#ثمن_الخطايا
#الحلقة_2
أنا توضيت وصليت وخشيت الكوجينة نشرب في امية سمعت صوت سيارة بابا ...وبعدها سمعته خش وصكر الباب قعدت نستنى فيه ايخش لكن طول ..وسمعته يحكي مع بشير وباسم في المربوعة
مشيت شورهم ونبي انخش لكن سمعت بابا يحكي وأنا جمدت مكاني حسيت قلبي وقف مش قادرة نصدق الكلام اللي نسمع فيه وياريتني ماسمعت.....😰💔😭
الكلام كان اكبر من قدرتي اني نستوعبه...قلبي ايدق بسرعة وحسيت بغصة في حلقي ..قعدت نرجف واعيوني امتلين ادموع...نبي نبرم ونطلع خبطت في بدر خاش
بدر : تي شوفي قدامك عمى إن شالله
لكن بدر لما شاف حالتي بحت فيا زين وقرب مني وصبا على باب المربوعة
بدر : هذه كنها ..عليش تبكي
أنا قعدت على الساس وحطيت ايدي على فمي ...بابا وباسم وبشير سمعونا واطلعوا
باسم : كنك مع اختك
بدر : ماحد شورها ...القيتها اتبكا هنا
باسم بحت فيا وكان خايف انكون سمعتهم : كنك !!!!
أنا معاش قدرت نمسك بكيتي قعدت نبكي بصوت وباسم حط ايده على فمي وسحبني شوره وضمني زين
باسم : اشسششش اسكتي اسكتي ...شن جابك هنا أنتي
أنا نبكي 😭ونمسك في ايدين باسم نبي انشيلهم من على فمي
باسم : توا انسيبك لكن صكري فمك ..مانبوش أمي تسمع شي توا ..اسكتي
أنا غمضت اعيوني ومسحتهم شفت بابا وجهه اسود ويبحت فينا وبشير امطبس رأسه يحرك في يده على شعره
رفعت اعيوني في باسم وهزتي رأسي بمعنى توا نسكت ...باسم شال ايده من على فمي وأنا مشيت لبابا وضميته نبكي من غير صوت ..مع خشت بشرى وفي جرتها بدور قعدو ايبحتوا فينا ومعاهم بدر مش فاهمين شي
بشرى حطت ايدها على قلبها : يانعليا كنكم ..شن في
باسم مسك يدها وخششها للمربوعة هي وبدور وبدر وصكر الباب
بشرى على طول عرفت ان في حاجة مش تمام...بدر كان معصب زي اغلب وقته
بدر : كنك صكرت الباب ...شن في فهمونا ازح😤
بابا حط ايده على رأسي وباعدني عنه : خلاص اسكتي ..تعالوا قمعزوا لازم تعرفوا كل شي اصلا 😥
قمعزنا وأنا طبست و مسكت رأسي بين ايديا وكل مانذكر شن سمعت انغمض اعيوني وادموعي ينزلوا غصبا عني😭
بشرى كانت في نظرة خوف في اعيونها : شن في يا بابا احكوا راه اعصابي تلفن حرام عليكم
بابا بحت في باسم وخذا نفس وزمط ريقه بالغصب : كنت عند الدكتور وخذيت امعايا الصور امتاع امكم
