صحينا الصباح ، بعد جهزنا ملابسنا وحاجاتنا ، مريم قالت لي :
_حنينة اسمعي رايك شنو نلبس فوط
*كيف ؟
_ياخ حتجي فيكي خطيرة
*التوب السادة المخطط دا ؟
_لالا الناعمة السادة بتاعت الكربة ، ياخ اصبري اوريكي ليها ، نغير بس نقشر يعني تتزكري دي كانت فكرتنا
*عرفتها ايوة ياخ دي بتجنني بس عندها لفه معينه م بعرف ليها و اسي نجيبهم من وين ؟
_انا بعرف ليها ، امي عندها وحدة بنفسجيه و انا شلت وحدة ممن اختي بلانانسي
*دخلتيها لي في راسي ، بس بعدين امشي بيها عند ندى كداا ؟
_اي مالوو ،، دقيقه اجيبهم
( في جانب تاني )
* خلاص يا ولدي معزم علي العقد دا ، ما تسمع كلامي و تخلوها خطوبه بس
_يا امي بعد جهزنا ودفعت دم قلبي وادينا الناس كلمة تجي تقولي لي نخليها خطوبة بس
*ما مرتاحه
_اتطمني يا امي غاية بت كويسه ، قومي اجهزي عشان حنعقد بعد الجمعة ، وخالاتي ديل اتأخرو مالهم
*كلموني جاين في السكة ..
_ربنا يسهل ، انا معاي اصحابي براا لو عايزة حاجة ناديني ..
*طيب ...
انحنا جهزنا انا لبست البنفسجيه و هي لبست الانانسي ، رسمة عين علي روج ، و عملنا الشعر بوف و لبسنا الفوط معاها بلرينات سادة .. و بقينا طالعين ...
_ماشاءالله تبارك الله حنين ربنا يغطيكي والله ما قصدي انكد عليكي لكن العرس دا حتطلعي منو بي عريس ..
*انتي عشان ما شايفه روحك عشان كدا بتتكلمي في جمالي اناا ، بالجد ربنا يحفظك و فكرة الفوط دي حبيتت اول مرة في حياتي اللبساا
_ما بحصل جمالك ، المهم خلينا نحرك الساعه جات 9:30
*يلااا ، اسمعي ناجر امجاد مستغربه نفسي كداا
_يلااا ...
فعلاً طلعناا ، طوالي لقينا امجاد ركبنا و مشيناا ، و بتاع الامجاد يعاين ساي بالمراية ، لمن وصلنا رفض يشيل مني القروش قلت ليهو بتعرفنا من وين انت ، شيل قروشك وابقى ماشي ،، المهم ..
مع وصولنا ، كداا ماشاء الله الرجاال و الاهل ديل والبيت فاتح يملا ويعبي ..
( في جانب تاني )
_انت لحد اسي ما لبستا ؟
*حألبس بعد شوية للصلاة وبعدها عندي مشوار
_كيف الكلام دا يا زين ما حتمشي معاي العقد ؟
*عقد منو ؟
_عقد بت خالتك ،كلمتك امبارح
*اوووف ما داير امشي يا امي
_ما صح منك الكلام داا لازم تكون واقف مع الرجال و بعدين ديل اهلك م صح
*طيب يا امي ، بعد الجمعه ولا متين ؟
_ايوة ، قووم اجهز خلينا نحرك مافي زمن ..
*طيب ...
دخلنا جواا و بنفتش في غايه ..
لقينا شافعه صغيرة ( عمر12 سنة ) قلنا ليها العروسه وين ؟
قالت لينا في البيت الجمبنا داا ، قلنا ليها تودينا ليها ؟ قالت لينا ارح .. جينا طالعين تاني من البيت ، و سامعين النساوين يتهامسن ، ديل بنات منو ؟ وكل مرة تأشر علي وحدة فيناا .. ساقتنا مشينا بيت جيرانهم ، لقينا توته في الحوش برا ، زعلانه وشها ما بيتفسر لمن حسيت لونها دا قالب .. مشينا عليهاا .. مريم سلمتا اول وحضنتا قالت ليها اشتقت ليكي تووته طولنا ما اتلاقينا ، و كان سلامها بارد ، بعدها انا سلمت عليهاا و كانت بتعاين لي بنظرة كدا ما قدرتا افسراا ،، قلنا ليها انتي عيانه ؟
قالت لا بس شوية ارهاق ، قلت ليها مشتاقه اشوف غايه ،وين قاعده ؟
مريم قالت ليها و نخلياها براها و قاعده هنا ليه ؟ م ردت سكتت .. قلنا ليها يلا ندخل ليها ؟ قالت لا ، و قالت لي حنين امشي
قلت ليها امشي وين ؟ سكتت ،، كانت غريبه شديد ، مريم مسكتا و قالت ليها الليله يوم صحبتنا فكي وشك دا يمكن الفاال الجاي حقنا يلا نفرحا و نهيص ليهااا ..
دخلنا ، من شافتنا اتخلعت وضحكت سرعه ( ضحكة مصطنعة) .. مشينا بوسناها
قلت ليها : اخيراااااً ياغايه حأشوفك عرووسه حمدلله ..
مريم قالت : اريت الجاي فالناا يا رب وحدة ورا وحدة كدااا
غاية بي نظرة غيرة: حلاتكم و الفوط يخلوها ليكم ، عقبالك يا رب
مريم قالت ليها تسلمي ، بس مالو مكياجك دا مجلبط ،كدي اقعدي نصلحو ليكي ..
غايه قالت ليها مكياجي في غرفتي ، دا عملتو من بت جيراناا اللون فاتح علي ، قلت ليها انا بزبطو ليكي اسي يا غايه ، بمشي اجيب مكياجاتك بس وصفي لي وين ؟ قالت لي بتردد كداا ، هاكي مفتاح الدولاب الاول علي اليسار ،، قلت ليها اسي بجي ، مريم قالت لي اجي معاك ؟ ،قلت ليها يلااا ،، غاية قالت لينا انتو يا التومان ما بتتفارقن ، قعدنت نضحك ،، مريم قالت ليهاا صحي غاية عريسك اسمو منو ؟
بقت تتمتم و تتلفت انا طلعتا و مريم حصلتني ، قالت لي الجو غريب ما عارفه في حاجه م قادرة افهمااا ، قلت ليها دي خلعة العقد .. قالت لي يمكن ..
وصلنا بيتهم ، دخلنا جبنا المكياج و انحنا طالعين ، انا طلعت قبل مريم ، مع طلعتي دي خبطت لي في مرة انا طاالعه و هي داخله ، بس ردة فعل مني قمت مسكتها و قلت ليها انا اسفه امي اسفه ما اكون خبطتك شديد ،و مسكتها دخلتها ، وهي تعاين فنيي و م بترد
قلت ليها حقك علي انا غلطانة طالعه مستعجله ،، قالت لي ماشاء الله تبارك الله ربنا يحفظك لأهلك ، انتي سودانيه ؟
قلت ليها الله يخليكي .. و جات امي غايه قالت ليها اهلاااا ام العريس نورتينا ، و قعدو ي
سلمو علي بعض ،، ام غايه قالت لي يا حنين قولي لي غاية تجهز خلاص ، قلت ليها حاضر
،، سقتا مريم و طلعنا والمرة لسه تعاين لي ، انا بيني و بين نفسي ملامحا ما غريبه علي نهائي و عرفت انها ام العريس ..
و انحنا في الشارع .. مريم قالت لي :ّ
_وااي لكن الله يرزقني بعربيه زي دي
* قلت ليها ولا سمحه حقتي اسمح هههه
_قالت لي سمح مشحططانا في المواصلات مالك ههه
*قلت ليهاا بخاف تسحروها لي ههه
_ولا الفيها يا حنين يا الله تبارك الرحمن اصلا عربيه زي دي ما بينفع يسوقها غير واحد زي دااا حييح الله بيدي الجنه ..
ما عاينت ولا رفعت راسي عشان اشوف دا منو ولا عندي فضول للحاجات دي ، رجعنا و عند غاية من دخلنا سامعين صوت شكله ولا نقاش بصوت عالي ،، مجرد ما دخلناا توته وغاية سكتو و توته طلعت براا الحوش ، و ما فهمنا شي استغربنا في الموقف ...
ما اتكلمنا ولا اتدخلنا ، قعدتها و بمكيج فيها لمن الناس صلووو و سمعنا اصوات الزغاريت ، و انا و مريم قعدنا نزغرت ، زغرودة ورا زغروتة ، نحضن ونبوس فيها وعيونا ترقرق ، و فجأة قعدت تبكي
جات توته من براا من الباب ، قالت ليها مبروووك يا عرووسه وان شاء الله تكوني نولتي مرادك وخلي يضوي ليكي و مشت .. استغربنا في حدة لهجتا ، توته دي اطيب وحدة فيناا .. عاينا ليهاا ..
و بعد شويه جات ام العروس و العريس و معاهم وحدة ..
جو باركو ليهاا وانا ومريم واقفين جمب بعض نعاين ، حتي ام العريس تعاين فيني شديد باركت ليها بي برود كدااا ،. امها طلعت و جات قالت ليها العريس جاي يبارك ليكي .. عاينا لبعض انا ومريم قلنا نطلع ..
و غاية قالت لامها لا م تخلي يجي
انا ومريم ماسكين يدين بعض عشان نطلع بس الاسم وقفنا عاينا لبعض ، انا طالعه و ماسكة مريم طالعه وراي ..
سمعت ام غاية بتقوليهو اتفضل يا عريس ، رفعت راسي لقيت #يوسف في وشي ، داخل بالجلابية .....
👣...
نحنا القدرنا علي التعب .. و لسه ماسكين الدرب ....
