قفلت منه و بقيت بعاين من شباك العربيه ، و دموعي ديل جرو غصب عني ، بقيت بقول بصوت مبحوح ، يا امي وووووينك !
يمة ووووينك ، يا ربي لو كنت معاكي اسي كنتي حتهتمي بي ؟ كنت حاشكي ليكي عادي مشاكلي و تنصحيني ؟ كنتي حتدافعي عني ؟ حتسأليني اذا اكلت ولالا من اجي راجعه البيت ؟ اكيد يا امي ما كنت حأهتم بي حب الناس ولا كان حيفرق معاي يوسف كان حبي حيكون ليكي كلو انتي و ابوي واخواني ،، انا بس يا امي كان نفسي اعرف ليه خليتوني يعني ،ولا غصب عنكم ، انتو متو يعني ؟
كان متو انا عافيه ليكم ، ولا اقوليكي يا امي انتي لو حية انتي وابوي ودايرني انا حرجع معاكم و والله ما ازعل منكم مسامحاكم الدم عمرو ما بيبقي موية ..
معقول اسهل حاجه متوفرة في اي بيت انا بالنسبه لي حلم ! والله ما بحلم بأكتر من بيت دافي فيهو ام واب واخوان ، ان شاءالله راكوبة حصير ، نعيش فيها مالو ، قالو القلوب لو اتطايبت المكان بيشيل مية .. اااااااخ يا امي ااااااخ انتو وين مخليني براي في الدنيا دي ، طيب انتي عارفه انا عمري بقا كم ؟
يا امي ياخ انا كبرتا و بقيت في الجامعه و كمان بجوني عرسان ، يعني اذا منتظراني اكبر انا كبرتا و حفهم ظروفكم الخليتوني عشانها ! يمكن انا لقيطه و اهلي الربوني داسين مني ؟
م حسيت الا ، علي عمو كبير قاعد جمبي ، بيهز فيني بي يدو ، بيقول لي :
يا بتي مالك انتي ضايعه ولا بتبكي مالك ، قبلتا عاينت ليهو و بقيت ببكي ، دايرة اقوليهو جدوو ، لدرجة قلت اسب يمكن يطلع جدي ، قلت ليهو ما عندكم بنت ضايعه من صغيرة ؟ قالي يا بنيتي انتي عيانه ولا شنو ؟ ماشه وين انتي ؟ اهلك وين عشان نوصلك وصفي لي ؟
رفعت راسي من الكرسي القدامي ، وقلت ليهو انا كبيرة كدا معقوله اضيع ياجدو ، لكن انا فعلاً ضايعه ، ضايعه في الدنيا دي ، كل حاجة وكل مكان وكل الناس الحولي انا غريبه منهم ، ما عندي زول يا جدو الاحساس دا صعب شديد والله عشان كدا ببكي ، كابته ومتحملة لي سنين بس والله تاني ما بقددر ما بقدر والله ... قالي لا حول ولاقوة الا بالله العلي العظيم ، ربنا ينور دنياك يا بتي و يبعث في قلبك السكينة ، قربي من ربك يا بتي قربي ليهو مش ربنا قال : {سَيَجعلُ لهم الرحمنُ وداً} ، قربي منه عشان ربنا لمن يحب عبد بيبتليهو عشان يشوف تحمله ، ربنا ما بحمل زول فوق طاقتو يا بتي ، ربنا بيحبك قربي اكتر عشان حبل الود يكون موصول بينك وبين رب العالمين ،و بس قولي حمدلله علي ما ارد الله ،، كرريها واتيقني بيهاا قولي الحمدلله علي ما اراد الله ..
قلت ليهو ، الحمدلله علي ما اراد الله ، عايزة انزل ،، قالي تعالي ،، فتح لي الطريق ونزلتا .. نزلتا وانا بقول حمدلله علي ما اراد الله، حمدلله علي ما اراد الله ..
ركبت مواصله تاني ، و نزلت عند حلتنا ..
ومشيت البيت ، انا داخله البيت وعارفه ان يومي ما حيعدي علي خير .. دخلتا لقيت عبده بيتكلم تلفون .. م اتكلمت معاهو قام طلع برا الشارع و بيتكلم ، دخلت لقبت امي بتقطع في بطاطس وجمبها مي بتقرا ليها حاجه من التلفون ..
ما فتحت خشمي معاهم ، كل القلت ليهم متاب وين ؟
بس براها جاتني مارقه ، قالت لي خير !
قلت ليها :
*علاقتك شنو انتي بالخير !
_احترمي نفسك يا زفته
*مش لم تحترمي نفسك انتي الاول
_انتي مالك جاية من برة نافشه فينا ريشك
*عشان الانا فيهو دا انت سببو
_ما تجبرني اجي اكفتك يا حنين اساساً يدي بتاكلني ..
*يدك بتاكلك لقلة ادب ما بتاكلك فيني انا ..
( امي اتدخلت ، قالت لي حنين انتي نسيتي اصلك وفصلك ولا شنو ؟ م عشان لميناك تتعدي حدودك )
*لالا ما ناسيه يا امي ، وعمري ما حأنسي ان فرزك لي من بناتك كان في مصلحتي والحمدلله ربيتيني انتي و ابوي احسن تربيه و حاشيلا جميله فوق راسي طول ما راسي دا برا التراب و شامي الهواء ، بس ماف داعي تزكريني كل شويه بجمايلك دي لان دي م حاجة بتتنسي ..
_ قالت لي متاب ، يلا مفترض تحترمي نفسك ..
*عارفه لمن بتتكلمي عن الاحترام بالجد دمي بيفور و بكون كل النفسي فيهوو اشيل راسك دا اخبطو في الحيطه يا متاب ، قدر ما حاولت اضبط اعصابي ما قدرتاا ، سودتي وشنا الله يسود وشك انا ذنبي شنو اتحمل تفاهتك وقلة ادبك ،،
( امي قالت لي انتي بتتكلمي عن شنو يا حنين ،و من الليله قعاد م عندك في بيتي داا فاهمه ولالا زي ما جبناك من الشارع اسي ارجعي للشارع الجيتو منو ، مسقط راسك ) ..
😪«~
يتبع ....
