غربال الروح

البارت الخامس والخمسين

الروايه " غربال الروح "
بقلم /رحيل القوافي ......
Ghadeer-1997

ياحزن ياريت اعرفك ..
جنت اسويلك حديقه
ياسمين
وممشئ من كاشي الفرح
جدام بيتك
ياحزن ياريت اعرفك
وين تسكن
جنت اكلك لاتجيني
وتمشي كل هاي المسافه
انه وحدي ان اجيتك
ياحزن وحياة حزنك ماعرفتك.
جنك مغير مشيتك
حاط ريحه رخيص كلش
ويا رخيص اشكد بجيتك
......

" " أدركت إنني شخص قوي حينما صبرت على أمر كان في كل ليلةٍ يبتر جزءآ من روحي. " "
ريحان ••••

فاجعه بعد فاجعه وحده اكبر من الثانيه. فراق عن فراق يفرق الف مثل الفرق بين العگال والغربال اثينهم دوائر بس واحد يغرب ويفرز الزين من الشين والثاني يحتوي الثنين.

ثابت وزواج المستعجل شعلت نار بكلبي مستحيل تنطفي
جنت اموتن الف مره من اعاينه كبالي واعاين بعيونه لهفه عليه.

انه جنت حيل غاسيه ويا روحي ودست على كلبي واخذت كيمر اله بصباحيت عرسه اعرفن غلط وبسوايتي هاي انه الوحيد انجرح.

جنت اعاين بعيون اهلي الشفقه على حالي هج مفضوح حب ثابت وانه مادري
ماهتميت النظراتهم جنت اريد ابين الهم انه قويه ومايهزني شي

بس هذا كله جذب واتبخر كل الحجي من وصلت البستان ثابت وكفت بمچاني اترددت افوتن خافن اعاينها كبالي وماخذه مچاني.!!

وانه على هاي الوكفه سمعت صوت اجاني من ورا ... لا دشين صدكي انتي اكثر وحده راح تنجرحين

رديت عليه ودمعه طفرت من عيوني ... موش بيدي اريدن اعاينه فرحان مرتاح من اخذها.

كال ... وشنهي التحصلي اذا جان مرتاح يا لاع اطيني الصينيه وردي للبيت.
رديت ... لاع انه اجيت وانه اسلمه ماريدن ايكولون عني ضعفت

وكف كبالي وكال ... انتي تغشمرين على منو انتي معاينه روحج شلون ذبلانه ترئ اقل هبت هوئ توكعج وين القوه التحجين عنها.

رديت عليه ... چا شسوي مظهر انه كل يوم اشتاگله اكثر من كبل تعرف انه شنهي الصار بيه البارحه وانه اعاين چدام عيني زفته تعرف شنهي يصير بالكلب من يفكر باليحبه بحضن ثاني انه البارحه

مثل كره الميت للدفان هج انه واليله كرهته وكرهت انجومه والكمر صرت اعاينه اكبر عدو الي

.. باس راسي وكال ... يله فوتي وانه انتظرج هنا فوتي بس فوتي ريحان القوي ام عيون الماتخاف من شي يله.

مشيت وانه ارد انه اكره ثابت انه اكره ثابت
لحد ماوصلت للباب دكيته وطلعلي هو كلت بكلبي ... انه اعشك ثابت
قدمتله الصينيه وكتله ... صباحيه مباركه انشالله منها العيال ومنك المال

اااع شكثر صعبه هاي الچلمات عليه اتكول اسهام مسمومه ومصوبه بنص كلبي عاين بعيني وكال ... ليش هج اسوين انتي السبب حركتيني بنارج ياله ارتاحيتي كتلج الحب موش ثوبنه اتباعدي ينار بس ماسمعتي مني.