ما لم يكُن بالقلب عليم

بارت39 ..

البارت 39
_
_
_
_
الصبح: ودعت الكل وبيبي حملتني كومة غراض
وشغلات للبيت ووعدتني راح تجي تزورني
ركبت السيارة وياه واني بالي مرتاح لاول مرة
من وصلنا ساعدني بالغراض وصعدنا على الدرج
بس فتحت باب الطابق،تشخصت عيوني
بقوة من الشي الي شفته انهدت قوايّ
واعلنت استسلامي وكعدت بالارض وعيوني تجري ..
شلون صار هيج !!!
كل شي جان محتررك ..اي كل محترركك البردات
والمطبخ والهول والغراض الي بيه
صورتي الي بالهول واكعة وصايرة رماد
ركضت بأقصى سُرعتي لغرفتي
دفعت الباب راسا اجا بيدي لان متأذي حييل
تقدمت بخطواتي للكنتور فتحته،اندفعت الغراض
بوجهي جانت مخربطة ومحطوطة بشكل
كوّم وهدومي كلها محترركة،دفعت الغراض
اكثر،لمحت ملابس سيف من ضمنهن بس مابيهن
شي ولا محتركين !
ما همني بسرعة ركضت للجرارة بس
فتحتها،حسسيت دم ما ظل بوجهي،ايدي
ترجف لا اراديًا،جريت الالبوم ..البوم صوري
وصور أُمي وابوية وكل شييي ..جريته جان
اشبه بالرماااد الي باقي منهن بس قطع
صغيرة من وجعي صرخت بكل قوتي
دموعي تنزل دمعة خلف دمعة وخلفها غصة
عظيمة،من صراخي سمعت صوت ورايا
التفتت جان سيف،بدون ما أفكر بأي شيء
ركضت وارتميت لصدره،وبللت قميصه بدموعي
حسيت ايديه محاوطتني،وقُبلاته على شعري
وهو يهمسلي حتى أهدئ،بعد كل دمعة جنت
اتعمق بحضنهُ أكثر،مجنت أفكر شي غير انه
محتاجة بس شخص أتكئ عليه
البوم ذكرياتي هو اي بقى بس من كل حياتي
هو ملجأي بكل مرة اشتاق لاهلي واشتاق
لاصواتهم ولوجدهم وياي،اني فقدت
اهلي وفقدت اخر اثر الهم بحياتي
هواي علّية وعلى قُدرة تحمُلي !!
حسيت على سيف يبعدني،صرت كباله
بإبهام ايده اليمين محى دموعي على وجهي
وكال،امشي نطلع ..
ما سمعت كلامه ورحت افتر ببقية الغُرفة
المخدات والسرير وشغلاتي على الميز
كله محترك،حسيت ما راح اكدر اتحمل بعد
طلعت قبله وكفت بالهول،اجا يني
سحب ايدي ونزلنا من الدرج الداخلي
استغربت وين يريد يوديني ؟
نور: وين رايحين ؟
سيف:اريدج تسمعين كلامي..ولو هالمرة بس !!
كالها بحزم وبالكوة لازم اعصابه ما ادري شدايدور
بباله هالرجال،حسيت من كلامه اكو
رسالة دا يوصلها الي بطريقة
غير مباشرة،وصلنا اخر باية،وصارت بوجهنا
خالة عذباء وبناتها رُسل ومنار
حسيت عليها تخربطت ملامحها وراسًا
اجتي تركض على سيف
عذباء: سيف حبيبي وين جنت،شكد دزيتلك
رسائل ومكالمات وما ردتيلييي،بالكوة
طلعنا من الموت،بس مكدرنا ننقد غراضك فوك
سيف: شلون صار ؟
عذباء: ما ادري شكلك بس من قبل يوم هذا الحجي
صار،وبالكوة الجيران انقذونا وحتى شهد
خطية حاولت تشيل هدومك بس اختنكت
روح شوفها لحد الان بالفراش متمددة علمودك
نور/هي جابت سيرة شهد،حسيت اكو شي
بس اني مو بوضع يسمح افكر ازيد،بالكوة
لازمة دموعي متنزل،طلعت بس بالجنطة
الي جبتها من رحت لبيت خالو،الباقي كله راح !!
باوعت لسيف جان هادئ مبين عليه حييل
لزم ايدي ووصلنا نص الهول وفزيت على
صوت خالة وهي تعيط
عذباء: سيف اني هنااا جبيرة البيت وكلامي
ينأخذ بيه مو طرطور عندك !!! هذي شجابها
هنا ؟؟ انت حاير بيها لك كتلك مرتك جوا
مختنكة من البارحة وانت حتى تتكلف ترد
على اتصالاتنا !!
نور/ خالة حجت وتوقعت سيف راح يردلها
بس هو شدد على قبضة ايدي اكثر وطببني
للاستقبال وتركني وراح وما حجا حرف واحد
بقيت الوب لوحدي،وكل شوية افز اكول هسة
يجن يهجمن علّية مثل ذيج المرة،بعد شوية
فزيت على صوت عركات وصياح وكفت بمكاني
سمعت شكالوا حرف حرف
عذباء: سيف بطل مهزلتك هذي،شوكت تقتنع
انت متزوج اثنييين مو بسس ذيج !!!!
سيف:شوكت تقتنعون هذا جان تلزيك مو زواج؟
ومن الاول جنت واضح وياكم هذي الكلاوات
مستحيل تتطور وانتوا الي دا تلزكون وانتوا
تتحملون النتائج ..
عذباء:انت دا تجبرني احجيي لك هي الي حركت
بيتك فوك !!
شهد:سيف الله يخليك بس اسمعني وصدكني
اني شفتها بعيوني الغاز مفتوح متعمدة
وشرارة نار ببداية البردة،والله مدا اجذب
احنا كلنا شفناها بس مردت احجي
سيف: شنو يثبت صحة كلامج ؟،اريد دليل
ملموس،اما حجيج فجربته مرة..وفشلتي
شهد:بس كلي ليشش انت هيج ويايه وتفرق
مو اني الي احبك وابوس التراب الي تمشي
عليه
عذباء:خليها ببالك مرتك ما تبقى عدنا،دبرلها مكان
نور:جنت اسمع واني منصدمة حييل،ما فهمت
حجي شهد،حجيها يختلف عن تصرفاته
هو كبالي يحضن بيها ويمدحها !!
كلامهم جان حيييل مُبهم،بس وكفت متفاجئة
اكثر من اتهموني اني حركت البيت متعمدة !!
شلون وصلت بيهم لهذي الدناءة !!
شنو من بشر يتهمونني بهيج تهمة بدون ضمير
سمعت خالته تكله ما تبقى هنا بالبيت
جاوبها بنبرة تحدي وحزم ..اني رجال هنا وكلمتي
هي الي تمشي !
استثقلت روحي،شلون ابقى ببيت ضرتي
انتظرته بس يرجع ويرجعني لبيت خالي
فزيت على دكة الباب طب هو جان هادئ اول ما فات
بس كعد على الطخم شوية راساً كبالي بين
ضوجته ومبين راح يطك من قهره
ما ادري شنو الي هزني وحسيت بتعبه
هو هم حقه،هذا تعبه وبجهده كمل البيت وبالاخير
يشوفه رماد
دمعتي بعيني والكسرة مبينة على وجهي
تقربت منه جان منزل راسهُ ونظره بالارض
حطيت ايدي على كتفه بهدوء بس ما بين اي ردة
فعل،صيحته بأسمه على كيفي فجأة رفع راسه
ووكف على حيله مسح وجهه بإيده وتنهد
التفتلي وكال رايح اني ..
نور:دقيقة سيف
سيف:نعم ؟
نور:انت مصدك اني الي حركته ؟
تغيرت ملامحه وعرف اني سمعت كل حجييهم
باوعلي وعاكد حواجبه وكال
شلج بهالسخافة ؟ الوضع وضع محرج رجاءً
مالي خلك ..
زعجني جوابه بس مابينت اله،التفت يروح اجذب
اذا اكول ما خفت خفت لا يروح واوكع
بين ايدين ذني،جلبت بيه وكتله لا تروح
استغرب من تصرفي،بس بقيت الح،هو هم شاف
وضعي محرج بقى كاعد يمي
بس بقت عيونه تتحرك يمين ويسار واكو فكرة
بباله تدور مدا اعرف شدايفكر
اني كاعدة لوحدي بالزاوية والماضي
يروح بيا ويجي،ما ادري ابجي ما ادري اكمل
حياتي،اني بوضع محتاجة من يحاوط ايدي
وينقذني من ذاتي
الغصة الي بداخلي دا تكتل بيا يوم بعد يوم
بدون اي انقاذ مني ..
بعد نص ساعة من السكوت،كتم وكف على حيله
وبدون ما يباوعلي كال امشي اوديج ببيت اهلج
وكفت على حيلي بموازاته
نزر:ليش ؟
سيف: ماراح تكدرين تبقين هنا،اني اعرفج
واني مو دائما وياج،داتشوفين وضعنا
الطابق والغراض كلها محتركة ذني منو يصفيهن؟
فامشي بلا حجي زايد
اجيت احجي وياه اكثر بس شفته عصبي
وعيونه حمرّ من القهر سكتت شلت نفسها
جنطتي الي اجيت بيها وطلعنا بالسيارة
جانت ساعة 1 الظهر صارت والدنيا دا تمطر
وباردة ثلج،شوية المسافة بعيدة بين بيت
خالي وبيتي،مشينا الطريق كله ومحد حجا
حرف،وهو يسوق بسرعة والدنيا مطر
ولازمة نفسي من الخوف،بنص الطريق حسيت
بالبرد،كمت احتمي بنفسي اكثر وافرك اكتافي
من البرد مع انه التدفئة شغلها بس الجو حيل بارد
حسيت دا اكزكز من البرد واني برودة هم بسرعة
ابرد،فجأة وكف السيارة وانطلخ راسي باوعتله بغضب
فكيت حلكي اجيت احجي بس هو
نزل من السيارة واجا من جهتي فتح الباب ونزع
جاكيته تقرب مني حيل ولف الجاكيت حول
اكتافي بهدوء بس بدون ما يحجي حرف واحد
مرات سكوته وقلة حجيه تزعجني اتمنى
لو يحجي واسمع صوته هواية ..
ابتعد عني ورجع ركب وكمل سياقة
عدلت الجاكيت ودفيت بيها جانت ثخينة حيل
وتدّفي،باوعتله شفته بس لابس قميص
ومو ثخين،بلهفة كتله
نور:سيف لا تبرّد !
سيف:مو بردان ..حجاها ببرود حيل وبدون ما يباوعلي
نور: بس ميصير،هاك البسها اني دفيت
سيف:بس تدفين أنتِ،أدفى اني
صدمني بجوابه ومعرفت شردله بس استحيت
من كلامه،ظليت مبتسمة بداخلي
على رغم الحادث الي صار،بعد كم دقيقة
وصلنا للبيت بس طبينا
ظلوا متفاجئين ليش رجعنا،واحنا قبل شوية رحنا
استلمنا خالي يسال وخايف مبين من وجوهنا
اكو شي،كعد سيف يحجيلهم كل شي
بيبي كعدت يمي وتواسيني،مكدرت ارد الهم
بشي غير انام ومجنت نعسانة بس اريد
اشرد من الواقع التعيس،ومن دموعي الي تريد
تنزل صعدت نمت وسيف راح مقبل يبقى
بداخلي كلت شكو عليه،عنده مرّة ثانية..
لطمت نفسي،وشعلية اني ؟
بالخمسة العصر كعدت على حس قبس
يمي من كل كَلبي فزيت بفرح شكد جنت محتاجتهم
بس كمت من فراشي اجتي تحضن بيا
بكل قوتها وتسألني عن حالي
قبس:شلونج،لج تدرين شكدد مشتاقتلجج ؟
نور:قبوس هواي جنت محتاجة وجودج
وياي،اني بحاجتج ..
رجعت حضنتني وبنبرة خافتة همستلي اني وياج
لا تخافين يمكن تعرف شصار ولهذا دا تواسيني
قبس: تعالي اكعدي هنا خل نحجي
قبس: احجيلي شصار وشلونه وضعج ويه سيف
وضعي ؟ هه وضعي مهزلة شحجيلج ؟
سكتت بس تنهدت بتنهيدة قوية تفصح عن كل
تعبي والحمل الثكيل الي علّية،حطيت راسي
لكتفها من تعبي النفسي
قبس: ادري بيج تعبانة وادري الي صار اليوم جبير
بي امطي عذر لسيف اني ما ادري الي
بينكم شنو بالضبط،بس الي ادري انت تختلفين عنه
هواي ماكو اي شبه يجمعكم واكيد اكو خلافات
بس حكلج شي واني متاكدة منه
سيف يحبج ..لا تفطرين بيه
نور:قبس شهالحجي،اني رايحة
قبس: لا تتهربين خليج بالواقع بس انتِ الي
مو واعية ابد وبببالج الكره بسس
نور: قبس انت متعرفين الواقع ومتعرفين الحدث
فلاتحجين بدون تدقيق،اني الي عايشة حياتي
واعرف شدايصير بيها،اني طالعة ..
تركتها وطلعت واني انهج انفعلت عليها زايد
ما ادري شصارلي بس حجيها يرن بأذني
حب ايش هذا ؟ هو يلكاله حجة حتى يهيني
وينزل من قيمتي بأي وكت حب شنو ؟
ما ادري شجنت احجي بس الافكار تتناطح
بدماغي من جهة بيتي الي احترك ومن جهة قبس
وحجيها ما ادري شصايرلها وحجت هيج
نزلت جوا شفت ام قبس واختها رحمة
بصف بيبي ودايسولفن سلمت عليهن وضيفتهن
وكعدت استمع لحجيهم وكلمة قبس
ترن بداخلي (يحبج)
اخر شي متحملت وطلعت للحديقة اتصلت
على سيف ما رد مرتين دكيت خفت لا يكون
صاير شي ..
صارت ساعة 9 بليل وقبس وعائلتها حيباتون يمنا
وعمر وخالي دكوا على سيف ومدايقبل يرد
ما انكر حيل شلت هم وخفت لا صايرله شي
بس ما بينت لاحد،بقيت ضامتها بكَلبي
تعشوا واني اكلتلي لكمتين نفسي مسدودة حييل
ولوما جبر بيبي مجان اكلت
قبس ما نحجي اني وياها المغربية كلها
بال11 صعدت لغرفتي طبت قبس ورايا
مباوعتلها عود زعلانة اني منها
قبس:بس اسمعيني ..
نور: خلص قبس،انسي الموضوع ما اريد اسمع شي
قبس: نور مو هيج الحجي،اني ما حجيت اعتباطاً
اني حجيت الي شفته
نور: قبس انت اختي مو بس بنت خالي
بس انه تلعبين لعبة ويه ابن عمج وتردين اصدكها
فتاكدي اني مو غشيمة لهاي الدرجة
قبس: لج لعبة ايشش ؟؟ انتِ وين عاييشة ؟
انت انتِ معمي على عيونج ومدا تشوفين شي غير الحقد والكره وراح يجي يوم وتتندمين
لج حتى ما كلفتي روحج وسألتي عليه وييين ؟؟
صارله اكثر من سبعة ساعات مختفي وحضرتج
تتكلفين تسألين على زوجج لهذي الدرجة تكرهيه ؟
هو بأمس الحاجة الج بس انتِ الي مدا تفهمين
ولا مقدرة الموقف،عبالج اسكت مثل بيبي وامي
على تصرفاتج ؟ كلنا ملاحظين شكد انتِ هامتله
وحتى متحجين وياه
نور: كااافي قبسس كافي،اني سمعت بمافيه
الكفاية،اني الي اعرف اتصرف بحياتي وشكرا
لنيتج بتنبيهي ،بس اني الي عشت كل الظروف وعشت مواقف محد عاشها وجنت انكسر واقوى لوحدي،ليش مطلوب مني احس بالعالم بس محد يحس بيا ؟ انتوا حاسيين بس على خطأئي
بس ما حاسيين على خطأئه هو؟ الي بيناتنا احنا بس
الي نعرفه فذلك يكون افضل لو احنا الي تصرفنا بحياتنا ..
جنت احجي بإنفعال وعيوني مدمعة اني انفجرت
بيها صح كلامها مستفز بس اني انعلت زايد،طلعت وسدت الباب كعدت على السرير اتنفس بسرعة
ما ادري شصايرلي اني لمحت جاكيته الي
لبسنيياها جريتها وضميتها لاحشاني استنشق ريحتها
جانت معطرة بريحته المُميزة الي احبها،مرت دقايق
واجا ببالي هو لزمت موبايلي دكيت عليه ما رد هم
قلقني وقلق كل شي بيا،صارت ساعة 12 تقريبا
اني مكضيتها اكل بنفسي وألف فكرة طختني
معقولة لهدرجة هو ما يقدرني بحيث ميرد
على اتصالاتي حتى !!
شهالحجييي هو حتى اتصالات عمر وخالي مدايرد
عليهن،اكيد اكو شيي..
حطيت راسي على المخدة وجاكيته بين أحضاني
ورا دقائق بسيطة حسيت انفتح الباب فزيت من
مكاني بقووة ووكفت على حيلي جان هو ..
فركت عيوني زين اريد استوعب معقولة اجا هو ؟
تقدمت خطوتين اني وهو تقدم بإتجاهي
جان وضعه تعباااان بكل ما بالكلمة من معنى
شعره مخربط وعيونه حُمر ووجهه شاحب
تفاجئت من منظره،كل خطوة يمشيها احس دا يمشي أميااال من التعب،جان ساكت تمامااااً
تقربت عليه اكثر ما يفصلني غير كم أنش
قطعت السكوت وكتله بصوت مهموس..سيف
باوعلي بنظرة تعب وأرهاق لحظات وأخذني
لاحضانه،حضنيي حييل لدرجة حسيت
أضلاعي حتنطوي راسهُ على كتفي وملامحهُ
مغروسة بين خُصال شعري،غمضت عيوني
وحسيت كل تعبه ذبه على أكتافي،ولحد الان هو
ساكت مجان يهمني شي،غير انه اعيش اللحظة
وياه وازيح تعبه،تذكرت جملة قبس وبلهفة شعور نسيت كل شي ورفعت أيدي ومسدت على شعره
والأيد الثانية حاوطتهُ
جانت اول مرة يحضني بهالطريقة وأبادله الشعور
دقائق مرت وسمعته يهمسلي تعبان
كال بس هالكلمة وحسيت بداخله شكد شايل هم
وغصة هو مشكلته ابداً ما يعبرّ ولا يحجي عن مواجعه
وعن الاشياء الي تدور بذهنه..
ابتعد عني بهدوء بصوت خافت كتله تعال
تمدد بالفراش وغطيته اجيت اروح لزم ايدي
وباوعلي بنظرة ترجي وكال محتاجج ..
الكلمة ترن بكل خلية بيا،رجفت على كلمته وعلى معناها العظيم،محيت كل الفوارق بذيج الليلة
ودفعت الفراش وتمددت بصفهُ وايده شابكة ايدي
بقوة الجو بارد جان حيل وصوت المطر والغيوم
تمددت ونثرت شعري بجهتي
باوعلي كال خليه أحبه ..
انكلبت لجهته اباوعله شكد تعبان يا ربي !
همستله وكتله
نور: وين جنت ؟ دكيت عليك شكد ومرديت
سيف: مجنت أعرف أكو شخص راح يهتم لوجودي ..
نور: مو ضروري يكون حُبًا بيك،يجوز كواجب زوجي لا أكثر ..!
سيف: الواجب والإهتمام بينهن فرق جبير والفرق ما ينحجي يبين بالعيون !
نور: شتكول العيون ؟
مجاوبني بس شفته ابتسم ابتسامة بسيطة
جنه يكلي أكتشفتج أني..
صارت ساعة 2 بليل ولحد الآن منايمين أحنا هو كضاها صفنات واني بس اتكَلب
جنت منطيته ظهري،التفتت اله فجأة شفته
صافن على جهتي عدلت نومتي وصرت مقابلة
وجهه،فجأة كام وصار أعلى مني تقرب أكثر
وأيده محاوطة خصري طبع قُبله على جبيني
وكال أعذريني ..مكدرت أحافظ على بيتج
تفاجئت من تصرفه ومن كلامه،بدون وعي مني
رفعت ايديه الاثنين وحاوطته وجههُ
وكتله لا تحجي هيج ..مو بس اني الي خسرت شي
انت هم خسرت تعبك وشغلك لا تعتقد راح
اذمك مو بسببك صارت الشغلة،هذا قضاء وقدر
وقدر ولطف مجنت موجودة اني وانت بدوامك
والا جنت ..
مخلاني اكمل وسد حلكي بإيده،باوع بعيوني بتركيز
وكال بنبرة تحذير وخوف اشش لا تحجين بهالشكل
هزيتله راسي بمعنى أي،لاحظت على قُربه مني
استحيت ونزلت عيوني سمعته كال بنبرة خافته
لا تنزليهن،اريد أشبع منهن ..
ما ادري شصار وتخربطت أوضاعي أكثر حسيت
دكات كَلبي صار يسمعها،صار صوت برق ورعد
قوي فجأة واني مندمجة وياه فزيت وجفلت حيل وبخوف ارتميت لاحضانه،شوية وحسيت على
نفسي،سحبت نفسي منه ورجعت لمكاني
بقيت الليل كله ذكريات الدقائق السابقة تدك بذاكرتي
الشعور الي عشته وياه قبل شوية مجان وهم
هذا الشعور احسه بس من يكون موجود هو
هو بس يقدر بهيج شعور اللهفة تجاههُ،بعيونه حجي
هواي ودا يصلني معناهن،بعيونه لهفة وشوق ويمكن..حُب بس الي بيناتنا شي جبير حيل ومينحل
ببساطة ..
استسلمت لافكاري ونمت كعدت الصبح وتفاجئت شوية ..

ريام: حياتي صارت مثل حياة اي بنية متزوجة
اني امتحنت ورا متزوجت واستلمت نتيجتي جانت تقديراتي أغلبها جيد جداً ومُمتاز حبيت اسويها مُفاجأة لغيث
انتظرته للغدا وسويت بذاك اليوم مقلوبة هو يحبها حيييل ودائماً يكلي أحبها من أيدج
خليت النتيجة على ميز التواليت كباله
طلع بدل هدومه وطلعت وراه دا يمشط شعره
ولمح الورقة سالها وشفت الابتسامة اتسعت على وجههُ التفتلي واجا بخطوات سريعة شالني ويفتر
بيا
غيث: الف مبارك حبيبتي
ريام: ويباركلك حياتي،بس نزلني دخت
غيث: اخاف دايخة من غير شغلة الفرة ؟
ريام: اممم يمكن ..
كتله هيج شو نزلني على الارض بسرعة وكام يضحك
وهو يكول صدك تحجيين ؟؟
ريام: ممتأكدة،ما اريد نتأمل زايد خل نتاكد والله كريم
غيث: لعد جهزي روحج العصر نطلع تحللين
ريام: الله كريم تعال على الغدا راح يبرد هسة
نزلنا تغدينا وهو يحجيلي على شغله وخطية وياه واحد اجتله بنية بس جانت مريضة حيل لدرجة
ماتت البني هي وبالخدج،ما ادري ليش انقبض قلبي من هاي السيرة وحسيت اكو شي راح يصير
بس مكدرت ابين اله لميت الاكل وغسلت ورتبت البيت وصعدت للغرفة جان متمدد بالفراش
دا يباوع بالمراية،وكفت اخلي مرطب لايدي
وبشقة كتله لعد وين هديتي ؟
غيث: واني شوكت تنطيني هديتي؟
ريام: انت دوم تكَلب السالفة ومتنطيني لا حق ولا باطل
فجأة حسيت عليه خلفي شالني ويدغدغ بيا واني
مداسيطر على نفسي من الضحك اخر شي كال كااافي فضحيتنا
مصدكت صار العصر من حماسي بدلت بسرعة
ونزلت جان ينتظرني،وصلنا للمختبر سويت الشي اللازم وكال انتظروا النتيجة بعد شوية
ورا نص ساعة غيث كال اروح اصف السيارة عدل اني ابقى هنا اخاف تطلع النتيجة
وبالفعل بس راح هو صاحوا اسمه ورجت اخذت النتيجة بس قريتها حسيت بفرحة عظييمة
حسيت راح اطير من الفرح،دا امشي بسرعة حتى انزل اله انطخيت ببنية مُنقبة كلتلها العفو
قبل ما تلتفت باوعتلها وانصدمت بمكانييي
هذي ميسااااء !! هذي العيون عيون ميساء اني متأكددددة ،حسيت دا ارجف بس معقولة تكون هي صحيح ؟
البنية حتى ما ردتلي الاعتذار مشت بسرعة جنها متسعجلة وتخاف لا اكشفها
نزلت لغيث وخفيت النتيجة كال
بشري حمامة غراب ؟
كتله ماكو شي
كال ميخالف..بعد العمر كله كدامنا
ركبنا بالسيارة كتله مر من هذا الشارع عفية
استغرب بس ما حجا شي،الشارع جان فارغ
بنص الطريق كتله وكف السيارة ..بس وكفها كتله تتذكر هذا الشارع ؟
غيث:اي اتذكره،هنا اول مرة شفتج بيها وجنت اشوفج مغرورة وشايفة نفسج
ابتسمت لكلامه ولزمت ايده حطيتها على بطني وكتله
وهسة المغرورة راح تجيبلك ولد يشيل أسمك ..

يتبع ...
السلام عليكم بنات،ادري تأخرت بالبارت بس الانترنت يمنا جان ماكو واليوم أجا والبارت جاهز من قبل يومين هم
اني عوضتكم ببارت يرضيكم وطويل هم لخاطركم
انطوني ارائكم وتوقعاتكم والا ازعل ! هههه
وممنونة لكل بنية سألت علية وعلى القصة ..