المصارعة المراهقة _قلوب أرهقها العشق_

part 54

عشق نوضات جدها او باستو فوق راسو

عشق : كانواعدك كولشي غايرجع كيما كان واخة يكون الثمن حياتي غاترجع كيما كنتي

رجع شفيق و باقي العائلة

شفيق : خاص من دابة نقلبو على شي دار نمشيوا ليها

عشق : ماغانتحركوش من هنا

مجدة : آش هاد الحالة لي حنا فيها خسرنا كولشي كاع الديور ديالنا و فلوسنا و كولشي مابقيتش فاهمة والو شكون السباب فهادشي

عشق : ماتقطعوش املكم بالله هو لي رزقنا فاللول او هو لي غايعاود ايرزقنا

عايدة : بصح ابنتي الفلوس ماشي هوما كولشي كاين ما أهم منهم كاين دفء العائلة المهم نبقاوا مجموعين

غزل : هادشي مايمكنش أنا و زيد راه غانرجعوا و تا غسان خاصو ايرجع و مجدة تا هي خاص تمشي معاه

ايلين : تا أنا خاصني نمشي انا و ماما

عشق : ( ضحكات ) دابة وليتوا كلكم باغيين تمشيوا ( شافت فإيلين ) ايلين شحال فالكونط ديالكي ديال الفلوس 10 دالمليون 50 مليون 100 مليون آا باينة بززاف و ماقدرتي تا تساعدي عائلتك و لو بشوية دلفلوس قاتلكم غا الطمع

ايلين : عشق ماتهضريش معايا بهاد الطريقة أنا راه ماعندي تا حاجة كنت متكية على جدي و فلوسي لي كانربحها كنت كانخسرها ( قربات عندها ) واش يسحاب ليك بلي أنا هي ايلين القديمة بالعكس تبدلت حليت عينيا وعيت بآش واقع

عشق : ( شافت فعينيها الصدق ) حياتكي هاديك ولكن الواجب ديالكي كوحدة من العائلة هو توقفي بالجانب ديالنا

ربيعة : واش بغيتينا نبقاوا نسمعوا فهاد الاهانات ولا شنو ماشي تا لآخر أيامنا نبقاوا نتذلوا واخة نسكنوا غا فبراكة ومانطيحوش كرامتنا للأرض

عشق : هادا راه حقنا حقنا لي نصبوا علينا فيه

جات بغات تمشي و شد ليها جدها فإيدها كايحاول ايهضر

عشق :( شدات فإيدو ) جدي هضر آش بغيتي تقول

الجد :( كايحاول ) آع آع قببل ليي ععااففااك أ ببننت يي

عشق :( نزلات عليها هضرتو بحال السم ) كيفاش أجدي واش باغيني نضحي براسي براسي أجدي مايمكنش مايمكنش

الجد : ععللى قبلل نناا

عشق :( حيدات ايديه من فوق ايديها ) مانقدرش

طلعات فدروج او تفكرات فاش كانت غاطيح و قيس شدها وقفات و ضورات راسها فالقصر كل شبر كايفكرها بيه كايفكرها بالذكريات او بالضحكة ديالو و بالتقليلقة ديالو اي حاجة فهاد القصر كاتجيب ليها الحنين لقيس أحسن حاجة هي تخوي هاد البلاصة ولكن مايمكنش تخليه ايربح هو تحداها و خذى كاع داك شي لي كاتملكوا عائلتخا و مقابل هاد شي بغى حياتها اصلا هي مابقاتش عندها حياة