مستحيل اني أبيعك لو على السيوف

٢٣

زاد خنقه لمفلح وشهقت روان تهرب ناحيه الجلسه لانها عارفه عقاب معصب تستفزع بأحد صارت تركض بالممر وتناظر خلفها والخوف معتريها ماحست نفسها إلا بصدر صالح ترتطم فيه انفجع صالح يمسك كتوفها وهي ترجع على ورى بخوف ناظرها صالح بفجعه من منظر وجهها المختبص ودموعها اللي مغرقه خدودها سحبت نفسها تبعد عنه ترجع على ورى تلم نفسها بخوف وتبكي
قرب صالح منها ورجعت على ورى بخوف :اهدي واذكري الله وش صاير معك
ناضرت روان ورى ورجعت تناضره وانهارت تبكي رفع يده صالح يقنعها تهدى:سمي بالله لاتخافين انتي بوجهي تطمني وعلميني وش فيه
روان ببكي:عقاب
صالح:وش فيه
روان:بيذبح مفلح
توسعت عيون صالح بصدمه :وشهو؟
روان استجمعت نفسها تركض ناحية صالح الي صد بنظره تمسك طرف ثوبه:تكفى افزع له لايذبحه الله يخليك
صالح يربت كتفها:ابشري
اتجه ركض صالح يدور على عقاب وخاف مره يكون تاخر
عند عقاب وهمس تشوفه يخنق مفلح مسكت كتفه:عقاب اهدى مايستاهل تلوث يدك فيه
عقاب بقهر:هذا كفو يلمسك
مسكت همس ذراع عقاب توقف بوجهه:عقاب عشاني اهدى
ناظرها عقاب يناظر عيونها ترتخي يدينه يهدى وترك رقبة مفلح الي اخذ انفاسه بصعوبه ودفعه عقاب على ورى ونظره لهمس
رجع ناظر مفلح وتقدم له يمسك بكف يده يشد معصم يده :لازم تعرف ان محارم عقاب خط احمر
مسك اثنين من أصابعه يشدهم على ورى يكسرهم وشهقت همس تغطي فمها ووصل صالح يفصلهم عن بعض:اهدو ي رجال وش فيكم
عقاب:شيله من وجهي عشان ما اكمل عليه
صالح:زين زين انت اهدى بس
اخذه صالح يبعد فيه يطلعه من المزرعه يعرف السالفه منه ويهزء ويسفل فيه وبفعلته الشنيعه
ولف عقاب على همس الي تناظره غمض عيونه يتذكر منظر مفلح وهو محاوط خصرها وماتحمل يحس قلبه يحترق اتجه لها يمسكها من عضدها يجرها له يرص على اسنانه:كيف تتداخلين فيه وتسمحين له يقرب لك كيف تخلينه يلمسك كيف  وبعدين ليه تطلعين بلبسك هذا 
همس بخوف من ملامحه الغاضبه:أنا لا ما
عقاب:لمسك همس الكلب مسك خصرك مسك شعرك
همس:لا عقاب السالفه مو كذا
عقاب بقهر:اش اش همس ما ابي اسمع صوتك قدامي بسرعه
همس تسحب يدها منه بغضب:اترك يدي وبعدين أنا مو ملكك تفهم ومو ضعيفه حتى احتمي فيك وتدري كيف ماراح ابرر لك موت بتفكيرك المريض
صدت بزعل منه تمشي قدامه وهو يستغفر يشد يده بغضب ماكان قاصد يزعلها بس انقهر من يتذكر شكلها وهي قريبه من مفلح قطع طريقه صالح الي يهديه
عقاب:الوسخ ذا لاتشوفه عيني والا ترى بذبحه
صالح:ماعليك فيه ي رجال خلاص طلع من المزرعه بس انت اهدى
هز راسه يرجعون للجلسه وعقاب طول الوقت مو على بعضه وشايل هم همس وزعلها منه وندمان انه حكى معها كذا

عند البنات بالمطبخ يحضرون العشاء روان دخلت غرفتها معد طلعت من الخوف
أشواق:نادو روان ليه اختفت وبعدين وين النعناع معد جابته
همس:أنا أشوفها
ناظرو البنات بهمس الي اعتفس مودها مره ووضح عليها من هدوءها المفاجئ
رنا:كانها زعلانه
كيان:لاحضت عليها
أشواق:اكيد متهاوشين هي وعقاب
عند همس وروان
جلست همس تهديها وإنها لازم تطلع
روان:خايفه
همس:روان ترى هالاشكال ضعيفين انتي معك حق ليه خايفه ومتخبية انتي ماسويتي شي غلط هو الي غلط
روان ماعلقت تناظرها بخوف
همس تشد يدها:روان انتي لازم تكونين قوية صدقيني القوية محد يقرب لها والكل يهابها
هزت راسها روان ووقفتها همس:اطلعي معاي وانسي كلشي صار ولا عليك فيه ولو قابلتيه بيوم بس كف على وجهه يعدل اخلاقه المايله
ضحكت روان تحضن همس:منجد شكراً لك
همس:العفو ي الله نطلع
طلعو متجهين للحريم يتعشون ينقضي جو العزومه بهدوء وهمس من كثر ما اخذت على خاطرها من عقاب ماكلمته طول فترة المساء
اتجهت تجلس بممر النخيل بدون جاكيتها والهبوب تداعب شعرها وهي تبكي بقهر من حركة عقاب بدل مايدافع عنها جلس يلومها

عند روان والبنات كانو ساهرين يسولفون ووقفت من ناداها عقاب واتجهت له وهي خايفه منه وتحاول تقوي نفسها
عقاب يبعد فيها شوي:فين همس؟
روان:بممر النخيل الواضح متضايقه لان تقول تبي تجلس لوحدها
عقاب:وش الي صار حكيني من البداية
توترت روان تفرك يدينها ببعض وحس عقاب على خوفها ومسك كف يدها يدخلها تحت ذراعه يجلسون:لاتخافين أنا مو جاي أهاوشك بفهم الهرجه
هزت راسها روان تحكيه الي صار ولأنها شافته هادي ارتاحت بكلامها تقول له عن وقفة همس معها وكيف تحرش فيها مفلح
غمض عقاب عيونه بقهر :كنت لازم اذبحه الكلب
روان:اسفه عقاب أنا ماكنت ابي يصير كذا والله بس همس شافته يقلل ادب معي وتدخلت
مسح راسها عقاب:ابشري بحقك منه انتي وهمس ومره ثانيه لو صار معك موقف كذا تحكيني مو تخافين أنا ليه اخوك واجبي أحميك
ابتسمت روان تربت كتفه:ان شاء الله
عقاب:جهزي البلوت بنلعب بس اجيب همس
وقفت روان بحماس:ابشر
اتجهت للبنات واخذو البلوت يروحون لجمعة العيال بالجلسه يلتمون حول النار ينتظرون عقاب وهمس
اتجه عقاب لهمس يوقف بعيد يشوفها جالسه ولامه رجولها لصدرها بدون غطاء وواضح تبكي من حركة يدها تمسح دموعها مشى بخطوات هاديه يوقف خلفها :لازم اوصي عليك مثل البيبي كم مره اقول لاتطلعين بدون غطاء الجو برد
وقفت همس تمسح دموعها بدون رد منها ومشت من جنبه بتعديه بس قطعها من مسك يدها توقف بجنبه والزعل واضح فيها
ناظرها عقاب يميل راسه يمسح خدها وقاصد يستفزها:ماش طلعتي ضعيفه وين القوية الي ماتنكسر بسهوله
همس ناظرته بحده وابتسم عقاب:ايوه كذا انتي عيني
همس :وش تبي
عقاب:قالو انك زعلانه
همس بضحكة مسخره:قالو يعني انت ماتعرف انك غلطت
عقاب:أنا ماغلطت ب..قاطعته تشد ياقته بقهر:عقاب والله ترا معد أتحملك تفهم دام ماغلطت ليه جايني واذا قالو زعلانه اعتقد هالشي مايهمك
مسك كفوفها عقاب با ابتسامه :هم قالو انك زعلانه بس أنا اعرف من ايش انتي زعلانه وبخصوص يهمني او مايهمني هذا شي راجع لي مالك دخل بمشاعري
ضرب انفها بخفيف قاصد يقهرها عشان تفرغ غضبها
همس بقهر تضرب صدره ضربات ورى بعض متكرره :أكرهك ي عقاب اكره مشاعرك وعصبيتك وحتى كلامك ما ابي اسمع منك شي اسكت
مسكت أذونها معد تتحمل يستفزها زياده وسحب بيدها عقاب يبعدها عند أذنها يحضنها قاومت همس تبي تبعد من حضنه بس هو مثبتها بكل قوته ما يبيها تطلع تستسلم للأمان الي تحسه بقربه تنتظم انفاسها المعصبه منه وبس تاكد انها هدت طلعها يمسك وجهها بين كفيه:همس أنا ماغلطت بغيرتي عليك انتي زوجتي لو كان بيننا مافي علاقة زواج بس قدام الناس انتي حرمي وانا مستحيل أرضى احد يلمسك بخباثه غلطت بكلامي عليك كان لازم اكون اهدى من كذا وما ألومك وبخصوص زعلك لو مايهمني ماقضيت ساعتين بالي فيك وبزعلك
ناظرت همس بصدمه لكلامه الي نزل على قلبها بحنيه غريبه لامس نقطة عميقه بقلبها نزلت نظرها ليده الي ماسك فيها كتوفها ومحاوطها بحضنه ورجفات قلبها من الدفئ الي تحسه بقربة كان عقاب يشوف هدوءها وهي تناظر ليدينه منزله راسها وهو عرف انه غلط بحقها ولازم يرضيها كان يتكلم معها بمشاعره الي بقلبه مو تعاطف معها ابد هز كتوفها ينبهها لمن سرحت وفزت تناظره وقالت :الحين يعني انت بكلامك الطويل ذا كله ماسمعت كلمة اسف منه والا راح تنزل من مقامك ي حضرة الضابط لو اعتذرت
ناظرها عقاب بدون رد وتأففت تبوز تصد بوجهها عنه اما عقاب كان منضر زعلها وأسلوبها وهي تطلب الاعتذار منه فاتن جداً مال بوجهه يطبع بوسه طويله بجنب شفتها توسعت عيونها بصدمه من طول البوسه ومن جراءته ماتوقعت انه ممكن يسويها وزادت صدمتها من بعد عنها يقول:اسف
....