بين الحب والصداقة ( مكتملة )

الفصل ...26

نبدأ باسم الله...

.....

‏أنت لا تدرك كم تحمل شخصيتك من صفات غاية في الروعة، لا تدع ما مررت به من ظروف صعبة تطمسها، كن كما أنت، وحافظ على جمال روحك.
‏⁧ ⁩

------

حتى انا يا داليا ؟؟

نطقت بها فاطمة ودموعها تنهمر بشدة بعدما استمعت لها وهي تروي ما حدث معها

نظر لها الجميع بتفاجئ عدا جاسر الذي كان على علم بوجودها حيث كان قد هاتفها بعد أن خرجوا من غرفة الطبيب حتى تكون بجانبها

أكملت فاطمة بدموع : حتى أنا بكرهك ؟؟

ده انا بحبك أكتر من نفسي يا داليا ، بحبك لدرجة انتي نفسك متتخيليهاش ، جاية بعد كل ده تقولي ملكيش حد ؟؟ ده انتي حتى طول كلامك مجيبتيش سيرتي ، للدرجة دي يا داليا ؟!! بعد ما عملت المستحيل عشان احسسك بحبي ليكي تيجي تقولي ملكيش حد !! طب وانا ؟ أنا يا داليا ايه في حياتك ؟ ردي عليا انا ايه ؟؟

صمتت قليلا ثم قالت بذهول : ده انا ضحيت بكل حاجة عشانك ، حبيتك اكتر من نفسي ، ضحيت بحياتي وشهادتي وشبابي و...

قاطعتها داليا : حبك ..

نظر الكل لداليا فأكملت وهي ترى الصدمة على وجه عمتها :

إيه يا عمتو متكملي ؛ قولي انك ضحيتي بحبك ، قولي اني كنت السبب الرئيسي في تعاستك ، قولي إن بسببي انا انتي عايشة تعيسة قولي يا عمتو قوليي متخفيش .

حور بهدوء : داليا عشان خاطري اهدي شوية عشان متتعبيش ، لازم تريحي جسمك شوية ، وبعدين نتكلم في كل اللي انتي عايزاه ، ونقول كل حاجة

نظرت لها داليا بضعف وقالت : انا تعبانة اوي يا حور ، انا حاسة إني مليش لازمة في الدنيا دي ، كل اللي بيقرب مني بيتأذي ،

قوليلي يا حور هو انا وحشة أوي كدا ؟ وحشة لدرجة ان أمي تفضل تمنتاشر سنه متسألش عليا خالص ؟؟
تعرفي يا حور اني وصلتلها ان بنتها اتجوزت وهي في السن ده عشان تسأل عليا برنة تليفون حتى ؟ بس للأسف معملتهاش ، مفرقش معاها خالص ، مسألتش عليا يا حور

فاطمة باندفاع : لأ سألت
ثم صمتت مرة أخرى بندم عضت على لسانها وهي تنظر للجميع وهي يترقبون التكملة
ولاحظت داليا ندمها على اندفاعها فقالت بتهكم :

كملي يا عمتي كملي ، مبقاش يفرق معايا حاجة خلاص ، قولي قولي متقلقيش

فاطمة بتردد : نورهان رنت من فترة على عبدالله ولما رد وعرف انها هي كنسل في وشها ، فضلت ترن بعدها تاني لحد مارد عليها ...

فلاش باك ...

أجاب ببرود : سلام عليكم ، خير

فأتاه الرد على هيئة صريخ وهي تقول له : عايزة اكلم بنتي يا   عبدالله ازاي تجوزها من ورايا ؟ وازاي أصلا تجوزها في سن زي ده ها ؟