ما لم يكُن بالقلب عليم

البارت 48

سيف: هي طلعت من البيت وتدري بيا ما موافق على طلعتها، كسرت كلامي علمود شي تافه، وغيث ظل يحچي بس مجنت مركز، دماغي مشوش وبنفس الوكت ما ادري ليش توقعت راح تطلب الطلاگ !
دزيتلها رسالة وما ردت، اني هم عزت عليه نفسي، تركتها وما راسلتها
تمددت بالفراش الى ساعة ٣ كدرت انام شوية ..

نور: من ركبت بالسيارة عمر ابد ما حجة شي بس من وصلنا البيت گال
عمر: راح تكوليلهم جاية زعلانة ؟
نور: لا، وفدوة خلي الموضوع ثلاثتنا بس ندري بيه
عمر: وغيث ومرته ؟
نور: لا ميحتاج يعرفون همات
عمر: براحتج، يلا انزلي لعد وصلنا
نزلنا وفتنا للبيت بيبي فرررحو واستقبلتني من الهول وهي تگول هلا بيج بنيتي هلا بيچ، خالي جان دايصلي
وعمتي سلمى نفس الشي هم اجتي تحضني وتبوس بيه وبيبي تگلي سيف اخذچ وعمتي تگلي نسيتينا
ميدرون شكو بگلبي ..

المهم كعدنا وعمر نزل الغراض، خالي خلص وتسالمنا وصعدت فوگ على غرفتي القديمة بس دخلت سديت الباب وگعدت على الارض وحطيت ايديه على راسي ما ادري الي سويته صحيح لو خطأ بس حيل تعبت اني
ردت بس قطرة دموع تنزل حتى افرغ قهري بس مدا اكدر أبچي !!
دا احس الالم خانگني ومدا اكدر اطلعه، كل شي متخربط ومدا اعرف شلون ارتب الامور وشلون ارجع لحياتي السابقة لا دوام كلية مضبوط ولا حياتي الخاصة مضبوطة ولا علاقاتي مع الناس زينة أحس نفسي عايشة بصراع بس سيف لا يحچي وشهد لا تسوي هيچ
وميساء لا ترجع وتسوي هيچ وفلان لا يگول هيج، وهيج دا تمشي حياتي بلا هدف تعببت حيييل تعبت
شكد تمنيت لو عندي ام بعدها عايشة واحضنها واسولف الها على كل شي ولو عندي اب يوگف گبال اي واحد يطخني ولو بشعرة، شكد تمنيت عندي بيت اهل خااص بيا اني ما اشيل هم شوكت اجيهم وشوكت اشكيلهم ويستقبلوني بحب ..شكد تمنيت !!
وبقت حسرة بگلبي ..
ما ادري شكد ظليت بالارض گاعدة واتحسر بس فزيت على نفسي على صوت بيبي تصيحني على العشا
لعد شگد طولت اني !، غسلت وجهي اخاف احد يشك بشي وتركت خيباتي بالغرفة ونزلت عليهم، چانوا كاعدين كلهم وينتظروني، الكل ساكت، كعدت واكلت شوية بنص الاكل بيبي بحزم گالت
بيبي: وينه زوجچ، نور ؟
تركت الخاشوگة من ايدي مصدومة من سؤالها ومن نبرتها يمكن عرفت، او سيف خابرها وگال الها !
قبل ما احچي انقذني عُمر الي جان كاعد گبالي على الميز
وگال
عمر: بيبي سيف عنده طلعة لاربيل وما معلوم شگد يطول فخابرني گال روح أُخذها لنور ووديها على بيت عمي
محمد: شو ما خابرني وگلي ؟
عُمر: اي يابة مو گتلگم هو طلع مستعجل ويادوب خابرني علمور نور، وسلم عليكم
بيبي: وشكم يوم راح يبقى هناك ؟
نور: ليش بيبي، لهدرجة ثگيلة عليكم اني؟
گلتها بتوتر وانزعاج ومن صدگ انغثيت وحسيت محد طايق وجودي بهذا البيت راساً گمت من مكاني وگلتلهم بالعافية ..
وصعدت على غُرفتي واسمع بيبي تگول بنتي مو هيچ قصدي ..بس اني انجرحت وحسيت ما يريدون وجودي !
صعدت وتمدتت بفراشي والغثة ماكلتني أكل فزيت على دگة الموبايل فتحته، شفت رسالة من سيف على الواتساب
كاتب، شوكت ترجعين ؟
شفت الرسالة وما رديت وعرف اني شفت الرسالة بس ما رديتله
رجع ورا ربع ساعة كتب، وليش مدا تردين ؟ وهم ما رديتله
سديت الوايفاي وقفلت الجهاز حتى ما اشوف اي رسالة منه مو كافي لعب بحياتي لعب..يريد ارجع ! بالاحلام والله ..