_والله ما تصدق كلامي داك كلام زعل ساي
انا ما بتاعت شيوخ والكلام دا ..
*ما مشكله خلاص
_يعني بقدر اشوفك الليله ؟
*اكيد
_يلا طيب انا حقفل منك اجهز نفسي وانت لمن تجهز ارجع لي بي تلفون
*خلاص تمام يا زوله ..
*بعد المكالمة *
* هاهاهاهاهاهاهاي ، قلت ليكي شنو انااا مافي راجل عينو ملانه يختي كلهم بجو ..
_هو دا منو بس انا كان عرفتو برتاح
*حتعرفيهو يحتي اصبري بس ما اسي
_وووب منك ينخاااف منك ..
*بري والله انا مسكينه بس مشكلتي لمن بخت حاجة في راسي لازم اوصل ليها كان ما وصلت ليها يمكن اجن عديل كداا ابرا من الجن انااا ..
_هاها و ود اهلك داك مالك ما قدرتي تجيبي راسو لي اسي ..
*عشان هو برا البلد دي و الليله تحديداً بيجي السودانر، اصبري خلي يصل و وعداً علي اخلي يعزمنا منقه في الكافتيريا التختاريها
_نحيا و نشوف عرس يحى ..
في جانبي ، انا اخترت الصيدليه عشان مشوار شوية من البيت ، وصلت و ما شايفه يوسف .. اتصلت عليهو كدا لقيتو جاي علي من الدكان .. سلمت عليهوو سرعه سرعه و ختيت ليهو السلسله في يدو ، قلت ليهو :
*انا لازم امشي ..
_بسم الله حنين لسه شوفه زي الناس ما شفتك. ..
*عبدالله في البيت و ما تنسى انحنا في الحلة الوقفة دي زاتا بتجيب لي الكلام ،بس وريني حتسافر متين ؟ّ
_بكرة طوالي ان شاءالله ، طيارتي 7 مساء
*بكرة ااقريبه دي يا يوسف !
_اها حتبكي في الشارع يا حنين في شنو مش دا حلم من احلامنا واول خطوة لي حياتنا الجايه !
*عارفه يا يوسف و يعلم الله بدعي ليك ليل نهار وحات الله بس فراقك حار ..
_وانتي كمان فراقك حار بس اسوي شنو ، بلدنا لو كان فيها شغل يخليني اعيش اهلي و اقدر اتزوجك والله ما اتغرب ولا ابعد عنك لحظه يا حنين ..
* ما عليك حبيبي ، بكرة بتهون القواسي و كل آه حتبقى ذكرى 💜
_ربنا ما يحرمني منك ، يا رب
*قصه تلفونك دا شنو شغال ررن رررن رررن من جيت ، رد طيب
_لا ديل اصحابي متجرسين
*هو الما متجرس منو ، حمدلله علي كل حال
_طيب امشي انتي ما عايز اجيب ليك مشاكل بسببي ، واكيد بكرة حلاقيكي عشان اودعك بس يا ري لو نتلاقى ااااا ...
*نتلاقى شنو ؟
_ما عارف صراحه خايف تفهميني غلط
*من متين كنت بفهمك غلط !
_طيب قصدي نتلاقى كدا مقابله خاصه ، يا ريت لو بكرة ما تمشي الجامعه و تقضي الصباح معاي و ....
*مقابله خاصه ! اكيد حبيبي م مشكله ،كمل كلامك مالك بتقطع !
_انو ما عارف خايفك تزعلي يا حنين
*ازعل منك مستحيل يوسف ..
_يعني انتي موافقه نتقابل مقابله خاصه !
*ايوة حبيبي عادي وين الجديد اكيد موافقه ، طيب اسمعني وقفتنا كدا ف الشارع غلط ،خليني اصل البيت و نتم كلامنا تلفون تمام ؟
_خلاص تمام بلبل بتصل عليكي لانو اسي عندي مشاوير و بعدين لمة الشباب ..
*م مشكله بس خلي بالك من نفسك
_وانتي كمان ..
*يلا ...... *مشيت
رجعت البيت ... دخلتا ما حاسه بالناس الحولي يمكن من غير مبالغه اقوليكم اني ما شفتهم ، بالي ما معاي خلاص اتوترتا و بالي بقى مع يوسف ، و في اللحظه دي لو في زول ناقشني ولا اتكلم معاي انا بالجد ما حأضمن ردة فعلي حتكون عامله كيف ، عشان كدا اختصرت نفسي و دخلت الغرفه ..
يعني انا الخلافات الكانت بتحصل معاي طوال السنوات الاخيرة دي كنت بضعف شديد بي سببا و دايماً الكان بيصبرني و يقيف جمبي هو يوسف ، بمعني اصح هو سبب لاني عايشه حالياً بعد رب العالمين ،، ،، عندي غسيل ، قمتا شلتو و طلعتا الحوش ، في غساله بس انا بغسل بي يدي عشان امي بتقول اني ممكن اخرب الغساله ، بس الغساله ما بتخرب في يد متاب ولا مي ، مرات مي بتشيل ملابسي و تدخلهم لي مع ملابسا في الغساله ، عشان ما اقعد اغسل بالطشت ..
قعدت وجهزت حاجاتي ،،
جاتني متاب شايله ليها كوم ، بتقول لي ادعكيهم لي معاكي ، قلت ليها عندك يدين زيك زي .. قالت لي دي قلة ادب جديده ولا شنو ؟
قلت ليها احسبيها زي ما تحسبيها ..
بقت تكورك يا امي تعالي شوفي بت الحرام دي ، انا ما اتوقعت ان امي ممكن تشاكلها علي كلمتا لي دي ، بس اتفاجات بيها جات لحد عندها و لطشتا كف ، قالت ليها الا الكلمة دي يا متاب فاهمة ولالا ..
والله راسي دا ما رفعتو دموعي في طرف عيوني و ساكته ، قالت لي مالك مع احتك يا حنين ، قلت ليها مافي حاجه يا امي ، قالت لي مالك انتي ؟
قلت ليها مافي حاجه ، متاب قالت ليها بس قلت ليها غسلي لي ملابسي معاكي بقت تتلائم معاي ..
قالت لي فيها شنو لو غسلتي لاختك معاكي ؟
قلت ليها امي انا من اصبحتا مكروتة في البيت اجازتي ما برتاح فيها ، و زيادة علي دا انا بغسل بي يدي و هما عندهم الغساله ، اسي مفروض منو يغسل للتاني معاهو ، كلها حبه هدوم ترميها في الغساله و كان الله يحب المحسنين ،، قمت من الطشت دخلت غرفتي و رزعت الباب ..
اقسم بالله انا اتحملت كتير جواي كمية تراكمات بقت اكبر من طاقتي ..
🐸«~
يتبع ....
بقلم سحر سمير
