🏥 လျှို့ဝှက်ဆန်းကြယ်သောဆေးရုံမှ လွတ်မြောက်ခြင်း🩺

** Ch 28 **

Unicode:

ဒေါက်တာရန်ရဲ့ တိပ်ခွေ(1 ) : ကောင်ကလေး

လုရှောင်ယွင်သည် ခဏတာ တိတ်ဆိတ်သွားပြီး "တတိယထပ်က လှေကားမှာ တစ်ယောက်ယောက် သေခဲ့တာလား?"

တိပ်ခွေ၏အတွင်းရော အပြင်မှာပါ တစ်ခဏတိတ်ဆိတ်သွားခဲ့၏။

ရန်ယန်က စကားထစ်လာကာ "မင်းက ဘယ်လိုလုပ်သိတာလဲ..."

သူသည် ကျန်သောစကားများကိုပင် မပြောနိုင်တော့ပါ။ စက္ကန့်အတော်ကြာပြီးနောက် လှေကားထစ်ပေါ်တက်လာသော ခြေသံများသာ ရှိတော့သည်။

လုရှောင်ယွင်သည် ရန်ယန်၏ပါးစပ်ကို ပိတ်ထားလိုက်တာဖြစ်မည်ဟု လုရှား တွေးလိုက်မိ၏။

လုရှောင်ယွင် သူ့ကိုစိုက်ကြည့်နေပါက ရန်ယန်သည် နှုတ်ဆိတ်နေသင့်သည်ဟု စူကျန်းလည်း တွေးလိုက်မိသည်။

သူတို့၏ခြေရာများကို ရေတွက်ရင်း ဆယ့်သုံးလှမ်း လှမ်းပြီးနောက် ခြေသံများ ပေါ့ပါးလာခဲ့သည်။

ဖြစ်စဉ်တစ်ခုလုံးတွင် စူကျန်း၏ အာရုံစိုက်ခြင်းသည် ပြင်းထန်လာသောကြောင့် သူ့အမူအရာမှာ တင်းမာလာ၏။ ရုတ်တရက် သူ့ဘေးကလူက သူ့လက်ကို ဆုပ်ကိုင်လိုက်သည်ကို ခံစားလိုက်ရတဲ့အခါ အနည်းငယ် သက်သာသွားခဲ့သည်။

ထိုအသံသည် ကြည်လင်ပြတ်သားနေသည်ကို သူတို့နှစ်ယောက်လုံးကြားရပြီး လုရှောင်ယွင်နှင့် ရန်ယန်၏ခြေသံများနှင့်အတူ လိုက်ပါသွားခဲ့သည်။

စူကျန်းနှင့် လုရှားက တစ်‌ယောက်နှင့်တစ်ယောက် ကြည့်လိုက်ကြ၏။ သူတို့ခြေသံတွေသည် တတိယထပ်ကနေ ဆင်းလာတာ သေချာနေပြီး အခုအချိန်မှာ လုရှောင်ယွင်နဲ့ ရန်ယန်တို့သည် မယုံနိုင်လောက်အောင် နီးကပ်နေ၏။ တိပ်ခွေထဲတွင် လုရှောင်ယွင်နှင့် ရန်ယန်အနီးသို့ ဖြည်းညှင်းစွာ ချဉ်းကပ်လာသော အန္တရာယ်ကို မြင်လိုက်ရသလိုပင်ဖြစ်သည်။

လူနှစ်ယောက်၏ ခြေသံများ ထွက်ပေါ်လာပြန်သည်။ ပဲ့တင်သံကြားမှ သူတို့သည် တတိယထပ်စင်္ကြံသို့ ရောက်နေမှန်းသိလိုက်၏။

ထိုနောက် တံခါးဖွင့်ပြီး ပြန်ပိတ်သွားသံကိုကြားလိုက်ရသည်။