مرت الايام ورنيم كتعلم الطياب... الاب ديالها مكيهضرش معاها وهي حسات بيه بلي معصب حتى لهاد النهار كانت كطيب الغذاء دايرة الطاجين... وجمعات الكوزينة وهو يدخل عندها باباها وفيديه كتوبا بابا: رنيم رنيم: نعام ابابا بابا: هاكي هاد الكتوبة خدمي فيهم... مسحات يديها وخداتهم من عندو قراتهم وهي تشوف فيه باستغراب رنيم: هادو ديال TOFFEL (امتحان ديال اللغة الانجليزية) بابا: اه الشهر الجاي عندك امتحان راني قيدتك وخلصت رنيم: وعلاش غادي ندوزو بابا: غير قراي دبا وشديه عاد نهضرو من بعد اوكي رنيم: (بعدم فهم) اوكي......... دوزات رنيم شهر كتبريباري فدوك الكتوبا وكل ليلة طيب العشا... تعلمات طيب وماكلتها لذيذة... دوزات هاد النهار الامتحان كان باباها وصلها ورجعها..... دازو ايام حتى دخل الاب عيان ماما: مالك بنتيلي عيان بابا: افف طاكسيات بالسيف باش شديت واحد رنيم: (باستغراب) علاش ركبتي ابابا فالطاكسي واش الطموبيل خسرات بابا: لا بعتها رنيم: هي باغي تشري شي وحدة اخرى بابا: لا غذا انمشيو انا وياك بغيت نحطليك هاد الفلوس فالكونط ديالك رنيم: (تصدمات) علاش بابا: هكاك وصافي ياله نوضي حطيلينا نتعشاو راه فيا الجوع..... كان الاب ديجا باع واحد الارض جمع دوك الفلوس ومشاو حلو كونط بسمية رنيم وحطليها الفلوس... مشاو لواحد القهوة جلسو فيها بابا: دبا غادي نشرحليك كلشي رنيم: (بحماس) واخة بابا: تقريبا شهراين هادي تلاقيت بصديق ليا وعاودتليه عليك ونصحني بأنني نصيفطك تقراي فكندا وحتى انا عجباتني الفكرة.. مشيت قلبت شوية فالانترنيت والفكرة دخلاتلي لراسي... تما فاش رجعت ولقيت العائلة عندنا #فلاش_باك حمزة: اه اعمي مي الشرع عطانا ربعة بابا: اييه عندك الحق.. طلعو لبيتكم... طلعات رنيم وتسنيم للبيت وهو يدور شاف فيه بابا: شناهما أركان الاسلام حمزة: الصمت بابا: سؤال بسيط معارفش الجواب ديالو زيد عليها معمري شفتك كتصلي ولا حاط جبهتك فوق الصلاية... هادشي لي عارف فالاسلام الشرع عطاك ربعة.. محشمتيش هاهيا مراتك حداك وراك اب دبا.. معندك حتى سبب لي يخليك تفكر تزوج مرة اخرى حمزة: انا اعمي كنبغي.. بابا: (قاطعو) سككت ومتكملهاش... حتى الى محشمتيش منا حشم من مراتك لي جالسة حداك وكتسمع فيك.... سمعني اولدي مزيااااان.. بنتي معطيتهالكش ونتا ديال راسك نعطيهاليك دبا ونتا مزوج ووالد... معمرك تحلم تزوج ببنتي واصلا شكون قاليكم انا باغي نزوج بنتي... انا اسيدي باغيها تبقا حدايا كريمة: ولوااه اخويا البنت مصيرها الزواج بابا: العقول المتخلفة لي كتقول هكا... البنت خاصها تقرا وتوعا.. البنت خاصها دير مستقبالها... المستقبل لي هو شهداتها وخدمتها... البنت فاش تكون قارية ومثقفة وتزوج غادي تبنيلينا جيل واعي ومثقف.... جيل خالي من هاد المجرمين والمكبوتين لي عمرو لينا الدنيا... المرأة هي نصف المجتمع وهي التي تربي النصف الاخر... اذا كانت المرأة فاسدة فسد المجتمع..... كنظن شرحتليكم شنو كاين وهاد الموضوع غادي يتسد هنا ومعمرو يتجبد...... كلشي سكت ملقاو ميقولو حدهم ناضو وخرجو ديك الليلة شدو الطريق لديورهم
