-١٣-
بقلم / سحر سمير ....
علاً دخل هو قدامي لانو ماسكني من يدي جاريني دخلت وراهوو ..
اول حاجه عيني وقعت عليها في الارض ،كانت
و قفل الباب رزعه وحدة ......
عاينت لي يوسف و للباب ، و اشرت بي صباعي ناحية الباب ، قلت ليهو يوسف الباب ( انا هنا دايرة اوضح ليكم مقدار الثقه لمن تديها لي زولك بأفراط بتوصلك لمرحلة الغشم لدرجة بتستهتر بأمكانية عقلك وتحس انك م متحكم في عقلك ، لدرجة بترفض الواقع و بتتمسك بي فكرتك وغريزتك البتحركك تجاه الزول دا ، هناا حنين شافت بعينها ان الباب يوسف قفلو بس رغم كدا قالت ليهو : يوسف الباب بشكية و استغراب كأن الباب دا اتقفل براهوو و ما يوسف القفلو ، كأنها اتجاوزت جزئيه انه يوسف اتعمد يقفل الباب ) ..
قام قرب علي ، و قالي ، مالووو الباب يا روح يوسف ..
لسه بعاين رافضه استوعب او اخد فكرة اظلم بيها حب يوسف لي ،، بقيت برجع لي وراا ، بقوليهو يوسف مالك انت في شنو ولشنو قافل الباب ، للحظة وقفتا بأطمئنان عاتبت نفسي انا ليه برجع منو لي ورا ولا بزح منه دا يوسف البخاف علي من عضة النملة ، قالي ، في شنو ؟ قلت ليهو :
*كيف يعني في شنو !! انا البسألك ليه قفلت الباب كدا يمكن ما يتفتح لينا و نتحبس هنا و يمكن طيارتك تفوت وانا اتاخرت علي الشغل و ..... *خت يدو في شفايفي قالب شششش
_ انا مش طلبت منك اودعك ونكون برانا ؟
*ايوة بس مفروض كنا نقعد و نتكلم بس انت ضيعت الوقت هنا و فجاة طلعت لي بموضوع الكافيه دا ، بالجد ما فاهمه مالك ؟
_لا حبيبتي انا بقصد انه اودعك وداع خاص لمن نتلاقى تاني و انتي عارفه اني حشتاق ليكي و ...*كان بيحاول يمسكني من خصري ..
*طيب ييوسف زح يدك في شنو انت مالك ؟
_ليه ازح يدي انتي مش حبيبتي
*حبيبتك بس يدك دي م حصل اتمدت علي كداا ،زحها ما تضايقني منك وافتح الباب دا خلينا نمشي
* الباب فيهو اكرة بيفتح عادي بس ما حنمشي قبل اودعك .
_تودعني كيف هدا انا معاك وشفتك خلاص خلينا نمشي ..
_حنين انتي غبيه ولا بتستغبي انتي حبيبتي وحقتي وعمرك م حتبقي لي غيري فاهمه ولي خرية اودعك بالطريقه التريحني ..
*طيب براحه بتعلي صوتك كدا ليه !
_اسف حبيبتي ..
_تعالي قريب..
*يوسف لا زح مني انا ما دايرة كدااا زح
_ لا ما بزح
مسكني من وشي من حنكي تحديداً و ابتدا يقرب علي ، و متحكم بي قبضتو فيني بكل قوتو عشان ما اتحرك ولا اني اقاويهو ، كنت في ذهول وضعف ان في شنو يوسف ليه اتحول كدااا في لحظة بقى انسان تاني .. و انفاسو ابتدت تقرب مني لدرجة انه مافي فرق بين وشي و وشووو ، وقبلني بي قوة كل حركة كان بيسويها كأن بيحاول يبرز لي فيها انه راجل قوي حاسه اني بموت مع كل حركة منو ، اول مرة احس انه انسان قاسي ، او انه ممكن يستخدم قوتو دي ضدتي ،، حاولت ابعد ما قدرتا كنت مخنوقه شديد ، و للحظه حسيت بي كراهيه تجاهو ، انا ثقتي عمت لي عيوني جيت بي رجولي ولحد اخر لحظه كنت متوسمة فيهو الخير .. لمن حسيت ان البحصل دا فوق طاقتي. وقرفانة ، انحليت منو بقوتي كلهاا ، دفرتو لي ورااا ، و بقيت بحاول في اكرة الباب لمن فتحتها ،، والله العظيم ، طلعت من المكان دا اللي هو المطبخ ، ما جريت ولا هربتا ، مشيت بخطواتي العادية ، لمن وصلت المدخل الدخلنازمنو ، ما فكرت ولا حاولت اعاين وراي ، لاني فعلا كنت ماشه وما ناوية اعاين وراي تاني ...
( في جانب تاني )
_انا بس نفسي اعرف راسك دا فيهو شنو كان عرفتا برتاح وحات الله برتاح ..ّ
*يا أمي يا حبيبتي انتي عارفه ان همي في الدنيا دي كلها رضاكي ، صح ولا غلط ؟
_لا ما صح
*افووو ، امي قولي والله ، يعني انا اسي مقصر معاكي ؟
_لا انا ما قلت انك مقصر معاي ، بس كمان ما بتسمع كلامي و احرجتني مع الناس ..
*يا امي يا حبيبتي تاني حنفتح الموضوع دا ، و بعدين يعني عشان الموضوع دا بس بقيت ما بسمع كلامك خالص ومقصر منك !
_ايوة ، هو الموضوع دا اهم حاجة ، يا ولدي بس وزيني انا متين حفرح بيك ، القدرك عرسو ،واخوانك كل واحد فيهم بي بيتو ..
*يا امي ربنا لسه ما بنى بيت القسمة لسه القسمة ما اختارتني بس انتي ادعي لي ..
_انت المابيها القسمة دي ، بالله بت زي البت ، بت قمر 14 ، دي بيخلوها ، دي بيفوتوتا و خات الله اسمع كلام دا انت الخسران ، بكرة بعرسوهاا وخشمك دا يبقي ملح ملح ..
*يا امي و مالو كان عرسوهاا ، كل واحد بياخد نصيبو ماف زول بياخد زياده ولا اقل من الكاتبو ليهو الله ..
_انا ما عارفه انت جايب البرود و طولة البال دي من وين ، اففففف ونعم بالله يا زين و نعمة بالله ، بس اسمع كلامي دا سمح ، بكرة بأذن الله عندنا عرس ولد سميرة بت خالتي ، باجي تحضر وتنقي ليك وحدة من العرس ..
*امي انتي ليه ما قادرة تفهميني يا امي العرس ما كل حاجة ، ولو كان علي اني اعرس كان اولى اعرس ندي ما كان فسختا خطوبتي منها ، يا امي انا بس عندي زوله معينه انا حابي اختارها بي نفسي ما داير اعرس اي وحدة وخلاص ، افهميني عليكي الله يا غاليه و اوعدك مجرد ما القاها اجي اسوقك وتمشي تخطبيها لي
، اتفقنا ؟
_امري علي الحال ، سمعت لي موال و مانشيت قدر الليله و بكرة ، وتتفلسف ، موافقه امري علي الله ..
*الله ما يحرمنا منك يا ست الكل
_و يخليكم لي يا رب ...
*يلا انا طالع مشوار ، اذا احتجتي حاجة كلميني ،
_اكلمك وين ؟
*جبت شريحه عاديه سجلت ليك الرقم في التلفون ، لمن ارجع حقتي ..
_طيب يلا انتبه علي نفسك ..
💙«~
يتبع .....
