يا ربي اسوي شنو انا اسي !
لازم اتصل عليهو تاني ولا ارسل ليهو رساله ، لا يمكن ما يشوف الرساله ،لفضل شي اتصل .. حاولت اتصل اكتر من خمسه مرات متصلة ما بيرد علي ولا حتي رجع لي !
مشيت رجعت قعدت مع البنات ، يوم اكئب منو ما مّر علي ، ما انكر صحباتي حاولو يفرقو علي و يفرفشو لي بس ما قدرتا ، بتخيل التخرج و بعاين للوقت ، غايه لاحظت لي ، قالت لي انا ما عارفه انتو ليه بتحبو كدا لمن تحبو بتحبو بي كلو بتقعو علي وشكم و تتعمقو في العلاقه لمن عينكم دا تطلع براا ، اسي لازمتو شنوو قلبة الوش دي ؟ ّ
وشك لمن داير يقع يا حنين ، خلاص ما مشيتي يعني الدنيا ما طارت ولعلمك مافي حاجة اسمها حب ما تورطي نفسك و تنكبيها ساي، عيشي يختي اعرفي اتنين تلاته المافي شنو ، وحات الله انا لو عندي نص جمالك و لا لونك داا ما اعاين لي زول وافتري في خلق الله ، خليكي منو يختي بتاع الجامعه دا يحلك لمن يلم ليهو قريشات لحد اسي تلقي بشيل مصروفو من امو و ابوهووو ، بكرة يجيك المغترب يهنيك ..
مريم قالت ليها ، طبعا ما محتارة فيكي والله يا غايه لكن م للدرجة دي ، كونك ما بتؤمني بالحب و بتشوفيهو تافهه و علاقه م مقيمة دي مشكلتك انتي ، بس الحب موحود بغض النظر عن الشخص..
قلت لي مريم بدون قطع كلامك ، انا بسدايرة اوضح ليكي نقطه يا غايه ، انا ما شايفه نفسي جميلة وكون ان الناس والمجتمع بشوفوني جميله دا ما دافع و لا مقياس للافترا و التعالي و الحب موجود يا غايه و بتلفيهو في يوم من الايام ،و يوم يجيكي امسكي فيهو قوي لانو زيو زي الاكل والمويه و الاوكسجين ما بيقل عنهم اهمية ، يوم يدخل حياتك ، حتعرفي قيمتو واتذكري كلامي دااا كويس ...
قعدت تضخك قالت لي والله انكم فاهمين غلط ، ي بت انتي م شايفنا وضعنا بقى عامل كيف ؟ المغترب هو الحل يا حنونة ولحد ما يجي المغترب داقشي جاي جاي و صرفي نفسك بدل شغل البهدله دا انتي ومريم ،، غاية انا البهين ضراعي و ما بهين نفسي بغض النظر عن مبادئك المقتنعه بيهاا ..
توته قالت هوي كلامكن دا ما بنتهي و الزمن جرى ، قوماكن نوصل بعض، قومو قوموو ..
فعلاً طلعوو ، و ما انكر كانو مونسني او شاغلين تفكيري شوية ..
لحد الساعه 12 ماسكة تلفوني ومنتظرة يوسف يكلمني ، ما اتصل علي ، اتصلت عليهو انا ، ما رجع لي ولا رد لي .. رسلت ليهو رساله في التلفون ،برضو ما رد ولا رجع .. البعرفو انه مهما اختلفنا او حتى زعلنا من بعض ما بنغيب من بعض ، مكالماتنا بتفضل زي ما هي بنتكلم و نتطمن علي بعض و ما بننوم بعض زعلانين ، لدرجة فكرت ان في حاجه حاصله معاهو ، بعد صراع نفسي لحد صلاة الصبح ، صليت و نمت لاني مداومة الصباح ..
صحيت الصباح اول حاجة مسكتها التلفون و ما كان متصل علي ، فطرت و لبست و طلعتا ، الطبيعي انه بنتلاقى انا و مريم و بنمشي سوا
، فعلا اتلاقينا و مشينا ، لحد هنا مافي شي يذكر ، بس دايرة اوضح ليكم حاجة ، انا و مريم صحبتي بنقرا سوا ادارة اعمال عشان كدا بنكون مع بعض طوالي ، و غاية و توتة بيقرو في نفس الجامعه بس مبنى تاني ، مسافه مننا يعني ، و بنتلاقى في البريكات ،،
مع دخلتي الجامعه ، لقيت يوسف في وشي لمن فكيت يدي من مريم ما اتوقعتها نهائي اصلا خلاص هو يعتبر خلا الجامعه ، مريم قالت لي صباح الخير يوسف ، مبروك التخرج ، قاليها الله يبارك فيكي عقبالكم يا رب ، استأذنك مريم اخد منك صحبتك شوية ؟
بيني و بين نفسي استغربتا انه ما مزعوج زي ما اتخيلتا طيب ليه ما بيرد علي !
المهم مريم قالت لي حمشي للبنات بعد تخلصي نتلاقى في مكانا زاتو ، قلت ليها تمام ، قال لي ، يلااا .. مشيت معاهو برا الجامعه ، قلت ليهو :
*مالك م بتررد علي ؟
_ما اتعمدتا بس لاني عمري ما زعلتك و لو كنت رديت كنت حأزعلك شديد يا حنين ..
*علي الاقل لمن ترد و تزعلني اضمن انك
بخير ، افضل من انك تخليني مقلقه ..
_اسف
*انت الزعلان مني وانت البتتأسف لي ؟
_ ما بتفرق معاي منو مزعل التاني و ثم تانيا انتي عمرك م حتزعليني بي ارادتك وانا عارف عدم جيتك كان غصب عنك فاا خلاص يعني
*جيت عشان تشوفني ؟
_جيت اوريكي الشهادة واصبح عليكي وامشي شغلي
*شششغلك !
_اااي حار حار كداا عايز انجز عشان اجي اعرسك
*علي الاقل تدي نفسك راحه كم يوم
_لالا مافي وقت
*ولقيت شغل متين بالسرعه دي ؟
_م تتخلعي و تفتكري شغل شغل ، لا دي ورشه صغيرة كدا امشي فيها اموري لمن تتيسر
*ومالها الورشه في النهايه باب رزق حبيبي و انا معاك للنهايه الشغل ما عيب يا روحي
_عشان كدا بحبك بس ادعي لي كتير
*بدعي ليك كتير و كمان كلمت ليك المدير عندنا ان شاءالله حتي لو تشتغل زي شغلي المهم م توصي حريص ..
_ربنا يخليكي لي ، يلا انتي ارجعي الجامعه انا بحرك بعد داا
*طيب علي تلفون تمام ؟
_تمام حبيبي ...
( في جانب م بعيد شديد مني )
*ووووواااااي لالالالا ما بصدق احلفي دا هو ؟
_وحات الله دا هو زاتو
*بت المحظوظة عشان كدا متمسكة بيهو كدا
_اجي و هي مالها ، هي احلا منو بمليون مرة
*اي بس هو بصراحه كس
رني يا بت متاكدة دا هو زاتو البقولوه ؟
_ياتو يوم شفتي حنين واقفه مع ولد غريب ؟
*ما عارفه لكن افففففف
_هدي هدي ياتو يوم بيهزك واحد
*ما عارفه لكن دخل راسي
_تصدقي انتي ماليكي امان ! ليكي سنه قاداني بي ولد اهلك اسي فجاه نسيتيهو ؟
*دا حاجة ودا حاجة م تلخبطي
_م تنسي ان حنين صحبتك
*و اسي انا مالي ولا قلت ليك شنو عشان تقولي لي كداا ، زي الكان قلت ليكي عايزة احبوو ،، عيب عليكي انا ما كدااا
_ اممممم يلا يلا خلينا نمشي ..
*ملف تعريفي *
الاسم : حنين .... ( ما عارفه اسم ابوي)
العمر : امي بتقول 22 وابوي بيقول 24 ما عارفه الصح ياتوو .. اااي امي وابوي مالكم مستغربين يعني ، عشان قلت ما عارفه اسم ابوي ؟ هههه طيب قصدي امي وابوي الربوني...
عدد الاخوات : ما بعرفهم
قبيلتي : ما بعرفااا
السلم التعليمي : ادارة اعمال مستوى تاني، اي عارفه اني كبيرة بس دخلت المدرسه كبيرة و بدايه قرايتي كانت في الخلاوي ..
بشتغل : في خدمة عملاء تبع زين لي شهرين معاهم ..
و آخر حاجة حابة اقولها ليكم ..
