#ثمن_الخطايا
#الحلقة_17
طلعنا من المدرسة وأنا من الفرحة اتقول انطير مش نمشي ..ركبنا في السيارة ..صاح وجعتني بثينة ..لكن كنت فرحانة بكل ..كان خاطري انطير للحوش ونوصل بسرعة ..طلعنا من المدرسة وباسم في الطريق تكا على محل حلواني وخذا منه حلويات وقاتو عشان النجاح ..بثينة كانت طول الطريق تبكي ..وانا و روان انحاولوا انخففوا عليها ..وانها مادة وحدة ساهلة توا اتعوضها في الدور الثاني وباسم كان ايبحت فيها وجعته لانها تبكي ..لكن هي كانت منحرجة منا ..وفي نفس الوقت انقهرت لان روان ناجحة
المهم جينا مع رأس الشارع نزلنا بثينة وخشت للحوش ..ونحن ماشيين بالسيارة للحوش انشوف في زحمة عند حوشنا ..معاش عرفت شن صاير 😰
قرب باسم من الحوش وأنا انشوف في زحمة رجالة واعيال جيرانا امصبيين مع بابا برا وبدر ...بابا امقمعز وحاط رأسه بين ايديه💔 والرجالة ايسكتوا فيه😭 وبدر وجهه اسود واعيال جيرانه ايسلموا عليه بالخد وحوشنا ايخشن فيه الصبايا...ونسمع في صوت اعياط ..نزلت من السيارة بسرعة ...تقريبا نزلت منها وهي مازلت تمشي ..مش عارفة شن جاء في بالي وقتها ..بس كنت متوقعة كل شي ..الا اللي صار 💔 روان نزلت في جرتي تجري
باسم كان مقمعز في السيارة ومصدوم معاش قدر ينزل.جاءه خالي واعيال عمي نزلوه..💔
أنا نجري للحوش وخنقتني العبرة : كنكم شن صار ..شن صار ..عليش تبكوا 😭 عليش
جاء بدر مسكني لان الشارع مليان رجالة : تعالي خشي جوا
أنا نمسك في يده : كنكم يابدر ..شن صار قولي😭
بدر طبس واعيونه متورمة من البكاء وخششني للحوش: خشي جوا 😥
أنا خشيت نجري للحوش لاقيت خالاتي يندبن وجاراتنا يبكن والحوش مليان قريباتنا ..أنا كنت اندور بعيوني على ماما وبشرى ..لكن ماشفتش الا جارتنا جت ضمتني تبكي وأنا واقفة مصدومة ومش عارفة شن صاير ..لما شافني جاراتنا وقريباتنا جن شوري وقعدن يندبن ويعيطن والحوش التم عليا ..وأنا نبكي ومش مستوعبة شن صار
أنا نمسك في وحدة من خالاتي : كنكن شن صاير ..حرام عليكم واحد ايفهمني ..عليش تبكوا😭
ونسمع صوت بشرى اتصرخ وجتني تجري ..أنا كنت انبحت فيها مصدومة ..بشرى نادبة وجهها متورم واحمر وشعرها متقطع ودموعها امغطيات وجهها😭 ..
بشرى تمسك واتهز فيا وتضرب في وجهها : حي عليك يابسمة ..حي عليك ماما سيبتنا ..حي علينا قعدنا بلاها ..اااااااه 😭 ووووووووه يا ماما يانعلي ياماما سيبتينا بدري..استعجلتي ياحبيبتي.. ..حي علينا قعدنا بلاها وووووه ..وووووووه
وجت بدور حتى هي تبكي وتعيط وصايرة فيها حالة ..😭💔
أنا نسمع فيهن ومش مصدقة ..ماما سيبتها اكويسة ..سيبتها تحكي وتضحك ..كيف ماتت..كيف كيف 💔 روان ضمتني تبكي ..مع خشت بثينة ..لحقتنا لما سمعت بالموضوع....فكيت روحي منهن بقوة ...سيبت بشرى وبدور وقعدت نجري في الحوش اندور في ماما ..نفتح في الديار ..خشيت لكل مكان ..والصبايا ايبحتن فيا ويتباكن وخالاتي يلحقن فيا ويبن يمسكني لكن أنا من قوة الصدمة جتني قوة غريبة ماقدرش حد يمسكني ..أعيوني امتلين ادموع😭 ..ومعاش قدرت انشوف شي مسكتني خالتي
