ما لم يكُن بالقلب عليم

البارت 46

سيف: دوامي همتله وتركت كل شي على حسن هالفترة
احس مالي خلك ولا واهس اكمل بعد ..احس نفسي تعبت حيييييل
تعبت من التفكير بيا وبيها وبحالتها وبوضعي وشلون حكدر اكمل وياها ..
غيث: شحتسوي ؟ شوكت تحس على نفسك وترجعلها؟
سيف: ما ارجع ..نفسي كاشة
غيث: صدك تحجي ؟؟ شبيك بابا ترا هي نفسها جنت رايد ترجع علاقتك بيها وتكمل وياها ولا تنسى ترا مو صوجها الي صار ليش دا تعاقبها؟؟
سيف: ادري مو صوجها ..بس ما اكدر اتقبلها مرة ثانية ..
غيث: اقسم بالله بلا عقل ..لك الحمد لله وصلت قبل ما يصير اي شي حتى، عاد على شنو ضايج ومتحمل عليها ؟!
سيف: لك كلما اشوفها اتخيل الموقف وما استحملها
غيث: والحل ؟
سيف: طلاق ..
غيث: گوم نام وارتاح احسن، انت تعبان ومدا تعرف تقرر زين
سيف: اني ما بيا شي وهذا القرار اسلم شي
غيث: شكك خاين لعد انت ؟ لك تدري شكد جنت محترمك واعتبرك رجل قوي وعقله چبير ويفهم، تاليها تحچي وتتخذ هيچ قرار فاشل ؟
سيف: لعد شتريد مني اسويييي ؟؟؟ ما اتقبلها اني بعد
غيث: خلي ببالك شغلة اذا سويتها كل شي بيناتنا ينتهي
نور بنت عمتي وما اسمحلك تأذيها على شي تافه وهي مالها علاقة بيه
غيث: گتله هيچ، تعصب وتركني وطلع ..وخلي يطلع طز بيه عاقل مجنون يسويها ؟ شذنبها البنية تطلگ بسببه ؟!
گمت حاچـيـت ريام صار چم يوم ممحاجيها بسبب هذا الحادث، واتفقنا باچر اجي اشوفها هي ونور

نور: الي صار چان صدمة فظيعة الي، خاصة انه اني ما ادري ليش وشلون صار هذا الشي بس الي ادري بيه جان شي قوي على دماغي وحالتي النفسية زفت ..
ريام ما تركتني ابد وبقت يمي تقريبا اربعة ايام وعمر خطية كل كم ساعة بجي علينا ويجيب غراض
وسيف ؟ آه على سيف ..
سيف الي تمنيت اشوفه حتى يرتاح گلبي وتطمئن روحي..صدني بأبشع صدة، دفعني وتركني وراح بدون ما يسأل ويقلق على الانسانة المظلومة الي مالها دخل بكل شي صار، حسسني اني الي گتله لخالد تعال ..
ما راعى كوني بنية وتعرضت لموقف چان راح ينهي حياتي لولا رحمة رب العالمين ..
گلبي وروحي مجروحين منه ..هواي مجروحين
توقعته اول شخص راح يمحي جروحي بس هو اول شخص داس على جروحي ازيد وازيد
ريام يمي ومصدومة هي هم من تصرفه بس تحاول تبينلي ماكو شي، وتتجنب تذكره گبالي، واني بالمقابل اتصنع بعدم ذكره بس في كل ليلة دموعي تنزل على طعنته الي ..اي هو طعني، خدوش خالد جانت تافهة مقارنة بتصرفه الي جرحني جرح ما يتلئم ولا يتداوى ..
ثاني يوم اجا غيث وسلم علية وعلى ريام وسألني على احوالي وعمر هم جان موجود
حسيت طلعت شوية من ذكرياتي والموقف الي صار تغدى غيث ويانا هو وعمر ريام سوت بامية
بس بالـ 8 بليل غيث ضربني صاعقة ..
غيث: احم ..يلا ريام مترجعين ؟!
ريام: اي بس ..بس نور !
غيث: ما بيها باع شلونها قوية عمي، على شنو خايفين عليها
عمر: اني ابقى وروحوا انتوا
غيث بنترة: لا محد يبقى راح يرجع زوجها ماكو داعي تكبرون الموضوع، الموضوع راح وأنسّى

نور:جنت خايفة بداخلي ومتوترة تمنيت اتشبذ بايدين ريام مثل الطفلة واكول الها لا تروحين خايفة اني
بس فكرت ريام هم عدها بيت وزوج، هاي شكم يوم تاركتهم وباقية يمي..ما ردت اصير أنانية
نور: ميخالف روحوا كلامه صحيح، وماكو شي عليه
ريام: متأكدة ؟؟
نور:اي لا تخافين، وسيف يمي ماكو شي، وممنونة منكم كلكم ماقصرتوا ابد وتعبتوا
غيث:لا تحچين هيچ انتِ اختي وعزيزة علية