بين الحب والصداقة ( مكتملة )

الفصل .... 10

نبدأ بسم لله

❥ ˓٭˛

لا تبحَث عن كتفِ هذا وظهرِ ذاكـ.. !
-كُنْ سنداً لرُوحكـِ ،اتّكئ عَلى بعْضكَـ وقُم ..

******

كانت تضع ملابسها هي وأولادها في الحقيبة حتى تذهب الى منزل والديها حيث انها لم تذهب منذ فترة طويلة ، ولكنها انتفضت عندما وجدت يد زوجها تحاصرها من الخلف وهو يستنشق عبيرها
ويقول بتنهيدة : مصممة بردو تروحي هناك اسبوع وتبعدي عني يا مروة

فالتفتت اليه ووضعت يديها على كتفيه وهي تقول
له :
انت عارف يا حبيبي انها صعبة عليا انا كمان بس انا بقالي فترة طويلة مروحتش ازور اهلي وانت مشغول طول الوقت وكمان اليومين دول احيانا بتبات بره بسبب الشغل فانا قولت بقى اني اروح عند بابا الفترة دي ، على الاقل اشوفهم عاملين ايه وجاسر عامل ايه مع مراته

فتأفف وهو يقول بانزعاج : بس بردو اسبوع كتير اوي على فكرة ، وبعدين انتي مالك ومال جاسر ومراته سيبيهم في حالهم متدخليش بينهم يا حبيبتي ممكن ؟

فقالت له مروة بحزن : حاضر ، بس والله يا مصعب انا قلقانة عليه اوي ، بقاله فترة طويلة مش بيضحك ولا بيهزر زي عادته
وأكملت بعد تنهيدة حارة : يلا منهم لله بقى اللي كانو السبب

قال مصعب بجدية : مروة لو سمحتي مش عايزين نجيب سيرة حد محدش عارف الحقيقة ايه يمكن لو عرفتي الحقيقة تقولي عنها مظلومة متظنيش السوء يا حبيبتي

فألقت مروة نفسها في احضانه وهي تقول له : انا اسفة يا حبيبي انا مش بكره حور ولا حازم ، انا بس مش عارفة ايه اللي حصل وكمان زعلانة على جاسر اوي

فربت مصعب على ظهرها وهو يقول بلطف : بردو متعرفيش السبب اللي وصلهم لكدا وكمان متدخليش في اللي ملكيش فيه

فأومأت له برأسها وهي مازالت على وضعيتها ولكن قطع عليهم تلك اللحظات صوت الطفل الذي يبلغ من العمر عشر سنوات وهو يقول بسخرية : مش كنت قفلت الباب عشان محدش يقاطعك يا دكتور ، افرض بقى بنتك الصغيرة دخلت الوقت وشافت المنظر ده هيكون شكلك قدامها ايه؟ وايه هتكون ردة فعلها ؟ تؤ تؤ تؤ انت بتعلمها ايه بس يا دكتور

فأجابه مصعب بغيظ بعد ان ابتعدت عنه مروته : انت يا حيوان انت ايه اللي جابك ثم انك ازاي تدخل الاوضة بالشكل ده من غير متستأذن وبعدين انت مالك اصلا انا فاتح الباب ولا قافله
فنظر الصغير لمروة بحزن مصتنع وهو يقول : شايفه يا ماما جوزك بيكلمني ازاي ينفع كدا يعني ؟ ولا كأني ابنه ، تحسي انه لقاني على باب كنيسة مش جامع لانه لو كان لقاني على باب جامع كان عاملني احسن من كدا .
كاد مصعب ان يرد عليه ولكن مروة اوقفته وهي تقول : خلاص بقى يا مصعب معلش وانت يا معاذ متتكلمش بالاسلوب ده تاني مع بباك عيب كدا وبعدين مقولتليش جيت هنا ليه كنت عايز ايه
فقال معاذ : ابدا يا ماما كنت جاي اقولك ان انا ومرام جاهزين عشان نروح عند بيت جدو
فقالت له مروة : خلاص يا حبيبي نزلو حاجتكم تحت وانا هجيب الحاجة مع بابا ونلحقكم عشان بابا يوصلنا على طول ......