بين الحب والصداقة ( مكتملة )

الفصل ..... 41

نبدأ بسم الله

لكل بداية جديدة نوع من الإقبال ، وإذا كان لديك أمل في شيء ستجتازه بسعيك وتتفوق فيه ؛
.. فبشجاعتك والآمال التي بداخلك يساعدك ربك ويجعل بداياتك مشرقة

★***★***★***★

جلست حنان وداليا وسارة مع حور بسعادة في منزلها الجديد بعد أن أتت من شهر عسلها وقالت سارة بمشاكسة : ايه رورو مالك ؟! هو أول يوم شغل بعد شهر العسل بيبقى صعب انا عارفة ؛ بس معلش يا قمر ، كلنا لها

داليا بعبوس : اه والله يا بت يا سارة ، بيبقى يوم وحش أوي ، يعني مثلا أول يوم ده فضلت اعيط رغم أنه قالي إنه هييجي ع الساعة واحدة الضهر ، بس انا كنت كل نص ساعة أكلمه نص ساعة ، لحد مجاسر دخل عليه مكتبه وفضل يزعق لينا احنا الاتنين ، قاله مش كفاية قاعد معاها شهر بحاله ، كمان جاي تاخد نص يوم ومش مركز فيه ،، اعمل فيكم ايه بس ،

وزعق لي أنا كمان وأخد تليفون حازم وقالي اسمع نغمة التليفون والاقي رقمك ساعتها اقسم بالله مهتشوفي حازم غير على الفجر

ثم نظرت لهم قائلة بنفس العبوس : طول عمره قاسي جاسر ده

ردت حور بابتسامة : لأ يا دوللي جاسر مش قاسي ، جاسر حنين جدا والله ، وبيحبك انتي وحازم جدا ، عارفة لما جيتي انتي وحازم يوم الصباحيه الصبح كدا كان متغاظ جدا بس ساعتها أصلا كان قالي واحنا بنصلي الفجر إن حازم مش هيعديها ويردلنا نزولكم من البيت يوم صباحيتكم بسببي قالي مش بعيد نلاقيه هنا على سبعة الصبح ، وفعلا الساعة سبعة بالدقيقة كنتو بتخبطوا على الباب ساعتها كان عايز يولع فيكم وفيا معاكم

ضحكت الفتيات وقالت داليا بضحك : أصل حازم قالي دول مسافرين الساعة واحدة السعودية عشان العمرة ، وهينزلوا من البيت على عشرة ونص حداشر ، تعالي نروح بقى من سته نرخم عليهم وفضلت اهدي فيه لكن مرضيش ، ده أتنازل عن الساعة دي بالعافية والله

فضحكت الفتيات مرة أخرى وقالت حنان : لأ كتر خيره فعلا ، جه على نفسه كتير

فقالت سارة وهي تنهض بتعب بعد أن رن هاتفها : سوري يا بنات بس انا هنزل بقى عشان معاد الدكتورة وأحمد مستني تحت ، باي يا رورو ومليون مبارك يا قلبي

فضمتها حور قائلة : ابقي طمنيني عليكي يا حبيبتي

سارة : إن شاء الله ، يلا سلام بقى

وذهبت سارة وعادت حور إليهم بعد أن رافقتها إلى باب المنزل وجلست بجوار داليا قائلة : ها يا دولي عاملة ايه في الحمل

داليا وهي تربت على جنينها بحنان فطري : والله تعبانة يا حور ومش ببطل أكل ؛ الأستاذ مش بيهدى خالص وحازم قرب يطفش من البيت والله