مستحيل اني أبيعك لو على السيوف

١٢

عند همس بالسياره من الضربه صارت مابين الغفوه والصحيه وتحس بدوخه قويه
السواق:لازم ننزلها عقاب ورانا ومستحيل يتركنا
ماهر:لا شد انت ماعليك
توتر السواق من سياقه عقاب الي صار ملاصق فيهم
ماهر:اشطفه اشطفه
مال السواق بالسياره وارتطمت بسياره عقاب تنحرف بعيد عنهم وتوسعت عيون همس تشوف سياره عقاب تنحرف ترتطم بالسيارات وصرخت:عقاااابببب
كان منظر مفجع جداً تناضر من الزجاج الخلفي تشوف عقاب الي مستند على طارة السياره بسبب الضربه الي جته لف عقاب على مراد وسعود:انتم بخير
مراد بخوف:حنا بخير انت في جرح برأسك
داس عقاب بنزين ورجع بسرعه البرق وراهم ومراد يهز ذراعه:عقاب خلاص جرحك
كان يناظر بوجه عقاب الأحمر وذراعه المشدودة وداس بنزين زياده وهو يناظر للسياره قدامه مايبي يضيعهم :مراد افتح الدرج عطني السلاح
مراد هز راسه يفتح درج السياره يعطيه السلاح وسحب سلاحه مراد
عقاب:امسك الطاره
مراد:طيب
مسك مراد الطاره وطلع عقاب راسه من الدريشه وقال :تجاوزهم بسرعه
داس مراد بنزين يتجاوزهم لف سواق ماهر مصدوم :هذا وش يسوي
ماهر:ما اعرف ليه تجاوزنا
السواق:عيون الذيب محد يعلق معه ما ارتحت
عقاب:اعرض السياره
مراد بصدمه :وش مجنون انت
عقاب بصراخ:اعرض السياره نفذ
سعود انفجع الطريق عام والسيارات وش كثرها:انت تبي تذبحنا
عقاب:مراد نفذ
سعود بصرامه:عقاب الي تسويه غلط
عقاب بصراخ:مراد
مراد ارتبك بس استسلم يوقف السياره بالعرض والسيارات لفو بصعوبه عشان مايرتطمون بسيارتهم وصارت صوت البواري معبيه المكان والبعض من سرعته مسك فرامل بس ماقدرو واصتدمو فيهم وصارت حوادث الي ورى ارتطمو بالسيارات وصارت اكبر ملحمه حوادث من كثر السيارات والي بالأخير صارت ضربات خفيفه بالسياره اما ماهر والي معه علقو بالوسط بين السيارات والي خلفهم اصتدمو فيهم منحصرين بالنص
السواق:وش الحل علقنا
ماهر:عطني الطاره بعد
نط السواق مكانه ومسك الطاره ماهر يناظر عقاب الي اتجه ركض وهو شايل سلاحه ومراد وراه ركض وسعود وراهم وهم شايلين أسلحتهم يمشون من جانب السيارات
ماهر ابتسم بخبث:زين ي عقاب تبي تلعب معي إذا ماخليتك تلحق اخوك
همس كانت من الدوخه تفقد الوعي وتصحى وماسمعت كلام ماهر شافت عقاب وهي تتمايل براسها بدوخه وفزت تتقدم قدام مقاعد السياره تصرخ :عقااااببب
ناظر عقاب بمنظرها كيف كانت تعبانه ودموعها مغرقة وجهها واستعجل خطواته لكن انفجع من رجع ماهر على ورى يصتدم بالسيارات الي خلفه وأحدث مجزره في السيارات الي ورى لان كانت السيارات بس فيها ضربات خفيفه لكن رجوعه عليها عفسها والبعض انعجنت عليهم السياره والبعض تعرض لجروح بليغه والبعض توفى والي بعيد يوم شافو السياره راجعه تركو سيارتهم ينجون با ارواحهم ويصرخون :وش هالمجنون اهربو
مراد بصدمه:هذا وش يسوي دعس البشر
ماتحمل عقاب المنظر وبسرعه رفع سلاحه يصوب كفر السيارات عشان يوقف لان منجد حاس الي وراه صوب عقاب زجاج السياره يتلفه عشان معد يشوف قدام
فتح الباب ماهر يسحب سلاحه:اهربو اتركوها
نزلو الرجال شايلين أسلحتهم هاربين وانطلق مراد وسعود وراهم وعقاب جرى للسياره يفتح الباب الخلفي ومال براسه ينادي همس لكن رجع على ورى من انطلقت بقوه تحضنه وتعلق برقبته يرجع على الخلف من قوة حضنها وروحها الي تعلقت فيه صارت تبكي وهي مفجوعه وعاشت أصعب شعور تشوف السيارات تنطحن قدامها رفع يده اليسار يبي يحاوط ضهرها غمض عيونه بقوه يتفكر منظر اخوه قلبه راغب بحضنها وتطمينها بس عقله يرفض هالشي ويمينه فيها السلاح ويناظر حوالينه
رجع مراد وسعود يلهثون بتعب
مراد:هربو
ضرب عقاب بيمينه السياره بقهر :وين بيفلتون والله لجيبهم لو كانو باخر الدنيا
رفع السماعه مراد يتواصل مع المركز يحتاجون دعم وسعود صد يفتح الطريق لسيارات الاسعاف الي بدت تنقل الحالات الحرجه والي بسيطه يعالجونهم على الشارع ناظر عقاب حوالينهم يشوف الي يبكون بفجعه ومنظر الناس الي متمدد والا جالس والمغذي بيده والدم معبي المكان غمض عيونه بقهر ماكان متوقع ابد تصير هالمجزره وكل الحالات الحرجه والي توفو من سيارة ماهر الي رجعت عليهم الي ارتطمو بعقاب كانت إصابات بسيطه
همس ببكي:يبون يخطفوني كانو يبون يخدروني ما اعرف ليه سوو كذا يبون يذبحوني ي عقاب
طلعها عقاب من حضنه يمسك فكها بيساره وصرخ بوجهها:ليه تهربين من الأساس عجبك الي صار شايفه الي حواليك الي فقد ولده والي فقد ابوه كلهم ذنبهم برقبتك انتي هذا إذا كان عندك ذرة احساس
همس شهقت تحط يدها على فمها تناظر حوالينها مناضر تقشعر منها البدن انهارت تبكي زياده وهنا صد عقاب مايبي يشوف دموعها:لا لا ما كنت اقصد كنت احسب كيان ...قاطعها بصراخ يلف عليها:كيان كيان مخطوفه لكن انتي همك تهربين مني افهمي ي بشر أنا مستحيل أخليك تنفذين بعملتك مستحيل تهربين مني أنا قدرك الأسود حطي هالكلام بعقلك الصغير "ضرب جبينها يأشر على عقلها بسبباته"
شهقت بصدمه ان كيان مخطوفه
رجعت على ورى تبكي بتعب كبير عقاب وكره لها والمجزره الي صارت بسببها عشان ينقذها وكيان الي مخطوفه من ناحيه تشوش فكره وزادت تنهيداتها تصد تمسك قلبها والي تعرضت له كان متعب جدا مالت بجسمها تمسك ركبها تشهق ورفعت جسمها بسرعه واجتاحتها دوخه مره قوية مسكت راسها بيدينها بصعوبه تحاول توازن نفسها لكن الارض كانت تحسها تدور فيها وغمضت عيونها تطيح على الارض لف عقاب بصدمه يشوفها طايحه وأسرع لها يرفع راسها من الارض يبعد شعرها عن وجهها يمسك وجهها بين يدينه ويمسح بكم ثوبه الدم الي ينزل من جبينها ومال بجسمه يشيلها بين ذراعيه يتجه للمسعفين ونظره عليها بين يدينه وثوبه الي صار مليان دم من راسها وملامح وجهها المرهقه من البكي اسرع بخطواته يحطها على السرير وبسرعه المسعفين باشرو حالتها
صد عقاب يشد قبضة يده بندم انه قسى عليها كذا الي عاشته كان مرعب بما فيه كفايه
اتجه مراد لعقاب يحط يده على كتفه ولف عقاب عليه يدخل سلاحه بجيبه:كم حاله وفاه
مراد:حالتين وثلاث حالات حرجه نقلناهم للمستشفى والباقي جروح بسيطه
هز راسه عقاب ولفو لسعود الي متجه لهم بوجهه كله غضب وضرب بسبابته صدر عقاب وهمس برص اسنانه:هالمجزره الي صارت كلها بسبتك انت وانت راح تتحمل كل المسؤوليه
مراد توسعت عيونه:طال عمرك انت كنت معنا وشفت الي صار حالات الوفاه بسبب المجرمين الي رجعو على ورى
سعود:لو ما اعترض هذا"اشر على عقاب" طريقهم ماصار كذا
عقاب:هذا اسمه الضابط عقاب والي صار اليوم والله اطلعه من عيونهم والله لجيبهم طرق
سعود:إذا نفذت من المحاكمه ي فالح
مراد:وش هالكلام
عقاب بتحدي يجابه سعود:أنا جاهز للمحاكمه واوعدك مايهدى لي بال حتى أجيبهم واخذحق همس وحق كل الي تضررو هنا
مراد:اهدو ولاتنسون امر كيان
عقاب:أوصل همس للبيت ونتقابل بالمركز
صد سعود بغضب يكلم بجواله وعقاب يخزه بقهر ربت كتفه مراد:لاتشيل هم أنا معك وشاهد على الي صار
عقاب:ماهز فيني شعره لاهو ولامحاكمته بس ماكان له داعي في بنت مخطوفه والدنيا قايمه قاعده
مراد:تعرف سعود حساس مايحب شي ينحط على فريقه
بعدين تاخذ حق همس هاء خفق القلب "غمز بعيونه"
عقاب ببرود:اسبقني المركز وانا لاحقك
هز راسه مراد بضحكه واتجه عقاب لهمس يشوفها جالسه بشرود مسك بكتفها يوقفها ناظرته همس بكسره وداخلها تعب قبل كم يوم كانت حياتها هاديه وعايشه با احلى أيامها الحين حياتها غير غير مره مشت معه مستسلمه لداخلها الي جالس يتدمر ركبها عقاب ينطلق فيها لبيته يفتح الباب يجرها بقوه لداخل البيت يطلعها لغرفته يدفعها بقوه حتى تعثرت تطيح تستند على يدها وشهقت ببكي نزل عقاب بقهر لها:الحين تبكين بعد وش ؟هاء؟بعد ما ذبحتي الناس لكن انتي وش يهمك الذبح شي بسيط عندك ارتحتي الحين صدقيني كله كوم ووظيفتي كوم ثاني لو تأثرت بشي بسيط روحك ثمنها
دفعها من كتفها يوقف وصد بيطلع ولف لها:لاتطلعين من هالغرفه إلا لقبرك سوي خير فيني وبنفسك