#ثمن_الخطايا
#الحلقة_27
خلاص ناض أشرف في العشية ولابسنا وتينا اروحنا وأنا خذيت امعايا الصور ..ونزل أشرف بشنطتي وبشرى شايلة صلوحي ..وأنا قلتلها توا انشيل الهدايا والاكياس لاخرات ..طلعت بشرى نزلت وأنا طلعت الدبش ونبي انصكر باب الشقة ومنقهرة وينك يامحمد نبي انشوفك🥺 .. ونسمع صوت في الدروج فوق ..طبعا شقة بشرى وبعدها في دروج ايرقى فوق للسطاح
رفعت رأسي وشفت محمد ايبحت فيا من فوق يانعليا نجك ليا رايفت عليك 🥺
محمد ابتسم وقالي برأسه من غير صوت تعالي فوق ❤❤
أنا خفت ومصبية مكاني : كنك... تعالى أنتا
محمد بصوت خافت : تعالي اشوي بس ..هيا بسرعة
بحتت لوطى وقلبي يدق بقوة ...ورقيت بسرعة واول ماوصلت عنده مسك يدي وطلع بيا للسطاح
محمد : شن اخبارك
أنا خايفة وانبحت في الحمام في كل مكان منظرهم ايهبل : تمام الحمدالله
محمد : بحتي فيا هنا ..تبي تمشي صاح
أنا هزتي رأسي : اها
والحمام طار مرة وحدة مجموعة كبيرة منه دارت صوت وأنا انفجعت في البداية لكن بعدها قعدت نضحك 😂
محمد : كنك خفتي منه 😂
أنا انبحت في الحمام وهو يبرم في السماء وفي اعيوني ضحكة وعلى فمي ابتسامة ..وهذا حالي لما انكون مع محمد ❤
أنا : ايهبلوا ..شكلهم ايجنن
محمد ايبحت في وجهي وفي عقله ايقول أنتي اللي اتهبلي لكن طبعا ماقالهاش ليا 🥺
محمد : اسمعي نعطيك رقمي مرات تبي حاجة او تبي تحكي امعايا ترني عليا..تمام
أنا : تمام
طلعت نقالي وامصبية على باب السطاح ومحمد قرب مني وطبس عليا ايمل في رقمه ..وهو عطاني رقمين عنده شفرتين ..وأنا سجلتهم
محمد : شن صار تمام
رفعت وجهي في وجه محمد : تمام حفظتهم عندي
محمد قريب مني وحسيت بيه ماشالش اعيونه من عليا وأنا انحرجت وارتبكت يانعليا اعيونه يقتلن : باهي خلاص نبي نمشي أكيد يستنوا فيا
محمد : اوكي بس أهم حاجة رني عليا
نزلت وأنا عارفة أنه مازال امصبي ويبحت فيا ..وصلت لباب الشقة شلت الاكياس ورفعت اعيوني فيه
محمد : بسمة فهمتي عليا صاح ..كان تبي تحكي امعايا رني نستنى فيك
أنا هزيت رأسي : اها فهمت عليك خلاص
نزلت ومحمد ايبحت فيا ..كنت نازلة وانا طايرة من الفرح .....طلعت لسور مالقيتش حد طلعت لشارع القيتهم راكبين في السيارة حطيت الاكياس وجيت ركبت وصكرت الباب وبحتت فوق شفت محمد ايبحت فيا ....يانعليا نبي نمشي ومش عارفة امتى نبي انشوفك أخرى 🥺
