🏥 လျှို့ဝှက်ဆန်းကြယ်သောဆေးရုံမှ လွတ်မြောက်ခြင်း🩺

** Ch 31 **

Unicode:

စူကျန်း၏လက်များမှာ တစ်စုံတစ်ရာအား နောက်တစ်ကြိမ်ထိတွေ့ရန် တွန့်ဆုတ်နေလေ၏။ ဓာတ်မီးအလင်းရောင်သည် သူ့ရှေ့တည့်တည့်ရှိ ကြမ်းပြင်ဗလာကို ထိုးထားလေသည်။

သူ့လက်ချောင်းများမှာ  မသိလိုက်မသိဘာသာ တုန်ရီနေပြီး ဓာတ်မီးအလင်းရောင်နှင့် သူ မြင်နေရသောအရာသည် တကယ့်အစစ်အမှန်အထင်အရှားဖြစ်နေရာမှ အစအနပင်မကျန်အောင် ပျောက်ဆုံးသွားသည်ကို သူ မယုံကြည်နိုင်ဖြစ်နေသေး၏။

သူ့ရှေ့ရှိမြင်ကွင်းမှာ အလွန်အမင်း ရင်းနှီးကျွမ်းဝင်နေခဲ့သည်။ 

တိတ်ဆိတ်လှသော ကော်ရစ်တာလမ်း.....ထွက်ပေါက်မဲ့သယောင် မွန်းကြပ်ပိတ်လှောင်စရာကောင်းလှသော နေရာကွက်လပ်တစ်ခု၊ အအေးဓာတ်က သူ့တစ်ကိုယ်လုံးသို့ စိမ့်ဝင်သွားသည့်နှယ် ကျင်ခနဲစိမ့်တက်သွားသည်။

ဤသည်မှာ တတိယထပ်၏ ကော်ရစ်တာဖြစ်ကြောင်း သူ့ခေါင်းထဲတွင် အလိုလို သိလျက်သားဖြစ်နေ၏။ ပင်ကိုအသိစိတ်ဖြစ်သဖြင့် သူ့ကိုယ်သူ သံသယဝင်မနေတော့ပေ။ 

သူ့ဦးနှောက်နှင့် နှလုံးသားထဲသို့ တစ်စုံတစ်ရာ တိတ်တဆိတ်စိမ့်ဝင်သွားသကဲ့သို့ ခံစားလိုက်ရသည်။  ဆေးရုံအဆောက်အဦးကို အုပ်ထားသော အဆိုပါအနက်ရောင်မြူခိုးများသည် သူ့တစ်ကိုယ်လုံးကို တဖြည်းဖြည်း ရစ်ပတ်လွှမ်းခြုံနေလေသည်။ 

‘အနောက်ဘက်အဆောင်က ခွဲစိတ်ခန်း (၄)ပဲ ဖြစ်ရမယ်’ 

“ကျွီ”

ထိုစဉ် သူ့နောက်ကျောဘက်ဆီမှ  အသံထွက်လာသဖြင့် သူ့တွေးလက်စအတွေးများ တုန့်ခနဲရပ်သွားပြီး ဓာတ်မီးမှ အလင်းရောင်မှာ တစ်ချက်လှုပ်ခနဲ ဖြစ်သွားသည်။

‘ခွဲစိတ်ခန်းတံခါးဖွင့်သံများလား’

သူ့လက်သီးကို ခပ်တင်းတင်းဆုပ်လိုက်၏။  သူ့နောက်မှ လေအေးတပြုံတမကြီး ထွက်လာခဲ့သည်။ 

‘တံခါးက သော့ခတ်ထားတာမလား။ တံခါးပွင့်သွားပြီလား။ ဒါဆို ဘယ်သူဖွင့်တာလဲ။ ဘာနဲ့ဖွင့်ခဲ့တာလဲ'

သူ့ခန္ဓာကိုယ်မှာ တောင့်တင်းနေပြီး ပွင့်သွားသောတံခါးကို နောက်ပြန်မျက်နှာမူထားသလိုဖြစ်နေ၏။ သူ့ခေါင်းထဲရှိ အတွေးများအားလုံးမှာ ဝိုင်းကြီးပတ်ပတ်လည်နေသော်လည်း ထိတ်လန့်တုန်လှုပ်ခြင်းဆိုသည့် အကြောက်တရားနှင့်သာ နပမ်းလုံးကာ ရပ်သွားလေ့ရှိသည်။