بين الحب والصداقة ( مكتملة )

الفصل .... 46

نبدأ بسم الله ..

‏‏يأتيك الفرجُ فجأة ' كما أتاك الإبتلاء بغتة ' قُل لمَن يحمل هماً ' أنّ همَّك لن يدوم ' وقلبك لن يكون بالحزن مكلوم ' وعقلك لن تملئه الهموم ' فالله من يفرج الهموم ' فهو القادر على أن يجعلك عظيما ، أو يجعلك مذموم

••••••••

  فتح باب مكتب جاسر ودلف حازم الذي نظر لصديقه الذي كان منكب على عمله كما هي عادته منذ أن تركته حور فهو يفرغ كل طاقته في شغله وفي الغالب يظل أكثر من يومين في المكتب دون نوم أو أكل فقط يشرب قهوته حزن كثيرا عليه وخصوصاً أنه لم ينتبه لدخوله من الأساس وظل يعمل على الملف الموجود أمامه بكل اهتمام .. فتنحنح حازم بصوت مرتفع حتى يلفت انتباه جاسر وبالفعل نظر له وتبتسم ابتسامه باهتة مردفا : تعالى يا حازم .. في حاجة ؟!

حازم بضيق : قول مفيش حاجه !! بقالك تلت ايام دلوقتي مروحتش .. ومش بتاكل كمان .. وبعدين معاك يا جاسر

جاسر بوجع : يعني هعمل ايه يعني يا حازم غير اني اشغل وقتي في الشغل ... حور وسابتني بقالها سبع شهور آل ايه بتعاقبني ... عمري ما تخيلت أنها هتقدر تقسى عليا بالشكل ده ... بس برجع واقول أنا كمان قسيت عليها .. بتقولي في ظروف هي اللي منعتها ترجع .. طب تقولي على مكانها وانا اقسم بالله هروحلها في ثانية .. جايز يكون حملها ضعيف. . ولا لسه مخلصتش علاجها النفسي .. مش عارف ..بس كدا كتير أوي وانا تعبت اقسم بالله

ربت حازم على كتف صديقه وقال : اجمد يا جاسر .. انت قولتها بنفسك .. دي كل مرة بتقولك الدكتورة قالت لها إيه بالظبط وصور الإيكو اللي بتبعتها انت بتعرضها على دكتور كبير وهو أكد أنها محتاجة راحة ... يعني السفر غلط عليها ..

جاسر بقهر : يعني ايه ! يعني هتولد وانا بعيد عنها ولا إيه ؟! انا مقولتش تسافر وتتعب انا قولت تعرفني مكانها ولو كانت في اخر الدنيا والله مش هتأخر عليها ... بس اعرف هي فين .. حاولت كتير اوصلها لكن هي بتمحي أي دليل ممكن يعرفنا مكانها ..مش عارف هي بتعمل كدا ليه بس

حازم بمؤازرة : معلش يا صاحبي .. أن شاء الله خير .. صدقني انا حاسس انها عايزة ترجع لوحدها زي ما سافرت لوحدها و....

قاطعهما فتح باب المكتب ودلوف السكرتير اسلام صارخا : مصيبة ... مصيبة

انتفض حازم وجاسر وقال حازم بفزع : مهو لازم تبقى مصيبة بشكلك ده ... ايه هو احنا شغالين مهربين سلاح وهيروين والصفقة اتقفشت في المينا ولا إيه .. ايه دخلة أمن الدولة دي يا اسلام في ايه

اسلام وصوته مازال عاليا : في مشكلة كبيرة حصلت في الفرع اللي في المانيا وشكله هيتقفل .. باعتين يقولوا عايزين حد منكم في أسرع وقت