مستحيل اني أبيعك لو على السيوف

١٦

لكن جت من جنبهم ترتطم بالشجره شهقت همس بخوف وتأهب الفريق يشوفون الي هاجمين عليهم من خلف الشجر وشايلين رشاشات ركضو بسرعه يتخبون خلف الشجر وبسرعه سحب همس يخبيها خلفه وسحبو أسلحتهم مسكت أذونها همس من اشتغل طلق النار بينهم وهي خلف عقاب ناضر عقاب لها يشوفها تشد أذونها مد يده يسحب بكف يدها يدخل راسها بصدره ناظرته همس بصدمه تلتمس حنيته وتشوف خوفه عليها نزل نظره لها ورجع يختبئ خلف الشجره من رمت رصاصه طائشه بجذع الشجره شد همس زياده يهدي روعتها من حس برجفها من صوت الرصاصه وصارت معركة طاحنه وهربو بس سمعو المسانده وصلت اتجه عقاب ركض خلفهم لكن معد لحقهم
رجع عقاب للفريق اخذ همس وركب سياره مراد راجع للبيت وبقي مراد يباشرون حادثه الانفجار في المصنع ويلقون القبض على الحراس الي كانو مغمى عليهم

عند غدير صحيت متحمسه ان اخيراً عقاب رجع لها وتخلصت من همس نزلت بكل روقان تجهز فطورهم سالت عن عقاب لكن ضنت انه راح بيت اهله اخذت الفطور للطاوله تحطه اما كيان كان بالها مشغول وتدق على ماهر تحاول تعرف همس عنده عشان هي تحرر نفسها وتهرب لكن وصلها رساله من ماهر انها تواصل خطتهم لان عقاب عرف مكانه وخطف همس استغربت كيان كيف من هنا عقاب طلعها من البيت بارادته ومن هنا يخطفها شكت ان في ملعوب وصارت لازم تحاول تعرف وش ورى ماهر

نزلت جوالها برعب من دخل عقاب يسحب بيد همس يدخلها داخل البيت وطلع من الدرج لغرفه همس ناظرت غدير بقهر تشوف همس رجعت اما كيان حنت عليها تشوف حالتها يرثى لها تقدمت كيان لها بتساعدها بس وقفتها غدير تتجه لهمس :وش رجعك مو طردك برى البيت والا ماعندك كرامه
ناظرت همس فيها وهي تحت تاثير الصدمه من كل شي عاشته تقدمت همس تطلع ببرود مطنشتها لغرفتها تلتقي بليان في نص الدرج ليان تتكتف:ليه رجعتي ترى كنا مره مرتاحين بدونك
ناظرت همس فيها وقاطعتهم لين:ليان عيب وش هالكلام
ليان:ماقلت شي غلط خلاص نبيها تطلع من حياتنا وترجع لنا بابا
لين بحده:ليان ترى بقول لبابا عن الي تسويه
تأففت ليان تنزل تحت وتقدمت لين تمسح كتف همس:اسفه على الي بدر من اختي ما تقصد
ابتسمت همس الي اخيراً حست بحنية احد منهم وقالت:ولايهمك
اتجهت لغرفتها بس دخلت ناظرت بعقاب الي طالع من غرفه التبديل لابس ثوبه
همس:راح تسمعني
عقاب:كل الي بتقولينه ماراح يغير فكرة انك تعاونتي مع اخوك وذبحتم اخوي
همس:عقاب مالي ذنب تفهم كلمه مالي ذنب
مارد يتقدم للتسريحه يمشط شعره تقدمت همس بقهر منه مسكت كتفه تلفه بقوه ناحيتها وبالغلط ضرب المشط الي بيد عقاب في جبينها على حاجبها تأوهت بالم تغطي جبينها وفز عقاب يمسك جبينها يفكر الضربه بعينها
زفر براحه لمن شاف الضربه بجبينها ونزل عيونه لنظراتها المليانه براءه تلتمس حنيته عليها مسكت كتفه تجلسه غصب:اسمعني وبعدها أنا راح اكون مرتاحه انك سمعت الحقيقه تبي تصدقها صدقها ماتبي انت حر بس ماتبني افكار ومعتقدات بذهنك أنا مالي ذنب فيها
عقاب يناظر ساعته يتصدد عنها
جلست همس بجنبه تمسك كف يده بحنيه :أنا قبل خمس سنين طلبني ماهر مبلغ كبير رفضت بالاول بس بعدين قال انه يبيها دية لخويه او شي كذا عطيته اياها بنية طيبه بعدها اكتشفت انه استخدمها لأشياء ممنوعه ورفضت اني أعطيه بعدها ريال واحد ولو تبي انت بنفسك تقدر تدخل حساباتي شوف كل حوالاتي الدوليه والمحليه ولا حواله راحت لماهر
وموضوع قتل اخوك ما اعرف عنه إلا اليوم
ناظرها عقاب من فوق لتحت همس تشوفه يناظرها :معك حق ماتصدقني لكن هذا الي صار وما اقدر اني ابرر لك اكثر من كذا
عقاب:لو افترضت انك صادقه مو تعتبرين انك كمان متورطه بدم اخوي
رفعت همس كفوفها على وجهها تغطي وجهها بتعب وهي مو عارفه كيف تشرح له انها مالها ذنب اكتفت بس انها تصد تبدل ملابسها ووقف عقاب يطلع تحت يسمع الهوشه على الطاوله
تنحنح عقاب وسكت الكل
غدير:ليه رجعتها
ناظرها عقاب:مالي خلقك والله ياغدير
غدير:اي انت بس لك خلق همس أنا لا
عقاب بصراخ:خلصنا
ليان:ليه خلصنا ي بابا مو انت صاير بس تركض وراها ومهملنا
لين:ليان كافي
عقاب كان مستمع بصدمه عمر بنته ماردت عليه بوجهه احتدت ملامحه غضب وقف لليان:من متى تردين الكلام بوجهي معد لي احترام هاء
ليان بصراخ:انت السبب من جبت هذيك معد تفكر فينا وبس تركض فيها
مسك عقاب باذنها يشدها ناحيته:هذيك اسمها خاله همس ولا اسمع بيوم انك تاذينها بكلمه هي بمقام امك واحترامها من احترامي
تألمت ليان من شدة اذنها ورفع نظره عقاب لهمس الي واقفه بنص الدرج تسمعه كيف يدافع عنها بغيابها نزلت بهدوء تتجه لعقاب تمسك كتفه:اتركها لسا صغيره
بعد عقاب عن بنته ولف لغدير:ان تكرر هالشي مره ثانية أنا لي تفاهم معك انتي
غدير صدت تجلس بقهر وعينها على همس الي جالسه تتأمل عقاب وماشالت عينها عنه
غدير بقهر:بروح لامي انام عندها الليله
عقاب:ليه ماعندك بيت
غدير بقهر ودموع:جو البيت يخنقني ي عقاب انت صرت ماتدري عنا وهمك نفسك بس
وقفت غدير تتجه لغرفتها ناظرها عقاب يوقف يطلع وهو مقهور من نفسه وعرف انه قصر شوي معها لكن بسبب مشكلة همس انشغل وقف بالحديقه يطلع بكت زقايره يدخن وهو يهوجس بهمس وكلامها لو كانت صادقه معناه ان اريج كذبت عليه وخلته يتزوجها بدم اخوه وأنها مالها ذنب وكل الي يصير ماهر وحده يتحمل المسؤولية وان ماهر يحاول يذبحها مشكله اكبر صار بدل مايستخدم همس اداه يضعف فيها ماهر صارت هي نقطة ضعفه
لف من سحبت الزقاره همس من فمه ترميها على الارض وناضر فيها عقاب تعتمد بجسمها على الكرسي لابسه فستان صيفي خفيف بالون الأحمر وراميه شعرها على جنب وبكتوف مفتوحه حطت يدينها بحضنها تناظره نظرات طويله وهز راسه بمعنى:وش فيه
همس ابتسمت بخفيف تنزل راسها للأرض بمنظر اسر قلب عقاب ورجعت ترفع راسها:ادري وش تفكر فيه
عقاب يرفع حاجبه:وش
همس:متضارب مع عقلك إذا كلامي صح او غلط
عقاب:مايهمني صادقه او كاذبه الي يهمني اني اسلم اخوك لحبل المشنقه بيدي
تجمدت ملامحها بخوف وبوزت ناظرها عقاب يوم اعتفس وجهها وفز بيقرب لها بس تردد وطلع من عندها متجه لبيت ابوه ووده بجلسه مضاوي لانها الوحيده الي راح تحل التصادم الي بعقله
عند همس جلست بالحديقه تمسك جبينها وتتفكر كيف ماهر ذبح اخو عقاب وكيف قدرت امها تستخدمها كوسيلة وعوض عن دم اخوه وكيف ماهر يفكر يقتلها وياخذ فلوسها معقوله الحقد يوصل فيهم لهدرجه معقول في ام كذا
لفت من سمعت خطوات روان داخله بيت عقاب وتقدمت لها
روان:سلام
همس ابتسمت:عليكم السلام
روان:جيت اخذ بنات عقاب
صدت بتمشي بس وقفها صوت همس:روان مو
روان لفت:اي
همس:تسمحين لي بدقايق شوي من وقتك
جلست روان قبالها:هاديه بزيادة اليوم
همس ابتسمت:احيانا الامور الي تعيشنها غصب تخليك هاديه
روان:وش صار جديد
همس:بسالك وابي إجابه صريحه
روان:وش
همس بعد تردد كبير:كيف ماهر قتل اخوك وكيف وصلت لهنا؟
روان:يعني انتي ماتعرفين الحين على مين تلعبينها
همس:اعتبريني غبيه وقولي لي
روان تفحص ملامح وجهها ومتأكده انها ضايعه فعلاً وقالت:السالفه قبل خمس سنين منير كان شاطر جدا بشغله وشغوف بس مع الاسف بسبب طبيعه عمله صار عند أعداء ومن ضمنهم اخوك وبيوم صار عنده استدعاء لمداهمه وكان معه عقاب ولمن راح للموقع كان فيه اخوك ومجموعه كبيره من المهربين وطلعت الشغله كلها ملعوب وكمين له والي صار ان منير ماعرف إلا لمن وصل ومع الاسف اخوك نحره قدام عيون عقاب الي كان بالسياره لانه كان مع منير
شهقت همس تغطي فمها وكملت روان:من يومها عقاب يصارع النوم دخل بحاله نفسيه وكان عايش على الحبوب فتره طويله وجاه اكتئاب وبصعوبه حتى قدرنا نطلعه من الي عاشه ورجع لنا عقاب بس مو عقاب الفرفوش والي يضحك ويمزح لا شخصيه ثانيه وقاسيه ماتعرف الرحمه وقتها امك رهنتك لابوي وطلبت انها تفديك بدم اخوي لكن عقاب بعد فتره عرف انك مديتي اخوك بمبلغ كبير بوقت الحادثه وحلف إلا يجيبك ويدفعك ثمن الي خسرة ودم اخوي وهذا انتي جالسه تدفعين ثمن أغلاطك
نزلت دموع همس تنزل راسها تهمس:كل هالالم عاشه عقاب بسبب ماهر
تعاطفت روان معها شوي وجت بتوقف بس وقفتها همس تحكيها الي صار معها كامل وانفجعت روان من كل الي سمعته وقالت بصدمه:انتي صادقه
همس بدموع:أنا بسبب جهل مني جالسه ادفع ثمنها غالي صرت بدون ماوى والشخص الي حلفت اهرب من بيته صرت مجبوره أتعايش معه لانه الوحيد الي قادر يحميني بعد الله ويحميني من مين من اخوي شايفه الدنيا كيف جالسه تصارعني من كل الدروب
روان:وش رأي عقاب
همس:وش رأي اخت عقاب تفكرين اني ممكن اذبح اخوك او اذبح احد
روان ناظرتها بتعاطف وهي ماتعرف وش ترد عليها وطلعت من عندها تتجه لغدير
روان:ابي البنات عقاب طلبني اجيبهم
غدير:بناتي بيروحون معاي
لين:بروح مع عمه
غدير:اص وتمشين معاي
روان:غدير انتي تعرفين عقاب لو عرف بيزعل ويهاوش
غدير:بستين داهيه مايهمني
رفضت لين إلا تروح مع روان اما ليان راحت مع امها طلعو تاركين همس لوحدها بالبيت وكيان الي تشوفها كيف زعلانه
تقدمت لها كيان تحاول تسليها وتخفف عنها بدون تعرف انها كيان وشغلت لها ميوزك لانها تعرف همس تحب الرقص مره اتجهت لها كيان :ودك نرقص ونرمي زعلنا شوي
همس ابتسمت:ذكرتيني بصحباتي كانت تعرف تروقني بهذي الطريقه
شدت كيان يدها وهي مجبوره مو قادره تقولها انها هي كيان صارو يرقصون ويضحكون ويستهبلون