بقيت واقفه و ما عارفه اعمل شنو ولا اتصرف كيف ، اتصلت علي مي ، قلت ليها انتي في البيت ، قالت لي ايوة انتي وين اتاخرتي كدا ، قلت ليها انا من قبيل واقفه قدام الباب في رجال عندنا ما قادرة ادخل اسوي شنو ، قالت لي ادخلي انحنا زاتنا قاعدين في الصالون اسي مشيت البرنده بهناك عشان ارد عليكي ، قلت ليها ديل منو هم ؟
قالت لي ادخلي ادخلي لمن تجي بتعرفي ! وقفلت السكة ..
فعلا استجمعت شجاعتي و دخلتا ، سلمتا من بعيد كداا ، الا ابوي مشيت بوستا راسو ، و بما انهم قاعدين بقيت مترددة اقعد ولا امشي ، بس قررتا استأذن ، فعلا استأذنتا و الرجال طلعو لصلاة المغرب ، و ما مركزة ولا فاهمه اي حاجه ، بس قلت اكيد بكونو اهل امي من البلد ولا حاجة ، دخلت غرفتي صليت المغرب و غيرتا ، سامعه صوت الرجال تاني رجعو و امي قاعده و معاها مرة و بت ، بتونسوو ..
طلعت دخلت المطلخ اكلت لي لقمة واقفه كداا ، جاتني مي و متاب ، متاب واقفه بعيد و مربعه لي يدينها و بتحرد فيني و مي جات جمبي حضنتني قالت لي فرحت ليكي شديد و الله ،، قلت ليها تفرحي لي في شنو يا بت بسم الله !
امي جاتني ، قالت لي الليله يوم سعدك يا بتي ، اخيراً جاك راجل ود الرجل اليسعدك و يهنيك و يفرحنا بيك ، ويسوقك معاهوو من البلد دي ، بختك ، عقبالكن يا بناتي ..
بقيت بضحك ، قلت ليها امي وحدة وحدة حاصل شنو ؟
متاب قالت لي كيف ما تضحكي راجل حلاة الدنيا عليهو غنيان و مرطب عليكي الله شوفي امه و اختو مدهبن كيفن ، ملبسن دهب للكوع ، ولا اللبس ولا توب امووو ، ياخ توب امو شنوو ، جزمة اختو دي انا كان بعت هدومي كلهاا ما حقدر اشتري فردة وحدة زيهاا عشان كدا اضحكي انحنا لينا الله ..
انا هنا حسيت ان الموضوع دا جد وانا في ورطه عديل ، اذاً كدا البتكلمو فيهو دا عريس ولا انا فاهمه غلط !
قلت لامي في شنو فهميني ؟
قالت لي بعد دا كلو ما فهمتي ، طيرة انتي ؟
قلت ليها امي ، كان بتقصدي ان دا عريس لي انا ، انا ما دايراهو وما تدو الناس ديل كلمة انا عندي لسه سنتين في الجامعه و عندي اهداف اكبر من الزواج ، الزواج دا اخر همي اسي ...
( في جانب تاني )
_ شنو يعني حتفضل تقفل في وشي السكة كتير كدا ، لحد متين ؟
*لحد ما اعرف انتي منو !
_ طيب حتعرف كيف وانت منفعل فيني طوالي كداا و بتقفل في وشي السكة ..
*يا بت الناس انا ما عندي اخلاق للكلام الفاضي دااا ، قولي انتي منو بالحُسنة
_طيب بالحُسنة كداا افضل ليك نديني ريق جلوو ، عشان لو ما جابتك الحسنة بجيبك شيخ محمد ..
*يا زووولة !
_ اااااي عشان كدا خليك حنين معاي قساوتك دي ما بتنفع .
*لالا هددتيني والله ، بس لو سمحتي ممكن اعرف انا المطلوب مني شنو ؟
_مطلوب قلبك يبقي لي براااااي
*قلبي ، مررررة وحدة كداااا ، ما شايفه انك صعبتيها علي شويه ؟
_دي ابسط حاجه ، ممكن اسويها انت السويتو فيني هين ؟
*انا هههههههه كدي صلي علي النبي يا بت الناس هو انا بعرفك لمن اسوي فيكي شي !
_ما الا تعرفني عشان تسوي فيني حاجه
*كلام والله
_اها قلت شنو ؟
*قلت شنو في شنوو ؟
_تديني قلبك !
*للاسف قلبي ملان بي ست ستك ، ملان بي وحدة ما تسوى سبيبه من شعرااا ، ملان بي ست البنات وستك وتاج راسك..
_اوووففففف دا لي انا الكلام دا ؟
*اتخايل لي ما في زول تالت معانا في الخط
_كوييس انا حأوريك
*وريني بسرعه عليكي الله ، و سلمي علي شيخ محمد ........ *قفل الخط
امي بقت تكورك فيني بطريقه هستيريه ..
قالت لي ما عندك دم انتي !
ما بتحسي ، انا طول السنين دي استحملت قرفك ، علمتك و ربيتك و قروشنا كلها راحت فيكي ، قاعده عالة علينا ، لحد متين ؟
يوم جاك واحد كتر خيرو عاين فيكي لا و ما اي واحد ، واحد جيبو ملان و ود رجال عشان تريحينا معاكي و تردي لينا جميلنا في تربيتك طول السنين دي ، لكن انتي اتعودتي علي الراحه لاقية غرفة وبيت وماكله و شاربه زي البقرة ما هاميك شي ..
اسمعي هناا حتعرسيهو غصباً عنك يا حنين و رجلك فوق رقبتك فاهمه ولا لا .. انقلعي من قداااام ووووووشي !!
😢¢¢~
يتبع .....
