#ثمن_الخطايا
#الحلقة_9
بشرى صابرة لعند تسمع في لمياء تضحك..ماعش قدرت تمسك روحها فتحت الباب وخشت 😡
أشرف مقمعز على الكرسي وفي يده اوراق ..ولمياء مقمعزة على الكرسي مقابلته وحط رجل على رجل وتضحك
بشرى امصبية وحست موقفها بايخ 😫
أشرف نزل الاوراق اللي في يده وأتكا على الكرسي رفع حاجبه ويبرم في البيرو بين اصابعه وكان في على وجهه ابتسامة حقيرة ..بمعنى رأني كاشفك وعارف شن صار فيك وأنا قاعد مع لمياء في المكتب وأنتي برأ😏
أشرف : نعم يابشرى في شي ؟؟
بشرى اتبحت فيه وفي لمياء ومرتبكة : اااا..ممم طولتوا قلت انشوفكم مرات تبوا حاجة...انطيب قهوة😅
أشرف ابتسم وصبا : لا طالعين اصلا ....وبحت في لمياء ....نمشوا؟؟؟
لمياء صبت : نمشوا 😊
بشرى اتبحت فيهم وهم طالعين وحست بحرقة في قلبها 🔥
بشرى مشت وراهم بسرعة : وين ماشيين؟؟؟؟
أشرف بحت فيها ورفع حاجبه : نعم !!!!؟
بشرى انحرجت : قصدي مطول ..اااا يعني تبي اترد على المكتب ولاخلاص
أشرف : لا ..كملي شغلك وصكري المكتب 😑
بشرى : تمام😥
بعد طلعت أشرف ولمياء بشرى معاش قدرت تمسك دمعتها 😭..حست روحها ممكن تخسر أشرف في اي للحظة ..ولانها كانت متعودة من أشرف اهتمام ومعاملة مختلفة...ياريتها قدرت تعرف أنها اتحب أشرف من قبل ايصير معاها هك💔
***************************
أنا في العشية جتني روان كسدنا في دارنا اشوي ..وبعدها طلعت امعاها للكوجينة انطيبوا في قهوة...راون اطيب في القهوة وأنا انوتي في السفرة ..خش علينا باسم ..كان في دارهم توضى وصلى العصر وغير دبشه ويبي يطلع
باسم : سلاااام
أنا : اااااهلين
روان طبعا انحرجت ...أتحب باسم من زمان وهو مايعرفش ويعامل فيها نفس اخته
باسم قمعز على الكرسي : شن اخبار الامتحانات
أنا : مزاااط ..يانعليا هذا جزئي شن شكله النهائي
باسم : عندي أسئلة مادة بكرا بالحل كان تبي نطبعلك نسخة تقعد عندك فكرة على نوعية الاسئلة
أنا : صاح...ياريت والله..نسخة ليا ونسخة لروني
روان : لا مش ضروري ناخذ منك😅
باسم : خلاص معناها توا نطبع نسختين ..عطيني قهوة نبي نطلع
روان : هيا اشوي
باسم طبس يربط في مرمار الكويش ..وروان قعدت اتبحت فيه ..باسم لابس تيشرت اسود شتوي وسروال جنينز ازرق وجبوتي اسود قصير ..ولان شعره ناعم كان ايحط في جلي عشان يرفعه على وجهه...ولحيته خفيفة..وبنة عطره قوية
