نبدأ باسم الله ...
يخلق الله من ظلمة آلليل نُور ، كمآ يخلق من عسُر آلضيق فرجْ ، فليسْ بعآجز آيضاً ان ينبت لك من قآع حزنك فرح
★**********★
دلف جاسر إلى منزل والديه كما عادته يوميا حتى يرى والديه ويطمئن عليهما فوجد مروة أخته موجودة بالمنزل وتجلس مع الجميع عدا والده الذي مازال بالخارج فابتسم قائلا بمرح
وانا بقول البيت منور كدا ليه ؛ اتاري روما القمر عندنا يا مرحبا يا مرحبا
قال معاذ بمشاكسة : نوري غطا ع الكهربا
جاسر : اخرس يا حيوان
ثم احتضن مروة التي قالت بعتاب : قولنا الباشا مش بيسأل فنسأل احنا بقى
قبل رأسها قائلا والله يا حبيبتي مشغول جدا في الشركة والكلية ، عشان كدا مش فاضي اهرش والله ،
وبعدين انا بكلمك كل يوم في التليفون
معاذ بمشاكسة : اه يقصد يقولك مش كفاية بكلمك في التليفون ، هتبقى طماعة بقى وتطلبي اجيلك كمان
ضربه جاسر على رأسه وهو يتجه إلى الأريكة بجوار مرام ومليكة بعد أن قبل رأس والدته كعادته وقال بغيظ : قولت اخرس
وضم الفتاتين له بقوة قائلا : حبايب قلبي عاملين ايه
مليكة : كويسة يا جيبس جيبتلي اللي قولتلك عليه امبارح ؟
أخرج جاسر مفاتيح سيارته قائلا : خدي المفاتيح اهي ، روحي انتي وميرو حبيبتي هتلاقي نتويلات ودري ميلك كتير عيشو بقى
قبلته الفتاتان بقوة وانطلقتا للخارج بفرحة كبيرة فقال معاذ : وبالنسبة ليا انا ايه ، مفيش حاجه خالص
جاسر : انت ايه يا شحط انت عايز شيكولاته انت كمان ! ده انت عندك ١٣ سنة
معاذ : ايه يعني محسسني اني عجزت ولا حاجه فيها ايه يعني !
مصطفى : انت يابني مش بتشبع ! هو مش لسه مفسحك امبارح يا شحط وطلبت مني الفيديو جيم وانا جيبهولك من يومين
مروة بعتاب لمعاذ : شكل قعدته عندكم جاية عليكم بخسارة ؛ انت هتروح معانا يا استاذ كفاية بقالك ييجي شهر قاعد هنا
معاذ : ومش راجع تاني ، انا هنا باخد بالي من تيتة ومليكة ؛ اااا وجدي وجدي
مصطفى بغضب : مليكة !! انت مالك بمليكة يا زفت انت ، بتعمل ايه من ورايا ؟ مش قولتلك ملكش دعوة بيها
أنت تقرأ
بين الحب والصداقة ( مكتملة )
General Fiction(توقعنا أن الصداقة والحب رابط مقدس لنا فهل سنظل هكذا ؟ أم لحياتنا والقدر رأي آخر فيهما ......؟؟؟) الرواية بتتكلم عن كذا سن عمري للأبطال .. مش فترة واحدة من العمر 🥰🥰
