بين الحب والصداقة ( مكتملة )

الفصل .... 28

نبدأ باسم الله .....

مهما رمت الحياه أثقالها على عاتقك ، اعلم أن الله لن يكلف نفسا إلا وسعها ، فاهدأ واطمئن ......

**

جلس بذهول وهو ينظر إلى حور ووالدته بصدمة كبيرة ثم قال بتيه :

أنا ..... أنا مش مصدق نفسي ،، معقول .. معقول يا ماما الكلام ده ، انتي فعلا عندك بنت عايشة طول السنين اللي فاتت ؟!! طب ومكنتيش بتتكلمي عنها ولا بتسألي عليها لييه ؟

نورهان ببرود : وأسأل عليها ليه يا يزيد وهي قاعدة مع ابوها وعمتها ، وبعدين انا متأكدة إن عبدالله بيدلعها هو وفاطمة ، وأكيد يعني مش ناقصها حاجه خالص ، خصوصا بعد ماتجوزت جاسر فريد الجمل ، يعني بقت غنية جدا ومش محتاجه أي حاجة

نظرت لها حور بحزن وقالت : عمر ما في حد بيعوض حنان الأم يا نورهان هانم ، حتى لو كانت عمتها أو بباها زي ما قولتي ، بنتك دايما كانت حزينه ومكسورة ، نفسها تشوفك ولو مرة واحدة ، عملت كل حاجه عشان تعرف مكانك ، وبعد كدا جست نبض حضرتك عشان تشوف انتي بتفكري فيها ولا لأ ، بس للأسف اتضح انك نستيها لدرجة كبيرة ، ومش مهتمة هي عايشة ازاي ، وبعدين يا هانم داليا صغيره جدا على الجواز ، وهي اللي عرفتك أنها هتتجوز عشان تشوف ردة فعلك على الموضوع هتبقى إيه ، داليا كانت مجبورة على الجواز يا نورهان هانم ،

الشاب بغضب ( يزيد) : انتي بتقولي إيه , أخت يزيد الشماع تتجبر على الجواز ؟!! ازاي الكلام ده ، مين اللي أجبرها على كدا ؟ وازاي تتجوز وهي لسه متمتش ١٨ سنة

حور : تقدر حضرتك تقول إنها كنت بتحمي نفسها وحبها بالجوازة دي

يزيد بغضب : وضحي كلامك .. أنا عايز اعرف كل حاجه بالتفصيل

شرعت حور بسرد كل ما حدث معهم الأربعة في الفترة الأخيرة وقصت كل ما مرت به داليا بالتفصيل ولكنها تغاضت عن غرض داليا بالحمل إلى أن وصلت إلى مرض داليا فأكملت وهي تذرف دموعها :

من ساعة ما داليا عرفت الحقيقة وهي نفسيتها صعبة جدا وحاسة بالذنب تجاهنا ، ودائما بتلوم نفسها ، مع اني قولتلها إني سامحتها والله ، بس شايفة نفسها غلطت جدا في حقنا ، وحالتها صعبة خالص ، لدرجة أنها وقعت في المدرسة ، ولما كشفت ، اتضح أنها ..... انها عندها لوكيميا

يزيد بصدمة : ايه

حور : أيوة عندها لوكيميا.. هي محجوزة في المستشفى ،، بس المشكلة مش في كدا ، المشكلة إنها رافضة تتعالج نهائي ، شايفة إن ده عقاب ربنا ليها عشان ظلمتني انا وحازم ،

يزيد : إيه الكلام الفارغ ده ، لأ طبعا هتتعالج وتخف وانا متكفل بكل المصاريف بتاعة علاجها

نورها بغضب : وانت مالك انت بمصاريف علاجها ، تعالجها ليه انت ، احنا ملناش دعوة بحد ،