Ishq e Aatish By Sadiya Rajpoot

26

wajdan ne door se noor ul huda ko dekha, jo badhe masroor se andaaz mein
sab se haath milate hue Mubarak badein qubool kar rahe the.

aur aik dam se iska dil chaha ke
is shakhs ko qareeb se dekhe
jis ki khatir Maliha khud ko mitane ke liye tayyar hai.

woh chalta huwa stage par aa gaya.
haadi bhai! woh jane kis se guftagu mein mashgool the ke aik aawaz ne inhe puraka.

woh choke. is naam se to bas Maliha hi inhen puraka karti thi.
phir palat kar dekha.
pukarne wale ki aawaz mein hi nahi, chehre par bhi waisi ki tazeem thi jo maliha ke chehre par inhen
apne liye nazar aati thi.

shadi mubarak ho haadi bhai!"
woh khuloos se muttajjo lehje mein bola.

shukriya noor ul huda poochna chahte the ke woh kon hai?
aur inhen is naam aur
is andaaz se kyun pukaar raha hein phir woh shukriya ke siwa kuch nah bol paye.

mein aap se yeh nahi kahunga ke
maliha ko khush rakhiyega.
kyunke mein jaanta hoon ke inka khayaal rakhe baghair ap reh hi nahi satke.

"in naik khayalat ka shukriya.
magar maffi chahta hoon,
mein ne aap ko pehchana nahi.

unhon ne woh sawal kardiya jo unhe uljha raha tha .

hum pehli baar mil rahe hain haadi bhai! " noor ul huda aur bhi choank gaye.
phir apna taaruf bhi karwa dijiye."

"mera taaruf gair zaroori hai.
balke behtar hoga ke is mulaqaat ke baad aap mujhe bhool jaye lekin
mein aap hamesha yaad rakhonga.

phir khud hi age badh kar
woh noor ul huda se bagal ghir ho gaya.

Allah Hafiz baadi bhai!
wajdan ne kaha phir alag ho kar
unse haath mila kar stage se utar gaya.

noor ul huda aankhon mein hairat liye
is ajnabi ko dekh rahe the.

jis ki aankhon ki weerani inhen
ajeeb se andaz mein chonka gayi thi.

phir sir jhatak kar
woh baba jaan ki taraf
mutwajjah hue jo inhen kisi se milwana chaah rahe the.

Is waqt wajdan, noor ul huda se mil kar stage se utra , Afaq wahi mojood tha.

Wajdan ke utrne ke baad
woh bhi stage se utar kar wajdan ke peeche chal pada aur iske qareeb ja kar halki aawaz mein poocha.
Maliha se mulaqaat ho gayi? "

wajdan ne use dekha phir hmm! "
keh kar asbat mein sir hilaate hue doosri taraf dekhne laga jahan se haste muskurate logon ki chehal pehal thi.

Afaq samajh nahi pa raha tha
ke isse kya kahe.
phir usne iske kandhe par
haath rakh kar hosla diya tha.

magar dost ki gum gusari pakar wajdan ka hosla tutne laga. isne nichla hont danoton tale bada kar
Afaq ko dekha aur kaha.

acha dost! ab ijazat do. "
Afaq uski kefiyat ko samajh raha tha, dheere se bola.

mai is haalat mein tumhe akela nahi chode sakta. "

wajdan dil giraftagi se muskuraya. "
meri yeh haalat to ab mustaqil rehne wali hai. tumhe jab fursat mile gum gusari ko aajana.

magar is waqt tumhari behan ki
shadi ho rahi hai aur
tumhara yahan rehna ziyada zaroori hai.

" Afaq samajh gaya tha ke
woh is waqt tanhai chaah raha hai,
is liye phir kuch nah kaha.

chalta hoon. wajdan ne kaha phir jane ke liye qadam badha diye.

*************

Wajdaan ne car apne ghar ke gate par roki, phir utar kar gate kholne ke baad car porch mein le jane ke bajaye
wahi is ka engine band kar diya aur chaabi se chhota gate khol kar andar aa gaya.