بين الحب والصداقة ( مكتملة )

الفصل ... 25

نبدأ باسم الله .....

‏الأيام الصعبة لن تدوم طويلاً، تمضي ثقيلة نحو انفراج، اصبر وترقب.....

.............

‏⁧
نظر الطبيب لهم قليلا ثم قال بأسف :

للأسف شكي طلع في محله ، المريضة عندها كانسر في الدم

ذهلو جميعا واتسعت عيونهم وارتخى حازم على الجدار خلفه حيث كان واقفا وقالت حور بصدمة

إيه ؟؟؟

الطبيب : لو كيميا ،، المريضة عندها لوكيميا ........

حازم بتيه : مستحيل ...... مستحيل

ونظر للطبيب بعيون مرعبة ثم ذهب له وأمسكه من زيه الطبي وهو يقول بغضب :

انت كداب ، انت كداب ، داليا كويسة ، مفيهاش حاجة ، انت كداب

ثم ترك الطبيب وقال بذهول : مستحيل ده يحصل ، مستحيل داليا تسيبني ، انت ... انت أكيد بتهزر صح ؟ ونظر لجاسر الذي كان قد توجه له ويربت على كتفه وقال : أكييد اكيد بيهزر انا عارف بيهزر

وأكمل بصراخ وهو يتجه ناحية حور التي كانت تبكي بشدة : انتي بتعيطي لييه ؟ بقولك بيهزر ، داليا كويسة يا حور صدقيني ، داليا مفيهاش حاجة ، متعيطيش يا حور

وجلس على ركبتيه أمامها فضمته حور لها وهي تبكي فبكى هو الاخر وهو يتشبث في ذراعها وهو يقول بانهيار : داليا يا حور .. داليا بتعاقبني عشان مسامحتهاش ، بتعاقبني بس عقابها قاسي أوي يا حور ، عايزة تسيبني خالص ، بتتخلى عني

ضمته حور أكثر حتى يهدأ انفعاله وقالت له بعد قليل وهي ممسكه بوجهه حتى تشد انتباهه :

حازم .. حازم ركز معايا ، داليا ان شاء الله هتبقى كويسة ، صدقني ، والله ان شاء الله هتبقى كويسة

حازم بأمل : مش كده ؟ انا انا بردو بقول كدا ، هتبقى كويسة ، بس انا عايز اقولك حاجة يا حور

وأكمل بغضب : داليا دي متخلفة وغبية ، بتنتقم مني عشان مسامحتهاش بطريقة قاسية وصعبة أوي ، بس بس انا عارف ، انا عارف انها هتبقى كويسة عشانك

وبالخلف كان يقف أحدهم وهو يكاد يحرقهم بنيران غيرته والتي تتصاعد مع كل لمسه
ولكنه نفض عنه تلك الغيرة وحاول الهدوء وذهب إلى صديقه وهو يقول بضيق :

اهدى يا حازم وقوم كدا عشان نفهم الحالة من الدكتور عشان نلحق نتصرف ، وبطل شغل العيال ده

نظر حازم لجاسر بكره وقال له : عيال ! شغل عيال مش كده ، ولو حور مكان داليا دلوقتي كان هيفضل بردو شغل عيال ؟
أنا بتكلم معاك ليه ؟ أصلا انت السبب في اللي داليا فيه دلوقتي ، انت اللي مكنتش بتهتم بيها ولا بأكلها ، أنا مستحيل اسامحك ، مستحيل ،