بعد مرور 4 سنوات ونصف اليوم كان تخرج رنيم وسفيان.. كانت عائلتها حاضرة وهما مفتاخرين بها... قدمليها العميد شهادتها وهو مبتاسم العميد: مبروك عليك ابنتي رنيم: شكرا ا استاذ العميد: (ضربها لراسها) شنو قلتليك انا عمك اوكي رنيم: (بخجل) واخة اعمي سفيان: شفتكم كتهضرو بزاف انا متعطنيش شهادتي العميد: ههههه مغاديش تبدل.. هاك اسيدي مبروك عليك سفيان: الله يبارك فيك.... هبطات رنيم عند والديها بابا: (باس راسها) مبروك عليك ابنتي رنيم: الله يبارك فيك ابابا ماما: (عنقاتها) مبروك عليك ابنتي فرحتيني رنيم: الله يبارك فيك ماماتي... جات تسنيم وشادي عنقوها وباركوليها... وهو يجي سفيان لعندهم سفيان: سلام عمي بابا: (باستغراب) سلام سفيان: بغيت نبارك ليك نجاح بنتك رنيم بابا: شكرا منين كتعرفها رنيم: احم راه كيقرا معايا ابابا وهو ولد العميد ديالنا بابا: اوكي مبروك عليك حتا نتا سفيان: الله يبارك فيك بغيت ناخذ اذنك بابا: فاش سفيان: نخرج انا ورنيم هاد العشية بابا: (هز حاجب) كيفااش... رنيم طرطقات فيه عينيها سفيان: لا متفهمنيش غلاط اعمي.. انا قصدت هاد العشية غادي نحتافلو انا وياها وصحابنا لي معانا.... دار باباها شاف فيها وهي واقفة كترمش بعينيها بابا: واخة مي متفوتش 9 دالليل سفيان: اكييد انا غنجيبها حتى للدار متخافش اعمي بابا: (جرها لعندو وهضر فودنيها) حضي راسك وياويلك تعطلي صباحك ميطلع رنيم: (سرطات ريقها) واخة ابابا... تسنيم بقات كضحك عليها وهي تقرسها... مال مك نتي كضحكي تسنيم: غير على الجرة لي دارليك بابا رنيم: هاحنا غنشوفو بابا اش غيديرليك غذا فاش يشوف النقط تسنيم: (جمعات الضحكة) بلا ماتفكريني عفاك شادي: اش هادشي دبا نتي غتخرجي وترجعي معطلة دوزي قدامي للدار رنيم: (شداتو من ودنو) عاود اش قلتي البرهوش شادي: هداي اشمن برهوش راه عندي 16 العام رنيم: وانا 23 يعني كبيرة عليك ب7 سنين ونوض سير مع بابا قبل مانخلطك هنا...... مشاو من بعد ماخدات تسنيم ديبلوم ديالها للدار سفيان: (جرها من يديها) ياله زيدي رنيم: طلق الباسل شحال من مرة كنقوليك متقيسنيش سفيان: (باسليها يديها) هانا بستها ياله طرطقي... بقا شاد فيها وهي كتحاول تحيدها ووالو حتى وصلها للطموبيل... ياله طلعي رنيم: لا مغنركبش معاك سفيان: (شدها من حوايجها حتى تحشا عنقها فوسط الحوايج) طلعي راني خديت الاذن من باباك ياله تحركي... طلعات وهي كتنكر سد الباب ومشا ركب وهو كيضحك رنيم: فين كاينة هاد الحفلة سفيان: فدارنا رنيم: كيفااااااش سفيان: سكتي صمكتيلي الودن مااالك رنيم: كيفاش غادي تديني للدار وتعطيني عصير فيه فنيد دالنعاس ونفيق حالتي حالة وتجري عليا ونمشي عند بابا ويضربني حتى نموت هو يمشي الحبس وانا نمشي القبر ونتا تكمل حياتك عادي سفيان: (طرطق عينيه) اش هاد الفيلم.. ديك القراية لي كتقراي راه خرجاتليك على العقل
