بين الحب والصداقة ( مكتملة )

الفصل الرابع ... 4

نبدأ بسم الله...

إذا أغلق الشتاء أبواب بيتك ،وحاصرتك تلال الجليد من كل مكان ،فانتظر قدوم الربيع وافتح نوافذك لنسمات الهواء النقي وانظر بعيدا وسوف ترى الشمس وهي تلقي خيوطها الذهبية فوق اغصان الشجر لتصنع لك عمرا جديدا وحلما جديدا وقلبا جديدا .....

كانت ف السيارة مع زوجها ليوصلها إلى المدرسة ويذهب هو الى الشركة لوجود اجتماع مهم جدا أمره والده بحضوره وكان هو قلقا عليها من الذهاب بمفردها للمدرسة ليقول لها :

حور انتي متأكدة انك هتروحي لوحدك انا خايف عليكي والله

فأجابته بملل : دي عاشر مرة تسألني يا حازم ايوا انا كويسة وايوا هروح المدرسة ومش هاغيب عشان انت مش رايح معايا انا مش صغيرة يا حازم

فرد بقلق : والله انا خايف حد فيهم يقولك كلمة سخيفة ولا حاجة
فابتسمت بسخرية قائلة : على اساس انهم مابيقلوش وانت معايا يعني، اسكت يا حازم الله يسترك
ووصلوا الى المدرسة ونزلت حور وذهب حازم بعد أن ودعها تحت نظرات جاسر الحاقدة وعندما مرت من أمامه كان جالسا مع بعض اصدقائة فقال لهم بصوت مسموع جيدا لحور :

والله يا جماعة انا مش عارف ايه لازمة العبايات الواسعة والحجاب الطويل لما تكون اللي لابساهم خاينه وبتسوء سمعتهم ياريت تقلعهم احسن مش كدا ولا ايه

فهمهم اصحابه تاكيدا لكلامه ونظرت حور له بألم وغادرت دون أن تقول أي شئ ..

في احد عمارات مدينة الضباب لندن كان يتعالى صراخ طفلة صغيرة فصرخ والدها قائلا : بس بقا يا بنتي مش كدا ، دول كلهم شوية اكل مامتك بتعملهم

ثم نادى على والدتها يا أمنية تعالي شوفي بنتك انا زهقت والجيران اشتكوا من صوتها

فأتت والدتها قائلة : أما انت مش قادرلها عمال تقولي هاتي ليه  ، فينك يا حور كان زمانها شيلاها من غير أي شكوى وبعدين هو انت هتبقا أب كدا ببلاش

فشرد زوجها في مدللته الصغيرة وظهر على وجهه العبوس الشديد من ما مرت به حوريته كما يسميها فعلمت أمنية على الفور مايفكر به زوجها فربتت على كتفه وهي تقول :
متزعلش يا حبيبي والله ان شاء الله حور هاتبقى كويسة وحالها هيتظبط انت بس متزعلش نفسك كدا وبعدين يا سيدي مانت عندك حور صغيرة اهي ، الست ابرار مش مكفية يعني ولا ايه ؟ مش انت بتقول انها شبه حور وكمان انت كل يوم بتكلم حور تطمن عليها عايز ايه تاني بقا لو عايز تنزل يلا ننزل حالا

فرد حمدي لأ انا مش هنزل مش هقدر ابص في وشها بعد مكانت بتترجاني اقف جنبها وانا مقدرتش بسبب بابا .. يلا الله يسامحه على ال عمله فيها ده ؛ بس انا مش هقدر اسامحه

فقالت امنية : طيب خلاص انا مش هتكلم في موضوع والدك الوقت يلا بقى افرد وشك كدا ويلا اغرف الاكل