بين الحب والصداقة ( مكتملة )

الفصل ... 22

نبدأ باسم الله ....

ليس من الضروري أن تجعل لنفسك مكان في كل قلب ؛ فبعض القلوب ضيقة ، حاول فقط زرع احترام ذاتك في نفوسهم .. فهذا يكفي لاستمرار العلاقات .......

..

أغمض عيونه بقوة يمنع دمعة من أن تنزل من بين جفونه على حال صديقة ومظهره وهو يبكي بعد أن سمعه وهو يحادث حور التي كما اعتقدا نائمة ، نظر له صديقه وهو خارج من الغرفة يبحث عن ذاته في عيونه ويستمد ثقته بنفسه منها وحازم لم يبخل على صديقه أبدا ، بل أمسك يده بقوة واحتواه بنظراته فقال جاسر بصوت مكسور :

هقدر ارجعها ليا يا حازم مش كدا

قال حازم بعد تنهيده قوية : إن شاء الله يا صاحبي ،، إن شاء الله ،، تعالى بقى عشان اشوف فيك ايه ، وإيه اللي تاعبك أوي كدا ومخليك اصفر كدا

جاسر : اللي تاعبني هو اللي حاصل ده ،، اللي تاعبني ظلمي ليك وإهانتي ليك ، تعرف يا حازم ، يوسف هزأني لما عرف اللي عملته معاك انت وحور ، خصوصا اللي عملته مع حور ، وقالي انه لو كان قريبها مكنش رحمني خالص ، وعمره مكان هيخليني اتجوزها ، ولا أقرب منها نهائي ، ولو كان مكانك كان كمل جوازه منها ، لإني مستاهلش واحدة زيها ، وزعل جدا من شكي فيك ، قالي كلام وجعني أوي يا حازم ، قالي اني اناني ، مبفكرش غير في نفسي ، قالي اني مستاهلش حد فيكم يسامحني ، قالي لو انا مكان حازم ، عمري مكنت كلمتك تاني بعد مهنتني في بيتك ، ولا حاولت ولا مرة بعدها اني اعرفك الحقيقة ، ... حازم والله العظيم أنا لسه مش مصدق ولا عارف انا عملت كدا ازاي ، أنا بجد اسف

حازم : جاسر خلاص بقى ،، ممكن لو سمحت متتكلمش في الموضوع ده تاني ، انت عارف يوسف ، قلبه بقى قاسي شوية بعد ما سافر وسابنا ، بس صدقني هو لو مكاني كان هيعمل زيي كدا وهيحاول تاني وتالت انه يعرفك الحقيقة ،
اللي بينا يا جاسر مش معرفة يوم ولا زمالة دراسة في مدرسة ، اللي بينا أخوة وصداقة ، اللي بينا عشرة سنين كنا طول الوقت فيها مع بعض ، مقدرش اخسرك بسبب واحدة أو اخونك عشانها ، مش بعد كل ده يا جاسر واحدة ست تفرقنا عن بعض وتكسر رابط الأخوة اللي بينا ، حتى لو كانت الست دي هي حور ، يا جاسر انا لو حتى حبيت حور ، عمري مكنت هتجوزها واكسرك ، صدقني في اللحظة اللي كنت هعرف نفسي بحبها فيها كنت هتجنبها جدا وهبعد عن أي مكان تكون موجودة فيه ،، لمجرد اني ممكن اخونك بنظرة ليها أو بدقة قلب ،،

سيبك بقى من كل ده ، يوسف زي مقولتلك قلبه جمد علينا بعد مسافر ، علاقته بيا مش زي علاقتي بيك ، انا وانت اقرب لبعض منه جدا ، هو سابنا وسافر ، لكن احنا كملنا مع بعض ،،
سيبك بقى من كل الكلام ده ، وانسى الحوار اللي فات ده كله ، مش عايز اشوف نظرة الحزن والكسرة دي في عينك تاني ، متفكرش في أي ، تخيل انه كان كابوس وخلص ،، سيبك بقى يا صاحبي

بعد أن انهى حازم كلامه احتضنه جاسر بشدة ونزلت دموعه ، فجففها حازم وأخذه للطبيب ليفحصه ...