مستحيل اني أبيعك لو على السيوف

٣

رفعها بسرعه بين يدينه يسحب غطاء يغطي وجهها فيه وبسرعه يتجهه للباب الخلفي ويركض فيها بعيد عن الافنت

في احدد صباحات الشتاء البارده
السعوديه :الساعه ٩
بيت قايد
ام منير زوجة قايد:ماقال لك متى راجع وليه رايح لندن؟
قايد:لا ماقال
غدير زوجة عقاب تحط دلة القهوه:ياعمي ادق على عقاب مايرد
قايد بنفخه :وش فيها عقاب رجال ويدبر روحه
غدير تشمق:ماقالت شي اسال زوجي وبطمن عليه
دق جرس الباب
قايد:قومي افتحي الباب من فم ساكت بس
غدير بقهر توقف تتجه للباب تفتحه بنرفزه ولانت ملامحها من شافت ابوها وامها وأخوها
ظافر:السلام عليكم
قايد :عليكم السلام
وقفت ام منير تستقبل ام غدير ودخلتها قسم الحريم
غدير ترحب في امها وسلمت على ابوها وأخوها احمد
دخلو لقسم الرجال ولفو لدخول تميم اخو عقاب
تميم:ارحبوو
احمد:ارحب انت وينك مختفي
قايد:سربته وين بيختفي تفكره بينجز شي يفود
تميم يسلم على عمه ويحب راس ابوه ويسحب لحية ابوه يبوسها بملاطفة:وش فيه القايد الأخلاق ضاربه
ظافر ابتسم :حبيب القلب مو فيه اكيد بينفس علينا
احمد باستغراب:إلا صحيح هو ليه سافر بدون يخبر وكذا فجأة
تميم يجلس يتقهوى:علمي علمك
ظافر يشد يد اخوه قايد ويهمس:وش العلم ي اخوك وش صاير
قايد ربت يد اخوه وناظر بتميم واحمد:فزو شوفو لكم شغله
تميم:طرده من ورى التريلات
قايد:تقوم والا اجيك بالعقال
احمد فز:لألا قمنا خلاص
فزو العيال يطلعون للحديقه وجلسو على العشب الأخضر يتسألون سبب نفسيه قايد وسفرة عقاب المفاجأة

داخل مجلس الحريم
دخلت ام منير تصحي روان النايمه وطلعت أشواق من غرفة تبديل الملابس:يمه أنا صاحيه خليها نايمه وش ودك؟
ام منير:ابيها تزين قهوه عمك ظافر وعياله جونا
أشواق:ياليل ام غدير جاية خلاص جاء الغثاء
ام منير:خلاص ي بنتي لاتتداخلين فيها واحشميها لجل خاطر عمك
أشواق:يمه ترا ان جلست تلطش بالكلام با الطشها بكف
فزت روان:هاء وش فيه فيه هوشه
لفت أشواق عليها:اي على طاري الهوشه تفزين اجل ي الله قومي ساعديني
ام منير:لاتبطون
أشواق:ابشري
عند ام غدير وبنتها
ام غدير:كيف يروح زوجك من عندك ماتعرفين وين رايح ؟
غدير:يمه هو فجأة أخذنا أنا وبناته ورمانا هنا وراح بدون يعطيني فرصه اساله
ام غدير:لارجع لازم تسوين روحك زعلانه خليه يرضيك ويشتري خاطرك
غدير:طيب ابشري
ام غدير بهمس:وان شاءالله تشتغلين ببيت اهله وهو هايت من ديره لديره
غدير تحط رجل على رجل:لا يمه أنا هنا ضيفه كاسه القهوه ما أشيلها عنده اختين يخدموني
ام غدير با ابتسامه مكر:اي كفو خليك كذا احسن ما يستغلون غيابه ويكفرون فيك
غدير ابتسمت:بعيده عنهم
دخلو بنات غدير توم ثنتين ليان ولين بعمر ال١٣ سنه فزو ركض لجدتهم ام غدير يحضنونها وهي تبادلهم وتسلم عليهم وقطع جوهم ام منير الي دخلت:حي الله ام احمد نورتي
ام غدير بتحفظ:نورك
اجل وينهم بناتك مايجون والا حنا مالنا قدر
ام منير:وش هالكلام افا عليك ي ام غدير بس هم يجهزون الضيافه
هزت راسها ام غدير بشمقه وقطعهم دخول رنا "زوجة تميم" من عايله ثانيه وعسل الكل يحبها فعلاً
رنا با ابتسامه تعدل فستانها:سلام عليكم
ابتسمت ام منير وهي تحب رنا حيل لان قلبها ابيض وطيبه:هلا حياك الله
مالت بتوقف بس رنا تعجل خطاها تجلسها:والله ما تقومين ارتاحي
ام منير:الله يرفع قدرك ي بنتي
سلمت عليها وعلى غدير وامها وهمست غدير لليان ولين:روحو برى ماما
ليان:زين
طلعو للصاله يفتحون جوالاتهم يضيعون وقتهم عليها
عند روان وأشواق دخلو يسلمون عليهم ويضيفونهم وجلسو بجنب رنا لأنهم يمونون عليها ويحبونها
ام غدير:مو عيب الي يسويه ولدك ي ام منير
ام منير:ليه وش صار؟
أشواق بهمس:ياكرهي لها ي بنات
روان:كلنا والله ملقوفه وغثيثه
رنا:اش خلونا نسمع
سكتو يسمعون ام غدير:كيف يسافر بدون مايعلم زوجته والا هي زوجة بالاسم فقط
أشواق:سلامة عرفك حبيبتي لو بالاسم ماشفتي بناته قدامك
روان ورنا كبحو ضحكتهم وام غدير ولعت وهي تحط كاسه القهوه:يوم اتكلم مع امك انتي لاتردين عنها
أشواق:لا بس عشان اعلمك او اصحح معلوماتك المضروبه
ام غدير:جالسه انهان ببيتك ي ام منير
ام منير بحده:أشواق خلاص عيب
لفت لام غدير:والله ي ام غدير كلنا ماعندنا علم هو سافر او لا مانعرف
ام غدير:عقاب مايمشي بدون يعلم ابوه
أشواق:وانتي وش دخلك ليه اللقافه
غدير:أشواق انطمي ي البزر واحترمي امي
أشواق:بزر بعينك وبعدين والله ما ادري مين البزر أنا والا انتي الي كل ماصار شي بينك وبين زوجك حطيتيه باذن امك
ام غدير:وانا غريبه
أشواق:في شي اسمه اسرار بين الرجال وزوجته بس انتي وش فهمك
غدير بصراخ توقف:احترمي نفسك لاتغلطين على امي
أشواق توقف:من زينك انتي وأمك
ام غدير توقف:لا أنا معد لي جلسه هنا وانتي "لفت لغدير"خذي بناتك وهيّا
طلعت ام غدير وام منير تماسكها وتحاول تهديها وعجزت فيها تقدمت غدير لأشواق وهي تدفعها من كتفها:خلي عقاب يجي إذا ماخليته يكسر راسك
أشواق تماسكت لاتطيح وشهقت:أنا تمدين يدك علي
نطت عليها أشواق بقهر منها وهي تثبت يدها بشعرها وتتهاوش معها وشهقت روان ورنا يحاولون يبعدونهم عن بعض بس عجزو طلعت روان ركض ورنا وراها
روان بصراخ:احمد تميم تعالو فاككو بين غدير وأشواق
فزو العيال من سمعو الصراخ وهربو البنات للمطبخ واتجهو ركض لهم تميم وقف يشوف امه الي تهدي ام غدير وهي تهاوش ومو راضيه تجلس اما احمد دخل وانصدم من منظر أشواق الي شاده راس اخته من شعرها منزلته لتحت وهي تصرخ فز بسرعه يبعد يدها :بزران انتم وش هالحركات
غدير تنط من ورى ظهر احمد وتصفق أشواق كف انصدمت أشواق وفزت لها:أنا تضربيني يامال الكسر والشلل ان شاء الله
حاولت أشواق تنط لها بس غدير متخبيه بضهر احمد مسك معاصم يدين أشواق الي تقاومه وتحاول تنفلت لغدير لكن هو من الصدمه مو مستوعب يناظر بدهشه في هالبنت المجنونه هربت غدير من خلف ظهر اخوها تطلع برى المجلس وركضت أشواق تبيها بس يدين احمد شدتها من يدينها ولفت أشواق بقهر:اترك يديني والله ان تدفع ثمن الكف
احمد بحده:خلاص ان درى عمي والله ليكسر راسك انتي وهي
أشواق:مايهمني المهم أدبها قليله الأصل
احمد شد يدين أشواق يمسك فكها بقوه ينصب وجهها مقابل وجهه:عيدي وش قلتي؟قليله وش؟
أشواق ارتبكت من حركته ومن ملامح الغاضبه والواضح فيها الزعل من كلمتها ناظرته بنظرات بريئه تخفي فيها معالم خوفها وحاولت تسحب يدينها بس هو سحبها يقرّبها اكثر لوجهه وهمس بحده:أظن الي تغلطين فيها زوجة اخوك وبنت عمك
أشواق تسحب يدها بقهر منه وتبعد عنه تضرب يده الي على فكها:زوجة اخوي ماعملت حساب لزوجها الغايب ولا احترمت المكان الي هي فيه
احمد:ولو مايعطيك الحق تتلقفين فيها
أشواق تتكتف:إذا في احد ملقوف هنا فهو امك ثم انت الي متدخل بمشاكل حريم
احمد:أشواق ثمني كلامك
أشواق بتحدي:الي يدق الباب يلقى الجواب وأختك وأمك غلطو وهالكلام بيوصل لعقاب بس يرجع
صدت تتركه وراها ناظر احمد فيها وبعصبيتها انقهر نوعاً ما من طوله لسانها بس ماخفي عليه منظرها اللطيف لمن مسك فكها تنهد بقهر يطلع وراها يقابل امه وام منير وتميم يحاول يفهم الهرجه وعجز
ام غدير بعصبيه:احمد ودني للبيت وأختك معنا
آحمد:أنا في السياره
طلعو ام غدير وغدير وبناتها لف احمد على غدير :انتي متى بتعقلين
ام غدير:احمد اقصر الكلام اختك ماغلطت كله من هالملسونه قليله الحياء
احمد بقهر يلف للطاره:لا جاتك بنتك مطلقه بعدين اندبي حضك
غدير شهقت وهي مستحيل تتخيل حياتها بدون عقاب وضربت ام غدير كتف ولدها:ليه تفاؤل على اختك
احمد:يمه كلنا نعرف غدير وطوله لسانها وكيف تصرفاتها مع خاله ام منير وهذا كله كوم وطلعتها من البيت بدون اذن عقاب كوم ثاني يعني لو رجع راح يقوم الدنيا على راسها
غدير بخوف:يمه عقاب مايرحم لأعصب
ام غدير:ماعليك فيه خليه يعمل لك قدر كيف يسافر بدون يقولك انتي مو زوجته والا معاملك معامله الكرسي في البيت
احمد بصدمه:يمه ليه تشوشينها تعرفين ان عقاب مايعمل حسابنا حنا عيال عمه وبعدين سفرته ذي محد يعرف فيها حتى امه ماتعرف
ام غدير:اجل ذي قرصه له خله يتأدب
يأس احمد ان امه تفهم لكن الي متاكد منه ان عقاب بيقوم الدنيا على راس غدير لو رجع مالقاها بالبيت
اتجه لبيتهم بهدوء يتفكر ويهوجس بسفره عقاب

عند قايد وظافر
ماعارو موضوع غدير والهوشه اي اهتمام ومتعودين على قصص الحريم وهوشتهم او نقول هالمره كان همهم الاكبر عقاب
ظافر:انت منجدك ؟ ماتحس ان الي تسوونه غلط؟
قايد:وانا وش حيلتي ي ظافر خسرت ولدي الاول والحين جالس اخسر الثاني مو قادر اسوي شي الامور جالس تفلت من يديني ي ظافر
ظافر بكسره على اخوه:ماعليه ي اخوي شد حيلك يرجع عقاب بالسلامه وكله يهون
قايد يهز راسه ينتظر جية عقاب على احر من الجمر
داخل المطبخ
تميم بصدمه:منجدكم ؟وبعدين وش صار؟
أشواق تبرد خدها بثلج:والله ما أنسى لها هالكف إذا مارجعت لها دبل ما اني بنت ابوي
رنا:والله هي وقحه وتستاهل ماجاها
روان تزبط شاهي لابوها وعمها:تهقون عقاب يهاوش لو عرف انها طلعت بدون اذنه
تميم:وش الي يهاوش تحمد ربها لو ماجاب اجلها
أشواق:ليت ويخلصنا منها
رنا:حرام عندها عيال مايصير تقولين كذا
تميم متكي على رخام المطبخ:والله جلستكم اكشن ي الحريم مو نفسنا ي الرجال كلها هياط ورسميه
رنا تلف له تتقدم تحط يدها على كف يده الي على الرخام وقالت:خلاص المره الجايه نعزمك تجلس معنا وتترك مجلس الرجال
تميم ابتسم بخفيف يبي يجرب غيرتها:اي ومنها نشوف المزايين ونمتع عيوننا
روان وأشواق ضحكو على منظر رنا الي ولعت غيره
رنا بقهر تخصر:نعم وش وش امرت تشوف مين ؟
تميم:المزايين وش فيك ليه تزعلين لازم تقتنعين ان فيه مزايين غيرك
رنا من القهر دمعتها وصلت شدت يدها بقهر وتقدمت بتطلع لكن تميم سحبها من خصرها يشدها لحضنه توسعت عيونها بصدمه واحمرت خجل كون البنات معهم بالمطبخ اما تميم ماهمه ابد لانه يحب رنا حيل وماينحرج في التعبير عن حبه لها قدام احد تنحنحت أشواق وهم بكل مره متعودين على جراءه تميم وصدت تطلع برى المطبخ تروح لامها اما روان لفت تعطيهم ضهرها تكمل الشاي
ناظرت رنا حوالينها بفشله وهمست باذن تميم:عيب الي تسويه
تميم:مايهمني وترا فيه مزايين غيرك بس وش جاب النجوم لقمرها
ابتسمت رنا تناظر تميم الي مال براسه لخدها يبوسه وبعد يده عن خصرها ترجع على ورى رنا تنحنح وطلع تميم مبتسم لفت روان على رنا وقالت بضحكه:ودي مره اشوف عقاب يعامل غدير بغزل كذا نفسكم
رنا بصدمه:أنا حتى با أحلامي ما أتخيل
روان:هههههههههههههه عقاب والرومانسيه خطين مايلتقون
رنا:الصحيح ان غدير ما اداني حركاتها بس مستحيل أتخيل عقاب الجامد يقول كلام غزل
روان:هو جامد من يوم ربي خلقه والخمس سنين الي فاتت زادت جموده وقسته زياده ساعات ارحم غدير ترى احس صعب انك تعيشين مع واحد جامد ولا عقاب صامت كمان وكلامه جداً قليل
رنا بأسى:الله يعينه ترى الي عاشه مو شي بسيط
روان:ماعلينا تعالي نتقهوى دام الجو صفى
ابتسمت رنا يطلعون لام منير يتقهوون ويحاولون يسلونها ويخففون قلقها على عقاب