البارت 41
رفع ايديه وخلا كم خصلة خلف اذني
وهمس ..هيج أحلى
تفاجئت من كلامه ..مرة وحدة بس مدح شكلي
والمرة الثانية جانت اليوم،ابتسمتله بهدوء وهو هم
بعد شوية ابتعد عني وراح بدل حتى ينام
واني بعدني واكفة بمكاني واتذكر كلامه
ونبرة صوته والطريقة الي حجا بيها
على رغم جانت كلمة وحدة ..بس حسيتها
تغلغلت لاعماقي ..
نام بالارض فرشتله اني مسبقاً وموبايله
على الجرار قريب عليه من بعيد شفته يضوي
تقدمت مجانت نيتي اتجسس عليه لا والله !
بس خفت اكو شي مهم وهو نايم لانه هو
داىما مشغول بالشغل ويتصل مرات ساعة 12
المهم فتحت الموبايل ..
بدون ما أحس ..دموعي تحرق وجهي
وحسيت انضربت
على راسي كأنه جانت ضربة وعي على تفكيري
الي طار بسرعة بجناحتهُ
لزمت الجهاز بيدي واصلته رسالة من
سلام احمد مكتوب بيه
"سيف الاوراق كاملات بس ممشن،وناقصهن توقيع
زوجتك،حتى يتصادقن ويمشن بالمحكمة"
اقرأ حرف وحرف ودموعي احسها
نار وتجويني،حسيت شكد اني فطيرة
وما انتبهت عليه ونسيت شسوا هو من البداية
ايديه ترجف ذبيت الجاهز راساً على السرير
وطلعت اركض للحديقة جانت الدنيا ليل حيل
مردت احد يشوفني اني وضعيفة
كعدت بالزاوية وواعصر بعيوني من القهر
اني الي ظنتيته تغير !
ظنيته حس بيا وبحالي وبتصرُفاته
الخطأ بحقي ..نسيت هو الي كسرني
وتزوجني بالسر وخفى عليه هو متزوج قبلي
نسيت هو الي خدعني واخذ كل ورثي
بالتزوير !! واليوم هو محتاج توقيعي
حتى يكمل خداعه !
خليت ايديه على شعري حسيت كل خلية
بيا توحعني ..كل شي بيا عيوني وايديه الي
ترجف وروحي المتلوعة
حسيت اني انغدرررت ..انغدرت من اكثر
واحد اني ممأذيته !!
تذكرت ليلة البارحة ووجوده وكلماته
تذكرت الشعور وياه واحس روحي اطلع بكل
ذكرى اتذكرها ..مجنت اعرف شي غير انه
كل لوعة وكل دمعة نزلت مني جنت اكرهه اضعااف
ومستحيل يجي يوم اسامح ولو بمثقال ذرة ..
تعبت حييل بذيج الليلة ومن كثر البجي
حسيت ضعفت اقدامي ما اكدر اوكف على
حيلي وارجع لمكاني ..
ماادري شكد ظليت برا واني احارب افكاري
بس جبرت نفسي وطبيت للبيت
جنت متقرفة افوت على نفس الغرفة
الي بيها هو بالكوة جبرت نفسي ادخل
دخلت باوعت للساعة ساعة 2 !
لعد شكد ظليت اني برا !!!
دفعت الغراض عن سريري وبديت احارب النوم
اريد انام حتى انسى كل شي بس
مكدرت،عيوني متغفى،ظليت على هذا الوضع
الى ان خدرت بدون وعي من التعب ونمت ..
كعدت الصبح مجان موجود الحمدُلله
مجنت مستعدة اشوفه ابد واني مااكدر اواجهه
هسة،كعدت بالكوة وغسلت ولبست تراك الخ
ونزلت تريكت صبحت على بيبي
استغربت من شافت عيوني وارمات
سألتني شبيها عيونج وليش تعبانة
بس نكرت وما كلتلها اي شيء اساساً
ليش اني اكدر اكوللها شي ؟
تهزمت منها ومن تسأؤلاتها عني باي طريقة
ورجعت لقوقعتي وطفيت موبايلي
ممتحملة احد يحاجيني ابد،حسيت نفسي
على شعرة وحدة وانفجر باي واحد من قهري
ورا ساعة ونص انفتح الباب بقوة
كمت على حيلي بسرعة،طلع سيف رجع
درت وجهي عنه واستغفرت ربي مردت اتجاوز
حدودي،بنفس الوكت متقرفة من مسرحيته
وتمثيليته وياي،تقرب باتجاهي اكثر وصاحني
بنتر وقوة،بسرعة باوعتله جان عاكد حواجبه
تقرب كال
سيف: وين موبايلج ؟ صارلي ساعة ادك
ليش متردين ؟
نور:طافي ..جاوبته بس بهاي الكلمة ومباوعتله
سيف:وليش مشحنتيته للمهجوم ؟؟
مدااتصل بيج حتى اغازلج دا اتصل لشي
ضروري !!
نور: لا العفو ..متعودة على اشياءك الضرورية
لدرجة تدوس على الناس لتحقيق هذي الاشياء
رفعت راسي وكتله هيج بحزم،حسيت نظراته
تغيرت،وملامحه صارت تسأل شبيج؟ درت وجهي عنه بسرعة،رحت اشغل موبايلي وبقيت
ادوس بيه لان متوترة ومرتبكة شكد حاولت
ما اشتغل،حسيت اجا بسرعة واخذ الموبايل
من ايدي حط ايده على كتفي وباوعلي
كال بقلق،شبيها عيونج ؟؟
مابيها شي ..حجيت واني انزل عيوني ما اريد
اباوعله ..واتحاشى النظر عنه
رفع راسي باطراف ايديه وكال بحزم اكثر
من احاجيج جاوبيني عدل !
شبيها عيونج،شو تعبانة ؟
طكت روحي منه ومن كلامه المزيف دفعت
ايده عني وكتله بانفعال لان ما اريد احجي
وياك،اريد تظهر على وجهك الحقيقي
على الاقل كبالي بس !!
مشيت وعفته،اني وماشية جرني من ايدي
حيل رجعني لمكاني
سيف:شجاج اليوم ؟؟من احاجيج احجي بهدوء !
اخر مرة اسكتلج على العياط و شنو هالخرابيط اليوم
مداافهم عليج !
نور: عوفني اطلع ..
وصلت يم الباب وسمعته كال
بعد ربع ساعة بس انتِ وغراضج كاملين
انتظرج جوا اني ..اليوم نرجع للبيت،كملته ..
غمضت عيوني بغضب وبقلة حيلة
ما اريد ارجع وياااااه،اني احقد عليه واحقد
على كل زاوية عشنا بيها سوا بس منو اكدر
اكله هذا الحجي كله ؟ مضطرة اعيش لوحدي
واحاربه واحارب خباثته وحيله ضدي ولوحدي هم ..
تركت الغرفة ونزلت جوا شربت مي
اريد بس اسيطر على غضبي سمعت صوت
خالي ورايا تقرب باتجاهي ..
خالي: نور راح تروحين اليوم ؟
نور:اي خالو،هسة رايحة اجيب غراضي
خالي:بنتي اني حاجيت سيف وطلبت منه
يبقيج هنا بس هو رفض كال البيت
رجعت كملته حتى لو مو على اكمل وجه بس يمشي
حال وهناك هو بيتج وزوجج ومااكدر امنعه
ياخذج ..
نور: اي صحيح،بلغني ورايحة هسة خاف انسى
شغلة هنا ..حجيت بتوتر ما اريد حالي يشوفني ويكشفني لان هو يعرف بيا شي من نبرة صوتي
ردت انهزم منه اخاف يحس علٍية باي طريقة ..
خالو: اني وغيث حجينا وياه البارحة
وطلبنا منه يبقيج هنا اعرف انت عندج ضرة
وتزعجج بس هو جان رافض حيييل لدرجة اني وغيث تفاجئنا بيه وبطريقة رفضه !
نور:لا خالو اني مرتاحة حيل ببيتي،وشهد
ما اذتني ومالها علاقة بيا ..وسيف ممقصر وياي
ابتسمتله واني احجي كل هاي الاكاذيب
بس حتى ما اخليه يعرف عن الموضوع تقرب مني
وطبع قبلة على جبيني ودعالي بالسعادة وتسهيل امري ...
طلعت للغرفة مموجود لميت غراضي وهدومي
وهدومه هم بالجنط وشلتهن ونزلت
طبيت للاستقبال جانت بيبي وخالي وعمر
دايحجون ويه سيف سالت على عمة سلمى
كالوا راحت لاختها مريضة شوية ..
ودعتهم وطلعت بالسيارة جان عبارة
عن غضب وميتحاجى واني هم محجيت
شي زايد ابد وياه،بس طول الوكت
اشوفه عاكد حواجبه،وعيونه تشع غضب
ولازم الستيرن بقوته ..
وصلنا البيت وحسيت بالخوف مرة الخ
صعدنا الدرج الخارجي وطبيت للبيت
جان مأثث من جديد،الاثاث مستواه وسط
مو مثل الاولاني طبيت للغرفة كل شي
بيها محترك بس ناقصن البردات
اعلكهن اثاث الغرفة حلو وبسيط وحتى المطبخ
يعني شي على شي البيت مو كامل مثل
كَبل بس الحمدُلله احسن من ولاشي
واني هم مااكدر اضغط عليه ولا تهمني
كل هاي الشكليات..خلا الجنط على صفحة
وطب يبدل اني هم بدلت ولبست
تراك قديم وشطفت البيت كله والبردات
علكتهن بس خلصت انبطحت على التخت
من التعب اخخ صار شكد متعبانة هيج ..
كمت من مكاني على صوت سيف
كال رايح اجيب غدا
هزبت براسي بمعنى اي ..
ورا عشرة دقايق من طلعته الباب اندك
كلت اكيد سيف رجع لان ناسي شي
فتحت الباب على نياتي وصارت شهد
بوجهي..ظليت مصدومة بمكاني
شجابها وشتريد ؟
دفعت ايدي على الخفيف وطبت للبيت
والابتسامة على وجهها كالت وبنبرة حقيرة ..
شهد:سمعت متاذية واجيت اتحمدلج ..
نور:اني زينة بوجود رب العالمين وياي ..
شهد:شنو ما راح تضيفيني مي ؟
باوعتلها بنظرة استغراب
ليش هي من وين اجتي حتى تريد مي؟
مو هي جانت ببيتها الي هو الطابق الاول ؟
استغفرت ربي ورحت اجيب كلاص مي
بس مقبوض كلبي جنت احس اكو شي
غريب..اجيت اتفرغ بيها وارزلها رزالة معدلة
بس لزمت اعصابي ما اريد حجة من ذاك
ويجي يتعصب بوجهي ..
طلعت من المطبخ واني ادردم وصلتلها وانطيتها
المي شربت شوية وخلته على الميز
افترت بالبيت فرة واجتي تضحك
وكالت لازم اعترف سيف خارق ..بهذي
الفترة القصير كدر يوفرلج من جديد هذا البيت !
عجييب !
نور:طبعاً..بالتالي هو يفضلني اني
ومعزتي عنده جبيرة ..
بس كلتلها هيج طكتها بضحكة استهزاء وهي
واكفة كبالي ..يفضلج؟ وكامت تضحك بعد
نور:انت ببيتي ! احترمي المكان !
شهد:خل اسرج بسر ..انتِ مضحوك عليج
حييل
نور:انعكد لساني اريد اجاوبها ما اكدر
وليش اجذب؟ مو هو صحيح الي سواني بهدلة
ومضحكة للرايح والجاي؟ نو هو الي خدعني
وبسببه صار اليسوى والمايسوى يستهزء ويقلل
من قيمتي ومن وجودي !
نور:اريد ارتاح ببيتي فاذا ممكن ..
شهد:اي طبعاً..اجتي حضنتني وهمستلي
باذني ..الجاي اقوى
انصدمت بكلامها وابتعدت عني راساً
طلعت وسدت الباب
بقت جملتها تحوم براسي
معقولة جانت هي السبب بالحريق؟
زين شقصدها هسة وليش اصلا حتى
تكون السبب مو الي خسر زوجها هي هم !!
شدالوص انييي حطيت ايدي على راسي
الف فكرة ببالي وماكو جواب شافي ..
اخر شي غسلت وجهي وكعدت انتظر
اجا هو ورا ساعة وربع تاخر حيل
بيده كباب ولفات بس وببسيات ..
انطاني العلاكة بدون ميباوعلي وكال
هاج اخذيهن..بس جهزي بسرعة جوعان
حطيتهن بطبق وصينية ورتبتهن وخليتهم
على الميز وكعدت يمه كل واحد اكل
بس بدون ما نحجي حرف ..طكت روحي
من هذا الشعور،دا احس نفسي كاعدة
ويه اشخاص غُرباء،بسرعة كمل اكله
وكال من تخلصين طلعلي تراكسودي
النيلي رايح اسبح ..
طول اكلي جملة شهد ترن باذني
صار حلني اعرف شتقصد ؟
خلصت اكل لميت البقايا مال اكل ورتبت
كل شي وكعدت بالغرفة
حجيت وية ريام وحايرة بحملها اني مكدرت
اروح وباها للدكتورة..راح غيث وياها
واليوم متعاركين هو يريد يسمي
اسم وهي غير اسم وصايرة مكافش
ضحكت عليهم من كل عقلهم دايتعاركون
وقبس من جهة هالايام دا تدك على طفل
هم متعاركة ويه احمد تريد تروح على الدكاترة
ليش مصارت حامل وهي كلها صارلها ستة اشهرُ
متزوجة ..واحمد مدايقبل يخاف على جسمها
من الادوية وهي مبيها شي اصلا البنية
جنت احاجي الاثنين والاثنين عدهن مشاكل
بس اني شكول ؟ جنت اتصنع بالسعادة
مااكدر احجي شبيه بنص الحجي تذكرت
سيف طول !!! مو عادته يطول بالحمام
صيحته مرتين وثلاثة ماكو رد نهضت
من مكاني بسرعة وهجمت الباب هجم
ومدايرد ! الف فكرة تراودتلي لا يكون صايرله
شي !! حلفت يمين اذا بس يريد يخوفني
يصير شي ميعجبه ابددد
بقيت ادك على الباب وماكو اي جواب
حسيت ايديه ترجف من الخوف والقلق
مجان كدامي حل غير افتح الباب
ضغطت على اليدة وتوقعت مقفول من جوا
بس جان مفتوح دفعت الباب على كيفي واني
اصيحه سيف وسيف وماكو جواب،دفعت
الباب اكثر وطبيت لنص الحمام جان
كله بخار مال مي حااار وانصدمت
حييييل،جان سيف بالارض مبطوح
وشبه فاقد الوعي النفس يلكطه بالكوة
ركضت عليه واني اصيحه
شبيييك سيف؟ جاوببنييي خليت راسه
بحضني وهو يغمض عيونه ويفتحها وكع كَلبي
وحسيت راح افقده للابد
كل دقيقة اكول هذا النفس الاخير
دموعي نزلت بلا وعي المن اكول والمن اصيحح
خليت ايده حول رقبتي وضربته بهدوء
على وجهه واني اتمتم ..سيف باوعلي بس
راح اطلعك اني بس ساعدني الله يخلييييك
هو حيييل ثكيل علية وعلما نهض من الارض
طلعت روحي بس معندي حيل وبالكوة
بس وصلت باب الحمام ببداية الغرفة
ضعف اكثر وهالمرة ابد مكدر يسيطر
على نفسه وكع بالارض واني اصييح عليه
واحاول اصحيه
ردت ابجي والطم وانطزز من الخوووف
اني لوحدي بهذا الموقف ردا بس شي ينقذه
ركت ادور على نوبايلي ركضض بالمجرات ونبشتهن
مع انه موبايلي متروك على التخت بس مشفته
من الاستعجال والخوف ..اني ورايحة لمحت
جهاز مال ربو ماادري شلون طخت عندي وبسرعة
شكلته ركضضض ايديه ترجف بالكوة يجي الشي عدل
قربته عليه وحطيته على انفه وراسه بين احضاني
ولازمه ايده بكل قوتي واقرا على راسه
ادعية وآيات ..ورا دقايق بس
استقر نفسه بعد ما جان يصعد وينزل بقوة ويسعل
جان يجاهد حتى ياخذ النفس
بس صار احسن وبدا يفتح عيونه من جديد
كطعت عنه الجهاز وراسه بعد بحضني
مسدت على راسه بخفة وحرص
شوية شوية سمعته كال ..نور
على كيفه نهض وكعد كبالي واستند على الحايط
عيونه حمره ولونه مخطوف،بدون وعي
مني تقربت منه وحاوطت وجهه وكتله
شلون صرت؟
هز راسه بمعنى زين اني ..
كتله بتوتر كوم على السرير هنا تتعب اكثر
سمع كلامي وتمدد على السرير وغطيته
وركعت صليت صلاة شكر لان من صدك اصعب
موقف بكل حياتي ..
جان ممكن اخسره لو تأخرت بس كم دقيقة !
وبقى سؤال يدور ببالي شلون صار بييه هيج ؟
خلصت صلاتي والتفتتله جان مغفي من التعب
رحت للحمام اريد اعرف شصار
ظليت افتر بالحمام ماكو شي عادي
بالحمام محطوطة الغسالة مال ملابس
اني وطالعة انطخيت بيها ووكع اسواري من ايدي
دنكرت اجيبه ولمحت ايدي شي مثل
العودة مال خشب صغار سحبتها وانصدمتتت
جان اعواد مال بخور !
سبعة اعواد تحت غسالة الملابس ومعلوكات
يعني خلصان منهن شي مو قليل !
بس منو خلاهن معقولة ..!!!
سيف ابد ما يحب هاي الامور من جنا صغار
معقولة هو خلاها وهو يعرف عنده ربو ويختنك !!
وليش حتى يحطها بالحمام اصلا!!
واكفة افكر وفجأة سمعت صوت واحد يتلوى
ذبيت الي بايدي وطلعت ركض
جان هو ساند راسه على تاج السرير ويتلوا
من الألم وايده على بطنه !
هو جان مختنك ليش بطنه هسة توجعه !
اجيت كعدت يمه
سييف شنو يوجعكك
ولاشي
سيف ارجوك كَلي مو وكت غير شي هسة
كلي بلكي اساعدك ؟
لا ممحتاج ارتاحي
تقربت منه وحاوطت وجههُ بايديه
وكتله مو انت الي كتلي لا تضمين وجعج ذاك اليوم؟
ليش اليوم ضامم وجعك ؟ جنت مركزة بملامحهُ
وهو عيونه تعبانة كلي معدتي دا تتكطع
ابتعدت عنه ورحت نبشت العلاج الموجود
لكيت مسكنات انطيته ورجع راسه ليورا
كعدت على الكرسي بصفه
واني دماغي مشغول منو ممكن يسويها !
أنت تقرأ
ما لم يكُن بالقلب عليم
Romanceالقِصة ستتناول عدة جوانب إجتماعية وعاطفية وعدة قضايا أُخرى..بِكُل جُزء،فعسى أن يكُن الإستمتاعُ حليفكُم .. _____ ريام الزُبيدي
