#ثمن_الخطايا
#الحلقة_13
أشرف حول جاكته وحط نقاله على الطاولة وطلع ..بشرى خلته طلع ومشت تجري بحتت وجهها على المرايا خافت ايكون مكياجها ملبز ..لكن كان تمام ..وبعدها خشت للحمام غسلت وغيرت فستانها ولابست روب قصير وطلقت شعرها ولابست ديشمبر الروب ..وطلعت برمت في الدار تفرجت عليها..وبعدها قمعزت على طرف السرير ..قعدت تستنى في أشرف ..ونقال اشرف ايرن ..في البداية مابحتتش فيه ..لكن لما رن مرة أخرى صبت ومشت شالته من على الطاولة وبحتت في الشاشة
لمياء يتصل بك 😰😤
بشرى لما شافت الاسم حست كأن واحد كب عليها امية مصقعة ..وبعدها يدها قعدت ترجف وعصبت وانقهرت .وطبعا على طول دموعها نزلوا ...فكرت أنها ترد عليها في البداية لكن حست ان الموقف بايخ اترد على نقال أشرف وهو مش موجود وبصراحة أكثر هي خافت انها اترد..كانت مترددة
لمياء بعد مكالمتين معاش رنت اخرى...بشرى قعدت حايسة في الدار لعند جاء أشرف ..قمعزت على الكنبة والكراسي اللي في الجناح ..نظام الغرفة كيف الجناح الصغير دار نوم وحمام وقعدة فيها كنابات و تلفزيون وبوفيه صغير ..أشرف اول ماجاء كان في يده شنطة صغيرة كانت مازالت في السيارة ومفاتيح السيارة وبطاقته واوارق كان ينهي بيهم اجراءت الحجز في الفندق ..حطهم على البوفيه ..وجاء قرب من بشرى بحت فيها لاقها تبكي
أشرف ابتسم وقرب منهاقمعز جنبها و مسك يدها : مازلتي تبكي ..شن قتلك أنا .خلاص ياعمري
لكن بشرى فنصت فيه وسحبت يدها منه وصبت ..وهو استغرب ردة فعلها وحس ان في حاجة ..صبا وراها ومسك ذراعها وبرمها شوره
أشرف : كنك شن صار ..أنتي خايفة مني والا زعلانة والا شنو ؟؟؟؟
بشرى فكت روحها منه ومشت رفعت النقال : شوف من كان ايكلم فيك وأنت لوطى 😡
أشرف قرب منها وخذا فونه وافتحه ..لاقى مكالمات من لمياء ..غمض اعيونه وتنهد : أنتي تبكي عشان المكالمات هذه
بشرى : شن تبي منك عليش اتكلم فيك توا 😭
أشرف حط ايديه على اكتوفها : مافيش داعي تبكي وتزعلي روحك ..مافي شي ..والله مافي حاجة
بشرى بعصبية : باهي شن تبي منك ..عليش تتصل بيك يوم فرحنا 😭
اشرف : شن عرفني ..ليش مارديتي عليها
بشرى : هي متصلة بيك أنت عليش انرد عليها 😭
أشرف قرب منها : خلاص اسكتي ماتبكيش عشان خاطري والله موضوع مايستاهل تبكي عليه
بشرى تباعدت عنه : أشرف نبي نسألك ..وجاوبني بدون كذب ..قول الحق
أشرف يبي يقرب منها وهي توخر عنه : اسألي اللي تبيه ..كنك خايفة مني أنتي ؟؟!!
بشرى مسحت وجهها : هذه اول مرة اترن عليك والا في مكالمات من قبل😥
أشرف طبس و وجهه تغير
