاء امعاهم...بعد العشاء محمد يبي يرفع السفرة لكن بوه قاله خلي عباس توا يرفعها...محمد فهم أن بوه يبي يحكي امعاه..
طبعا نبي نحكيلكن عن علاقة محمد مع بوه علاقة مش عادية ..أب محمد علي كان عنده محمد بالدنيا مايحملش فيه حاجة ..مع انه عنده اشرف هو الكبير وعباس هواصغر واحد فيهم لكن غلا محمد غير ...خاطي أنهم يفهموا بعضهم بالنظرة...ومحمد كان ديما ايقول لبوه ياحاج
علي أب محمد : شن صار في صلاح ..امتى ماشي
محمد : الاسبوع الجاي قال
علي : وعمتك خديجة شن دايرة
محمد رفع حواجبه وتنهد : والله عمتي خديجة مسكينة تبكي ومش راضية على مشيته بكل
