يَ سعُود : قُل لِرِيمَ المَكَاحِيل تِعِز عَزّهَا

٤٥ يَ سعُود : قُل لِرِيمَ المَكَاحِيل تِعِز عَزّهَا

اليوم المنتظر ♡♡

زواج عزيزي وريمي

( ي جماعه أنا فرحانة أكثر منهم لا تلوموني )

كانت القاعة مليانة ناس من أصغرها لأكبرها هذا مو أي زواج هذا زواج عزيز اللي محبينه كثير للمرة الثالثة عزيز يعرس لكن هذه المرة يعرس بكل مشاعر الحب كان واضح من شكل القاعة لديكوراتها والكوشة ولا الضيافة والحضور كل شئ في القاعة يبين إن هالمرة يفرق عن المرات اللي قبلها بشكل كبير ....

كانت بغرفة العروس متوترة وكل شوي المكيب آرتست تعدل مكياجها لأنها كل شوي تبكي ما تدري تبكي من التوتر ولا من إنها بتترك أهلها وبتنتقل لحياة جديدة حياة تختلف عن كل الحياة اللي عاشته من قبل بتنتقل لمحطة جديدة بهاليوم بتترك

أمها

اللي فيها تنبض روحها أمها اللي صارت تستشيرها حتى بأصغر تفاصيلها اللي ما تعرف تنام الليل لو ما سمعت صوتها صارت ما تعرف تصبح بالنهار لو ما شافت وجهها ...

أخوها

اللي صارت تعتبره يدها اليمين واليسار تعتبره عيونها وبصرها بهالدنيا أخوها اللي كان هو يوصلها ويجيبها من دوامها ما كان يتركها للسواق كان هو اللي يصبح عليها ويمسي عليها وشوفتها له ترد الروح ...

أخواتها الثنتين

عينين لها برأس جمال هالحياة بوجودهم وسعادة الدنيا بأصواتهم هم لون البيت وطعمه هم الروح المرحة في حياتها اللي تعتبر بسيطة لكن احداثها مؤلمة وبالرغم من معاناتها الكثيرة إلا إن الله عوضها بهالأربع من خلقه خلاها تنسى وتتخطى اللي عاشته فيما مضى ...

كانت تشوف خواتها وصديقاتها داخلين طالعين وكل واحدة ترمي تعليق من جهة دخلت نهال وقالت: وشبك كل هالتوتر اهدي ما يأكل ترا...
ريم وصوتها مبحوح: مدري احس اني ببكي...
نهال: لا تبكين صدقيني كلها يوم بس هالليلة...

جود من وراها: وانشهد بتمر عيشي اللحظة بدون بكي صدقيني ما رح تندمين انا قبلك عشتها وبكيت لين قلت بس وندمت شكلي الصور طلع زفت لاتبكين انتي الحين وتخربين شكلك...
ناظرتها ريم وهي عاقدة حواجبها بخوف: خلك من الصور انا خايفة انزل لهم تحت...

هيفاء وهي داخلة: يلا ريم وقت الزفة...

شهقت ريم بخوف وكانت بتبكي بس قالت نهال: لا لا لا لا تكفيين ارحمي نفسك من الصبح تبكين انتي...
ناظرتها ريم ويدها ترجف وقالت: مو قادرة...
ديما: ريلاكس حبيبتي ريلاكس فكري بأي حاجة ثانية يعني مثلاً فكري إنك بتأخذي اللي بتحبينه؟...
جود وهي تضربها: قصرتي الصراحة حيوانة هي ليش تبكي الحين مو عشان بتأخذ اللي تحبه؟؟...
ديما: لا جالسة تبكي عشان بتترك أهلها ولا؟؟..

قالت آخر كلامها وهي تناظر ريم اللي ناظرتهم بغضب وقالت: الحين أنا متوترة وانتو تتهاوشون؟...
نهال: ريمي أنا آسفة عالتعليق بس شكلك كنك بريعصي وانتي تبكي لا تبكين...
ناظرتها ريم بصدمة وقالت: وش؟؟ الله يقرفك ي شيخة كل هالزين وتشوفين قدامك بريعصي؟؟...
نهال بضحك: كذا شكلك وانتي تبكين بالمكياج والفستان غريب ههههههه...