#ثمن_الخطايا
#الحلقة_42
أنا خشيت وفي جرتي اشرف : خييير شن اخباركم ☺️
بشرى : اهلين ...بسمة ماتغيريش دبشك انتغدوا ونبوا نمشوا
أنا بحتت في أشرف : وين
بشرى صبت صلوحي : نبوا نمشوا لاهلي... كلمني باسم بدري اشويا وقال بدر جابوه أصحابه امبارح للحوش مضروب طريحة شكله متعارك مع وحدين
أنا بحتت في بشرى : مضروب 😳
بشرى صبت : اها مضروب ..نبي نمشي انحط الغداء ونمشوا على طول
أشرف : مع من متعارك وعليش ؟؟
بشرى : مش عارفة ..الله اعلم
بشرى مشت للمطبخ وأنا خشيت للدار ورنيت على محمد
محمد : نعم
أنا : حمادي شن داير أنتا
محمد : كني مادرت شي
أنا : نبي نسألك سوال ورد عليا بصراحة
محمد : شنو
أنا : أنت اللي ضربت بدر 🥺
محمد : اي بدر
أنا : حمادي فكني من الطروح بدر خويا
محمد : توا يعني امكلمتني تسألي من ضرب خوك ..عليش ماتكلميه هو شن دخلني أنا
أنا : يعني مش أنت اللي ضربته
محمد : بسمة عندي شغل ومش فاضي ...كلمي خوك شوفي من ضربه
أنا : تمام ..أنا بعد اشوي ماشية لاهلي وإن شالله يطلع مش أنت بس 😒
محمد : اوكيه
صكر محمد وأنا لحقت بشرى للمطبخ وكنت انفكر أكيد محمد اللي ضربه ..يانعليا كان طلع محمد هو اللي ضاربه هكي حيسبب مشكلة أكبر ..اكيد بدر شافه وعرفه
المهم بعد الغداء مشينا لاهلي ولما وصلنا القينا باسم قدام الحوش مع اعيال عمي ..على اساس يبوا يعرفوا من ضرب بدر وكذا ..سلمنا وخشينا القينا بدر راقد في المربوعة بس معاه اصحابه خشينا للحوش جوا قاعدة خالتي حليمة وصبايا اعمامي اثنين سلمنا وقعدنا نحكوا على القصة ومافيش حد فاهم اللي صار ..بعد المغرب روح بابا من الجامع واصحاب بدر روحوا خشينا عليه انسلموا عليه وانشوفوه ...
أنا اول ما شفته وجعني شكله مع أن هو ديما يضرب فيا ..لكن امحصل طريحة باهية وجه متورم ويده ملفوفة كلها برباط ورافعها على رقبته ...قمعزنا وقعد يحكيلنا على القصة ..طبعا قال مجموعة شباب وقفوني في الليل وأنا طالع من الاستراحة وكثروا عليا ومش عارفة شنوا ولانهم واجد ماقدرتش عليهم ..أنا طبعا حسيت القصة كلها تأليف وأخراج بدر وقاعد يجري بينا .. وكنت متأكدة أن محمد هو اللي ضربه وخاصة بعد كلمته تأكدت أن هو اللي ضاربه لان محمد ماسألش ولا عبر الموضوع
