သခင်ကြီးနှင့်စံအိမ်တော်

Ep 33

Ep 33

Uni+Zaw

ထို့နေ့ညက ဒိလုံခ၏ ထူးထူးဆန်းဆန်းကြောက်စရာအပြုမူကိုတွေ့ကြုံပြီးနောက်ပိုင်းတွင် ဒိလုံခသည် ပုံမှန်အခြေအနေမဟုတ်မှန်း စပ်ခေါင်ထီရာဇ်တဖြည်းဖြည်းရိပ်မိလာသည်။ညဘက် အိပ်နေရင်းလမ်းထထလျှောက်နေသည်မှာလည်း တစ်ရက် နှစ်ရက်မဟုတ်တော့။

၎င်းအချိန်များတွင်  ဒိလုံခသည် လုံးဝ တခြားလူတစ်ယောက်လိုပင်။စပ်ခေါင်ထီရာဇ်ကိုလည်း အငြိုးတကြီးခိုက်ရန်ပြုတတ်သေးသည်။မနက်နိုးလာရင်တော့ ဒိလုံခသည် ညကအဖြစ်အပျက်များကို တစ်ခုမှမမှတ်မိတော့ပေ။သူ့အား သေစေချင်လောက်သော မုန်းတီးမှုများဖြင့် သွေးရောင်လွှမ်းနေသည့် မျက်လုံးများက စပ်ခေါင်ထီရာဇ်ကို အကြိမ်တိုင်းကြက်သီးဖြန်းဖြန်းထစေသည်။

တစ်ခုခုမှားယွင်းနေမှန်း စပ်ခေါင်ထီရာဇ် သံသယရှိလာ၍ ဒိလုံခအား အမြဲမပြတ်စောင့်ကြည့်နေရသည်။ညဘက်များတွင်လည်း အတတ်နိုင်ဆုံး ဒိလုံခနှင့်သာ အတူအိပ်စက်သည်။တစ်ည ဒိလုံခသည် အိပ်မက်ယောင်ပြီး စပ်ခေါင်ထီရာဇ်အား လည်ပင်းထညှစ်၍ မနည်းထိန်းလိုက်ရသည်။အသိစိတ်ဝင်လာတော့လည်း ဒိလုံခသည် ဘာကိုမှမမှတ်မိ။တဖြည်းဖြည်းနှင့် စပ်ခေါင်ထီရာဇ်နားလည်လာသည်က ဒိလုံခထံတွင် တစ်စုံတစ်ခု ဝင်ရောက်ပူးကပ်နေသည်ဆိုတာပင်။

ဒီထက်ပိုဆိုးမလာခင် ပယောဂဆရာနှင့် အပနှင်မှဖြစ်တော့မည်။မကြာခင်ရက်ပိုင်းအတွင်း စပ်ခေါင်ထီရာဇ် အသက် ၃၃ နှစ်ပြည့်ပြီဖြစ်သည်။ထိုနေ့တွင် 'ဇာမဏီထီရာဇ်' စံအိမ်တော်အတွင်း အကြီးကျယ်အခမ်းနားဆုံးပွဲတော်ကျင်းပမည်ဖြစ်သည်။ထိုပွဲတော်ပြီးတာနှင့် ဒိလုံခအား ပယောဂဆရာနှင့် အပနှင်မည်ဟုတွေးထားလိုက်သည်။

×××××××××××

သိပ်မကြာခင်ရက်ပိုင်းအတွင်း ကျရောက်တော့မည့် စပ်ခေါင်ထီရာဇ်၏ ၃၃ နှစ်ပြည့်မွေးနေ့အတွက် ကြိုတင်ပြင်ဆင်မှုများဖြင့် စံအိမ်တော်အတွင်း အလုပ်ရှုပ်နေကြသည်။ထိုနေ့တွင် ခေါင်အာလူမျိုးအားလုံးသည် 'ဇာမဏီထီရာဇ်' စံအိမ်တော်ကြီး၌ အတူတကွ ပျော်ပါးစားသောက်ကာ သခင်ကြီးနှင့်သခင်မကြီးအုပ်ချုပ်စဥ် လက်ထက်ကာလတစ်လျှောက် အကြီးကျယ်ဆုံး အခမ်းနားဆုံး ပွဲတော်ကိုကျင်းပမည်။ဖျော်ဖြေရေးအတွက် အတီး၊အမှုတ်၊အဆို၊အက အခုန် အားလုံးကို တစ်လလောက်ကတည်းက ကြိုတင်ပြင်ဆင်ထားကြသည်။