مستحيل اني أبيعك لو على السيوف

٧

عند البقاله ينزل يشيك على السياره فتح شنطة السياره الأبواب والمقاعد مافي شي مال من خلف السياره يناظر وتوسعت عيونه بصدمه من شاف القنبله وصار العد التنازلي لها لحد ٣ دقايق هنا فهم انه كان معه ١٠ دقايق عند الاشاره
ناظر بخوف يشوف الناس حوالينه كثار والبعض انتبه له انه متوتر وصوت الطنين مره عالي اتجه له شايب:وش هالصوت وش صاير معك ي ولدي
توتر عقاب ماعرف وش يرد عليه ومخه تشوش مال الشايب يناظر وانفجع ورجع على ورى بخوف وصرخ:لا إله إلا الله قنبله اهربو أنجو با أرواحكم
صارت صيحه والرجال هربو وصراخهم معبي المكان وصوت كفر السيارات  مسموع ناظر عقاب حوالينه ماكان قدامه إلا انه ركب السياره وطار بسرعه فيها لأقرب طريق بري وعينه على ساعته وقف السياره ونزل ركض ومعه خمس ثواني عن الانفجار انفجرت السياره وطار عقاب من دفعه الهواء والنار وطاح على الارض وارتطم وجهه بالارض وصار فيه خموش وبدلته انعدمت وقف بصعوبه من حاوطته الدوريات ونزل سعود ركض ووراه مراد
سعود:قلت لك خذ حذرك
مراد فز يرفعه من الارض:انت بخير تحتاج مستشفى
عقاب بصعوبه يتكلم:لا بسيطه أنا بخير
رفع جواله من جاته رساله (مو كل مره تسلم هذا بس ترحيبيه)
ابتسم عقاب بمسخره وارسل له فيس مبتسم وقفل جواله يحطه بجيبه
مراد اخذ رقم الجوال يحاول يتبعه بس مع الاسف الاشاره قطعت مافي طريقه اخذ عقاب معه يوصله لبيته ويطمن عليه

ببيت قايد بالملحق
همس تعبت من الدوخه والعطش وألم اصبعها المكسور شافته كيف مايل حاولت تعدله بس عجزت من قوة الالم انسدحت على الارض تلم رجولها لصدرها وتهمس:أنا وش سويت وش ذنبي مين انتم ما أعرفكم طلعوني تكفون

عند عقاب دخل مستند على مراد وفزو تميم وقايد وظافر واحمد بخوف واتجه تميم يسند اخوه ومنظر عقاب يرثى له فعلاً
قايد:وش صار عسى ماشر
عقاب:أنا بخير ي ابوي لاتشيل هم
ظافر:عندك مداهمه والا ايش
تميم:يرتاح بالاول ي عم بعدين يقول لنا وش صار معه
دخل عقاب مستند على اخوه واحمدوجو بوجه أشواق شايله كاسات الشاهي طاح الصحن من يدها وصرخت بخوف:عقابببب
فزت روان ورنا وغدير وام منير من الخوف ماقدرت تشيلها رجولها ركضو الكل له ونزلو بناته لين وليان يشوفون منظر ابوهم المفجع وصرخو ببكاء :بابا
ترك عقاب الجميع يتجه لبناته يطمنهم يدخلهم تحت ذراعه ويخبيهم بحضنه:أنا بخير ي بابا اهدو أنا طيب مافيني شي
غدير بخوف:وش صار ليه حالتك كذا
روان تتجه لاخوها تمسك كتفه بحنيه:عقاب تحتاج المستشفى
عقاب يمسح راسها:أنا بخير حادث بسيط
ناظر امه الي من الخوف عجزت تقوم واتجه لها يجلس عند رجولها يحب كفوف يدها
ام منير بدموع:تكفى ي عقاب لاتفجعني ترا قلبي معاد يتحمل
عقاب:ابشري والله اني بخير هذا أنا قدامك
ام منير:خطية البنت ي ولدي جارت عليك اطعمها لاتخليها تموت جوع وعطش
عقاب تنهد ينزل راسه
ام منير بصرامه:أنا ماطعمتها أنا بيدي اروح لها واطعمها
عقاب :زين ابشري اطعمها
وقف عقاب يناظر غدير وهمس برسميه:الحقيني
فزت غدير تجري ركض وراه دخل غرفته ودخلت وراه تفتح دولاب الملابس تجهز اغراضه لكن انفجعت من صقع بباب الدولاب يقفله ولفت له غدير بخوف تنزل عيونها عن عيونه
عقاب:بأمر مين تطلعين بدون اذني؟وتاخذين بناتي معك ؟وتطاولين على امي
غدير ماردت والخوف ياكل قلبها
عقاب بصراخ:ردي والا لسانك الوسخ بس يطلع على امي
فزو البنات بالصاله من صراخهم وأشواق تمسح قلبها براحه
ام منير بقهر من بنتها:عجبك ولعتيها بينهم
رنا:الصراحه خفت الله يعينها عقاب مايرحم
غدير بدموع:أشواق تهجمت علي وسحبت بشعري كمان
عقاب يشد شعرها على ورى يرفع نظرها لعيونه :لو اني بمكانها ذبحتك
غدير:عقاب اترك شعري ترى انت غلطان ليه تروح بدون تعلمني أنا مو زوجتك
عقاب بتعجب:هذي رنه جديده من محفظك اياها امك؟
غدير:امي مالها شغل المشكله كلها من تحت راس اختك وأمك
رفع يده عقاب بيضرب وجهها لكن غدير رفعت ذراعها تحمي وجهها سحب عقاب بذراعها وهمس باذنها بغضب:أنا طلعتي بدون أذني مره ثانيه قصيت رجلك وان طلعتي ببناتي معك ذبحتك تبين تطسين تطسين بروحك بناتي يضلون هنا وان سمعت بس همسك تتعاطين مع امي تحرمين علي
شهقت غدير بصدمه ودفعها عقاب على الدولاب اتجه للحمام يصرخ:جهزي ملابسي
دخل الحمام يصقع ببابه بقوه ومسكت غدير ذراعها بالم:هين ي اشواقوه مافي غيرك انتي وأمك محرضينه علي إذا ما ندمتك ما اكون بنت ابوي
طلعت ملابسه واتجهت للمرايه ترتب شكلها نزلت تحت تشوف أشواق جالسه بنصر ولعت غدير من القهر وهي تبي فرصه مناسبه تردها روان ورنا انحرجو صارو يسولفون يبون يلطفون الجو تنحنح عقاب نازل وفزت غدير له تبي تحسن صورتها قدامهم وهي متجهه له:عقاب بكلمك
عقاب ماناظرها حتى:بعدين مو فاضي
انكسر خاطرها وتفشلت جدا قدامهم سمعت كبح ضحك أشواق عليها والبنات الي صح كابرو مايضحكون بس وضح عليهم رفعت نظرها غدير لعقاب الي طالع من البيت لف عقاب عليها يشوف الدموع بعيونها وصدت تطلع للغرفه تاركته رجع عقاب لهم :روان الحقيني بأكل
روان:زين
طلع عقاب متجه للملحق فتح الباب غمضت همس من دخل النور بعيونها وهي متمدده على الارض لف عقاب لخطوات روان اخذ صحن الاكل :روحي
هزت راسها روان تحاول تسرق نظر لهمس انكسفت على حالتها مره ورجعت للبيت دخل عقاب يقفل الباب ويشغل انوار الملحق اللي طافيه وعاشت همس في ظلام من يوم دخلته حط صحن الاكل قدامها:اجلسي كلي
جلست همس تناظر الاكل قدامها وهي ميته جوع والدوخه ملازمتها:أنا ماينفع اكل هالاكل عشان طبيعة شغلي
عقاب يجلس يحط رجل على رجل:ماعد فيها شغل وانصحك تأكلين مو كل مره راح اجيب لك اكل
همس:مو انت الي تحدد مصيري
عقاب:كلي بعدين نتفاهم
مدت يدها همس لكوب المويه تحاول تمسكه بيمينها بس عجزت عشان كسر اصبعها أخذته بيسارها تشرب سحبت صحن الشوربه اخذت الملعقه بيسارها حاولت تشربها بس تقرب الملعقه بفمها تصير يدها ترجف بسبب الضغط المنخفض ومايوصل فمها شي
عقاب :كلي بيمينك
سحبت يمينها همس تخبيها بفستانها ودفعت صحن الاكل بيسارها:شبعت
وقف عقاب يتجه لها جلس على ركبه ونص يناظرها ماكانت مثل الكل تنزل عينها كانت تواجهه بنفس الصرامه وماتنكسر عينها ابد مد يده عقاب ليمينها يسحبها بس همس قاومت لكن هو اقوى يناظر يدها انصدم من منظر اصبعها المورم ماتوقع انه كسره وانصدم اكثر انها كيف قدرت تحمل الالم ترك يدها ووقف يتجه لدرج يبي يطلع ادوات اسعاف يجبر الكسر لكن فز من سمعها تحاول تفتح الباب رمى الشنطه على الكنب و

اتجه ركض لها سحبها من ذراعها قبل تطلع رجعها وسكر الباب دفعها على ورى بحده:لاتحاولين تتذاكين او تهربين تراك تأذين نفسك كذا
همس:راح اهرب وراح يجي هاليوم وعينك تشوف
تقدم عقاب بقهر لها رفع يدها اليمين قدام وجهها وقال ببرود:اجل تحملي الالم الي يجيك
شد اصبعها بقوه "مقصده يعدل كسر اصبعها "اما همس ففكرته ينتقم منها لانها حاولت تهرب صرخت بقوه من شدت الالم ومسكت بياقه ثوبه تسند راسها على صدره بتعب اعتلت انفاس عقاب من قربها وبسرعه رفعها من كتفها يجرها يجلسها على الكنب وصار يجبر اصبعها وهي مستنده براسها على الكنب وواضح الدوخه فيها كان يلف الجباره وعين على يدها وعين عليها كانت رغم شحوب وجهها وارهاقها فاتنه جدا وتسحر العين الي تناظرها
همس عقاب بهدوء:دايخه
همس بتنهيده تخالطها بكيه:مره مو قادره ارفع راسي
تنحنح عقاب ينزل يدها سحب الطاوله ووقف يجيب الاكل وحطه قدامها :اسندي نفسك عشان تأكلين
همس ببكي:ما اقدر راسي ثقيل
قرب عقاب منها وحط يساره من خلف ضهرها يحاوطها غمض عيونه بقهر على الي يسويه بس كان مجبور سحبها يسندها على كتفه وبدون وعي من همس وجسمها مرتخي طاحت يدينها على فخذه  ورأسها على كتفه مستنده عليه قرب الصحن عقاب وصار يأكلها وهي بحضنه هو مجبور وهي من التعب مو قادره تقاومه
كان لحضه جداً صعبه عليهم الاثنين همس الي ماتحب احد يستحسن اليها وعقاب الي مجبور يحافظ عليها وتبقى عايشه وهي بنظره عدوته ...