لم اعرف طفلتى

الفصل الواحد والثلاثون

اللهم صل وسلم وبارك على سيدنا محمد وعلى اله وصحبه وسلم تسليما كثيرا

عاد فارس الى المنزل مر على غرفه ملك ترك الباب
فتحت ملك رات فارس نظرت له بزعل
فارس: ممكن ادخل
ملك فتحت الباب على وسعه ولم تنطق
دخل فارس وجلس على السرير وقال مالك
ملك: يعنى مش عارف مالى
فارس: لا مش عارف ياريت تعرفينى
ملك: ياسلام يعنى مش عارف انى زعلانه منك
فارس: وتزعلى منى ليه
ملك: بطل اسلوبك البارد ده يعنى تضربنى وتطرد خالتو عشان مراتك ومش عايزنى ازعل
فارس: طيب خلينى معاكى ممكن اسالك سؤال
ملك: اسال
فارس: ليلى مراتى من ساعت ما اتجوزتها عملت لك حاجه ضايقتك يعنى قالت لك كلمه وحشه
فكرت ملك قليلا وتذكرت انها لم تتعامل معها اصلا وكانت ليلى دائما فى حالها فقالت لا
فارس: طب شفتيها عملت حد هنا  بطريقه وحشه بابا ماما خالتو حنان اى حد
فكرت ملك قليلا ولكنها لم تتذكر انها رات ليلى ولا مره تعاملت مع احد باسلوب وحش او عملت لحد حاجه وحشه وانها لم تحتك بيهم ابدا فقالت لا
فارس: طيب لما كنتوا بتطلبوا منها تعمل لكم حاجه مع انها مش خدامه هنا ومش مجبوره كانت بترفض
فكرت ملك قليلا ولكنها تذكرت انها عندما طلبت منها ان تنظف غرفتها لم ترفض وبالفعل نظفتها وكانت ترى امها تجعلها تنظف وتطبخ وهى لم ترفض فقالت لا
فارس:بدل ما هو لا و مازعلتكيش بكلمه ولا ضيقت حد ولا عملت لحد حاجه ولا رفضت لكم طلب بتكرهيها وبتكرهوها ليه بقى
سكتت ملك ولم تعرف ان ترد
فقال فارس: شفتى مش عارفه تردى عشان مافيش سبب يخليكى تكرهيها
ملك : لا افتكرت فيه السرقه سرقتنى
فارس: انتى شفتيها بعنيكى عشان تتهميها وتقولى سرقتنى
ملك توترت وقالت لا ماشفتهاش بس الاسوره كانت فى شنطتها
فارس: دا ما ياكدش انها هى اللى سرقتها ما ممكن حد يكون حطهالها مش ممكن ولا انتى ماصدقتى عايزه سبب تكرهيها عشانه
اتصدمت ملك وقالت حد حطهالها مين هيحطهالها وليه يحطها لها
فارس: بصى يا ملك انا اتاكدت من كلامى فى حد حطها لها وانا شفته بعيونى انا مش واقف معاها عشان هى مراتى وانا واثق فيها طبعا بس انا واقف معاها عشان هى على حق ومظلومه
ملك: انت شفته طب مين
فارس: بلاش يا ملك
ملك: لا انا عايزه اعرف من حقى
فارس: ليلى هى اللى من حقها تعرف بس ما اقدرش اقول لها وخصوصا بعد كل اللى حصل لها من تعذيب وغيبوبه بسبب اللى حطهالها
ملك: طب اللى عمل كده عمل كده ليه
فارس: ممكن عشان بيكرها هو كمان من غير سبب زيك
ملك: انا مابكرهاش بس بضايق عشان بتدافع عنها وكمان عشان انت اتجبرت تتجوزها
فارس: انا بدافع عنها عشان هى مش غلطانه وكمان وهى انسانه كويسه اووى وبريئه وملاك و
قطعته ملك :الله الله الله وايه كمان يا روميو
فارس: وهو يحدفها بمخده السرير تصدقى انتى بت فصيله
ملك:كل ده وانت مجبور امال لو ماكنتش مجبور
فارس: فى الاول كنت مجبور عشان ماكنتش اعرفها بس بعد وقوفها جمبى وبان معدنها واصلها اعجبت بيها وحسيت ببدايه حب بس بعد ما عرفت هى مين انا مش بس حبتها انا عشقتها
ملك باستغراب: يعنى ايه هى مين
فارس:فكره لولى الطفله الصغيره اللى كنت بروح العب معاها وكنت بحكي لك عنها وكنتى عايزانى اعرفك عليها بس مالحقتش
ملك: اه طبعا فاكراها اللى انت وعدتنى تاخدنى تعرفنى عليها عشان العب معاها بس يومها جيب منهار من العياط وقلت انك خلاص ماعنتش هتشوفها عشان ماتت
فارس:ايوه هى ليلى
ملك بصدمه وصرخه: ايه
فارس:اهدى ووطى صوتك بتصرخى كده ليه
ملك: بصوت واطى طيب طيب بس اتحمست
فارس:انتى اتحمستى امال انا اعمل ايه الدنيا مش سيعانى مش مصدق كرم ربنا عليا كبير اوى  ازاى  رجعها لحضنى مره تانيه واقرب كمان من الاول انها بقت مراتى يعنى اقرب وحده ليا
ملك: طب والتشوه اللى حصل لها مغيرش شعورك نحيتها
فارس: ابدا والله انا مش شايف فيها عيب ولا تشوه انا شايف جمالها وبرائتها وبعدين التشوه اصلا مش كبير بس اللى حواليها هما اللى عقدوها وتعبولها نفسيتها وخلوها حساسه من اى كلمه انا بقيت بخاف اتكلم معاها تاخد الكلام بمعنى تانى يزعلها هى حساسه اووى ورقيقه
ملك  :انا مبسوطه انك لقيت حب حياتك ربنا يخليكم لبعض ويسعدكم
فارس:امين يارب ويخليكى ليه يا ملوكتى يا قمر
ملك وهى تعطى تعبير الزعل المصطنع :بس بقى عشان انا لسه زعلانه منك انا مش ملوكتك لو كنت ملوكتك صحيح ماكنتش ضربتنى
فارس: يعنى مش عيب انك تغلطى فى مراتى وتكلمينى باسلوب وحش وانا اخوكى الكبير
ملك: بس برضو ماتضربنيش
فارس:يعنى لسه زعلانه خلاص بقى اقوم وما اقولكيش على اللى كنت جاى اقوله لك بخصوص حازم يالله تصبحى على خير يا لوكه وجاء يقوم ليخرج
مسكت ملك يده سريعا وقالت لا لا انا ماعنتش زعلانه دا انت اخويه الكبير تعمل اللى انت عايزه مش تضربنى بالقلم بس لا دا انت تقطم رقبتى كمان براحتك يا برنس
ضحك فارس وقال للدرجادى بتحبيه
اتكسفت ملك ونظرت للارض وهزت راسها بمعنى اه
فارس:اه يا بجحه وبتقولى لى اه عينى عينك دا اللى اختشوا ماتوا اه يانى الحقونى يا ناس اختى الملاك اللى كنت فاكرها ملاك بتحب وبتقولى فى وشى اه يانى يا فضيحتك يا ابو الفوارس
ضحكه ملك وضربته على صدره وقالت بطل بقى الله
ضحك فارس:وحضنها وقال كبرتى يا لوكه وبتحبى و  هتتجوزى وتسيبينى
حضنته اكتر وقالت عمرى ما ابعد عنك هاجي لك على طول وانت كمان هتجيلى امال مين اللى هقرفه بمشاكلى لو الواد حازم عمل لى حاجه هجيبك على طول
فارس:طبعا يا قلبى انا فى ضهرك ماحدش يقدر يزعل لوكتى ابدا انتى مش لوحدك انتى عندك اخ سندك ديما
ملك: حبيبى يا ابو الفوارس ربنا يخليك ليا بس برده 
ما قلتليش حازم قال لك ايه
فارس:ياسلام ياختى كل ده ولسه بتسالى قال لى ايه امال عمال اقول هتتجوزى وهتبعدى عنى الله يكون فى عونك يا حازم هتاخد واحده غبيه
ضربته ملك وقالت انا غبيه انا
فارس:اه طبعا غبيه لما لسه بتسالى
ملك: انا فهمت بس عايزه اعرف التفاصيل
فارس: ابدا قال لى انه بيحبك وانه كلمك من يومين ها من يومين وضربها على راسها وانتى ماقلتليش مش احنا صحاب
ملك بكسوف:اصلى اتكسفت
ضحك فارس وقال:ات ايه اتكسفتى مين دى اللى اتكسفت انتى هو انتى بتتكسفى ولا عندك دم
ضربته ملك وقالت بطل بقى الله
فارس:طيب ماشى بصى انا قلت له ادينى يومين وهرد عليك عقبال ما اخذ رايك وراى بابا وماما
ملك:اوكيه
فارس:وجيت اهو عشان اخذ رايك بس شكلك مش موافقه
خلاص اروح اقول له بنتنا مش موافقه
ملك: استنى مين دى اللى مش موافقه دا انا هموت على الواد دا انا ماصدقت ينطق قال ايه مش موافق قال
فارس:مش بقول لك بجحه وماعندكيش خشه ولا حياء زى البنات امشى يا بت من قدامى امشى بدل ما اقوم افلق لك راسك نصين بتقولى لاخوكى فى وشه هموت على الواد اه يا فاجره التار ولا العار يا ولدى هات البندقيه يا هريدي قلع الجزمه وطلع يجرى وراها وهى تجرى وتضحك وهو يلحقها