بين الحب والصداقة ( مكتملة )

الفصل ....40

نبدأ بسم الله

إبتسم ودع كل من حولك يبتسم لأجلك، إبتسم فأن في الابتسامة راحة وصحة، ابتسم ودع الحياة تشرق لك بألوانها الزاهية، إبتسم ودع الفرح ينعش روحك، إبتسم وتوكل على الله وتفائل، ابتسم وتذكر إن بعد العسر يسرا.

‹‹‹‹‹‹‹«

كانت جالسة في غرفتها شاردة في صديقتها الراحلة فابتسمت بحب عندما تذكرتها وهي تقول

همس : عارفة يا حور لما يوسف اخوكي فضل يقولك ازاي تصاحبي واحدة زيي حسيت أنه عصبي قوي وبصراحة من الأول هو مكنش بيتعامل معايا كويس ، كنت حساه كارهني أوي ، بس بعدين فهمت أنه غيران على دينه ، بصراحة أنا دلوقتي كمسلمة وبعد اللي عرفته عن الإسلام ، انا مش موافقة نهائي على هزاري مع الشباب ، ومحبش اشوف المنظر ده قدامي ، بس لما اتكلم عن حتة المحرم دي كنت متعصبة أوي ، يعني ايه البنت تتقيد حريتها لمجرد انها بنت ومينفعش تسافر من غير راجل معاها ، بس بعدين فهمت ان ده حماية للمرأة وتعظيم ليها في الاسلام البنت تسافر بمحرم بس عشان يحافظ عليها ويصونها ، وكمان حتة الحجاب والنقاب دي؛ ايه ده ليه البنت متعيش حياتها وتلبس اللي هي عايزاه ، ليه تقيدوها بالحجاب اللي بيخنقها ده ؟! ولا المنتقبات يا نهاري !!! ازاي بيستحملوا الكمامة دي ؟ ازاي يفضلوا لابسينه كدا
لكن لما أسلمت وعرفت فضل الاحتشام وأن البنت مش عرضة للي رايح واللي جاي بل بالعكس هي جوهرة جميلة لازم الاب يحافظ عليها ويخبيها كويس لحد ما تروح عند اللي هيصونها ويحميها ، حبيت الاحتشام ده جدا ، عارفة حاسة اني ملكة متوجة بنقابي ده ، ماشية بثقة في أي مكان ورافعة راسي لفوق أوي ، بقول للكل من غير ماتكلم أنا مسلمة
ونظرت لحور مبتسمة بعد أن كانت تتحدث بحب وفخر قائلة : تعرفي يا حور اني كل يوم وانا ساجدة بفضل ادعيلك واحمد ربي انه وضعك في طريقي عشان تبقي منقذتي من العذاب اللي كنت هشوفه لو فضلت غير مسلمة ، بجد انتي اخت بالنسبة ليا وياريت متنسنيش

حور بحب : ايه اللي انتي بتقوليه ده يا همس ، أكيد طبعا مش هنساكي خالص ؛ وإن شاء الله هتخفي وتفضلي معايا على طول ؛ ده انتي اختي يا بنتي ؛ بس انا زعلانة منك عشان لبستي النقاب قبلي يا همس

همس : وانا مالي ياختي الاستاذ جاسر قالك متلبسيش النقاب غير بعد الجواز ، وانا بقى بصراحة مش ضامنة اني اعيش ؛ وبعدين كفاية أوي الذنوب اللي عملتها ، المهم ... مبروك يا رورو من دلوقتي على جوازك ، عشان يمكن يوميها مكنش موجودة

دمعت حور قائلة : بعد الشر يا زفتة متقوليش كدا

همس بضحكة : انتي بتفولي عليا ليه بس، إن شاء الله هيكون خير وهدخل الجنة من غير حساب ولا سابقة عذاب ، وساعتها هفضل ادعي ربي انك تدخلي معايا