ما لم يكُن بالقلب عليم

البارت 34

البارت 34

"البارت صادم مُقدماً"

اجيت افتح حلكي واكول اله شنو الي تغيير !!
بس سكتني باوراق منثورة بوجهي
بقيت بحالة صدمة وهو ما حجا حرف واحد بس تغبيره جان كفيل يدمر كل تخيلاتي نزلت على الارض اجمعهن للورق ومجنت اعرف دا اجمع مستقبلي واحلامي،ومصيري المكتوب اعيشه بكل حذافيره ..
جمعتهن و وكفت اقراهن ...قريت دماري
دماري ودمار حاضري ومستقبلي وماضيي
لهنا وانتهى كل شي بيا،وكل شي واجهته بنفسي بقوتي يلي خذلتني ..خذلتني واني اتحامى لاستجمع شتات ذاتي ..
قريتهن حرف جانت عن تحويل الملكية،توضح اني متنازلة تمامًا عن ورثي من والديي ووالدتي وحولتها لسيف اشرف احمد
توقيعي وبصمتي والاوراق كلها كاملة وكلها تثبت هذا الشي !!
انهمرت دموعي بضياااع اول مرة بحياتي احس نفسي ضعيييفة لهدرجة،مجنت اعرف شكول وليش وشوكتتت بس دموعي نزلت بغزارة ذبيت الاوراق ولزمت ياخة قميصه بانفعال
ليششش !!!!!! جاوبنييي ليشش !!!!!
مستمرة احركه اريد يحجي وهو ساكت
سكوته دمرني وحركني وحرك اعصابي،تركته ورجعت خطوات ليورا واني داخلة بصدمة ويباوعلي ببرروود
متقصد يدمرني،مسحت دموعي بسرعة واتجهت اروح اكول للكل بس سحبني قووي وكز على اسنانه وكال مو بس هيج !! باجر الساعة 9 الصبح المحكمة تنتظرتج
تنتظرني !!!!
تنتظرتج حتى تكونين مرتي "شرعاً وقانوناً"
دفعته من يمي بقوة
كل عقلك ؟؟؟ فهمنيييي كل عقلك تحجي انت ؟؟
لو اموت ما اسويها دا احجي واحس حريق بكَلبي ودموعي تنزل وحدة ورا الثانية اريد انهااار بس ما اكدر هو ما راح يسندني مثل كل مرة هو راح يدوس على انهياري وبكل سعادة،اردفت كلامي وكتله
اني رايحة اكول للكل على مهزلتك هذي،اجا باتجاهي وطلع من جيبه الموبايل فتح فيديو وانطانياه وانصدمت
جان الفيديو اني وريام بيه وجنت دا اكوللها نجحنا وطبيتي للعائلة،وغيث سيطرتي عليه وو دا اكمله وسحب الموبايل من ايدي بقوة وكال شرأيج ؟؟
تدرين هذا المقطع اذا وصل غيث شراح يصير بيج وببنت عمج ؟؟ تخيلي تتطلك بعد اسبوع زواج !!
وانتِ ؟ ربوج صار سنة ونص هنا واعتنوا بيج وبعدين تطلعين حيالة ؟؟ تخليتي بيبتج ؟ زين خالج الي ضرب الدنيا كلها لخاطرج !!
دا يحجي ويفر حولي ودموعي تصب اني منو سوا هيج شلون صار،بسس !!! راسي راح ينفجر من الصدمات الي تلكَيتها حطيت ايديه على راسي اريد يهدأ الوجع ماكو وسيف مستمر يحجي ببرود ويتسفزني ويستفز كل خلية بيا
كتله بانفعال شترررريد ؟؟؟
باجر ساعة 9 الصبح بالمحكمة ونفس واحد يا ويلج اسمع منج طالع !!
والا المقطع راح يدمر بنت عمج ويدمرج انت اول وحدة ! وين تروحين بعدين ؟ عند عمج الي ذبج ؟
كل كلمة جان يحجيها تجرحني وتنحفر بكَلبي
دمر كل شي بيا وكل شي جان حلو،دمر كل مستقبلي وجرحني وذكرني بماضي تعيس مالي علاقة بيه اني
هو هذا نفسه ااي شاركني بحياتي وطفولتي وحتى حب امي وحضنها !!
الوجع الي احسه براسي فظييييع،ردت بس اخلص كتله موافقة ..
مكال اي شي بس انسحب من يمي
بس راح طبيت لغرفتي وانهااريت تماماً،للمرة الاولى احس اني يتيمة ومعندي شخص يسندني ويساعدني
للمرة الاولى احس اني ضعيفة ومهزوزة ومكدرت اسوي شي وانقذ نفسي
السؤال الوحدي الي براسي ليش ؟؟ ليش سوا هيج ودمر حياتي واني الي بعمري ما فكرت أأذيه !!!
وليش اجذب على نفسي؟ المقطع اي واحد يشوفه حيطردني من حياته مو بس من بيته
يريد هالزواج يكمل قانونا حتى يدمرني ويعذبني ازيد وازيد انهاريت بالارض ولوهلة حسيت نفسي مريضة نفسيًا،المن اخابر والمن اكول ؟
تجرعت مُرّ الليلة لوحدي واني اقاوم نفسي ودموعي
ما ادري شنو الي ينتظرني بالمستقبل ولا ادري بيا وجه راح اقابلهم بس الي ادري بيه هو قضى على كُل شيء بداخلي حلو وكل شي بدا يسير بإتجاههُ ..
كعدت الصبح واني اساسا منايمة غير نص ساعة كضيتها فزات من قهري وحزني
لبست عباية هذي الي اجت كدامي وشال شون ما جان
حسيت دا اروح لجنازتي،مشيت بِبُطء ونزلت جان واكف يناظرني الكل نايمين بعدهم،ركبنا بالسيارة وما حجا حرف بس جان شعره مخربط وملابسه مخربطة مو مثل كل مرة ومبين سهران هو هم
يمشي ويضرب بالستيرن على اتفه شي واعصابه نار صايرة وصلنا المحكمة ووكفت كبالها مكدرت امشي حسيت هنا راح يتغير كل شي ..
شافني واكفة اجا سحبني من ايدي بعصبية ويدري بيا جاية غصباً عني
عموماُ طبينا للقاضي وكمل القاضي الامور الروتينية
جنت بس جسد بدون روح وممركزة حتى بشنو دا يحجي ولا هامنني،الجملة الي انتفض كل شي بيه عليها من كال انتم زوجان قانوناً ..
الي اعرفه لازم هواي امور تصير قبل المحكمة ا
مثل الفحص وغيرها بس ما استبعد هو دفع فلوس لكم شخص ومشوا اله الشغلة،شفته جان دا يحجي ويه اصدقائه الي شهدلوه،ردت ابجي بذيج اللحظة واطلع كل الحسرة والقهر بس مكدرت
ردت اكول هو جبرني يا عالم مو اني الي ته
ردت اكول هو دمرني ونهى كل شي بيا بس مكدرت
ردت اكول هواي حجي بس سكتت بالوكت الي جان صوتي ضروري
اني عايشة شعور بشع ويه نفسي وناسية اكو ناس حولي اجا هو وسحبني وكال على
السيارة
ركبنا حتى نرجع ونفس الحالة محد.حجا حرف
بس كضيتها اباوع للجام واباوع لحياة الناس ..
شكد هالحياة صعبة !!
شلت هم بيا وجه راح اقابل بيبي وخالو
الي بذلوا كل جهودهم حتى يشوفوني سعيدة !
وصلنا البيت أنقبض كَلبي،بس نزلت لزم ايدي بقوة وفتنا للبيت جانوا واكفين بالهول ينتظرونا والدموع بعيوني متجمعة بعيوني
بيبي:وين جنتوا ؟
خالو: ليش ادك على موبايلج مغلق نور ؟ عيوني بالارض ما اكدر اباوع بعيونهم ابد
خالو: جاوبينيي !!!!!
سيف: لان عقدنا محكمة ..
كال هالجملة وكأنهُ ضربني برصاصة،الخجل والعار
الي دا احسه فظيع،مجرد اتذكر ردة فعلهم بذاك النهار اخجل من نفسي ..
خالو: صدك تحجون ؟
مكدرت اجاوبه ابد ولا سيف جاوبه ترك كلشي على عاتقي،تقدمت بيبي تجاهي وكالت بنبرة حازمة مستحيل انساها
ااي دا يكوله صدك نور ؟؟
هزيت راسي بمعنى اي
مستحيل انسى جملتها كالت مع الاسف على تعبي بيج ..
بس جان منظرها ونظرة الحسافة بيها توجعني اكثر من الراجدي
هي هانتني بس ما تصل لدرجة اهانة حفيدها
سيف مشى وعافني بنصهم ما ادري شكوللهم واتذكر الفيديو ما ادري شلون وصله وليش مأخوذ منه بس الجزء الي يريدوه ممكملين تكملة الحجي
رغم بيبي سمعتني حجي بس راح سيف ارتميت بين احضانها بس دفعتني عنها حيل
اجا خالي يمي وكال ليش سويتي هيج ؟ مو انت الي جنتي تضوجين منه؟ مو انت الي توسلنا بيج حتى تعقدين وياه ومجرد جذبة !! اليوم من خلفنا تروحون تعقدون !!!! كال هيج ومشى ونفس الشي بيبي بقى بس عمر وامه
تقرب عمر يمي وكال نور اني وياج بس احجيلي ؟
رفعت عيوني عليه وباوعتله بنظرة حسافة ياريتني اكدر اكلك ..
بالكوة قويت نفسي وصعدت لغُرفتي ونفس وضعي ما تغير بس دموعي زادت،تجتني رسالة فتحتها جانت منه هو،كاتب تحضري العصر ينتهي وجودج بهذا البيت ..
شلت الموبايل وصفكته بالارض من حركتييي شيريد مني بعد شيريد !!!!!!
ساعة 4 العصر نزلت اشرب المي واني ممتغدية ما اشتهي ولا ليا نفس اكل ومحد تغدى اصلا الكل مصدوم ومتفاجأ من حدث الصبح
بالمطبخ اني وشفت هوسة بالهول وصراخ يا رب دخيلك ما اكدر بعد ..
رحت للهول جان خالي دا يصرخ على سيف وعمر وعمة يهدون بيه وسيف ببروده المُستفز
خالي: لك انت شلون الك عين تسويها شلون ؟؟
سيف: مبيها شي عمي !! قابل اول بنية تكون الثانية !!
تكون ثانية شنو؟ ما فهمت شدا يقصد !!! التفتت ارجع للمطبخ وسمعت خالي كال
ليش شناقصها تاخذ واحد متزوج اولى !!!
سيف: هي الي قبلت،مو صح ؟؟
سمعت الجملة وجمدت بمكانيي !!
يعني هو متزوج قبلي واني الثانية !! وصلت بيه الدناءه حتى ما كالي !!!! صدمني بنص الكل ودموعي اختفت اريد ابجي ما اكدر،احس نفسي عاجزة
كرر سؤاله وكال مو بموافقتج انتِ ؟؟ باوعتله بكراهية واستغراب وهزيت راسي بمعنى اي
شكوللهم؟. اكوللهم واحد جذاب ومنافق !!! واحد جذب عليه وسرقني وسرق كل مستقبلي !!
اجا خالي تجاهي وكال
ليش سوبتي هييييج ؟؟ لج طول عمري اكول عقلها اكبر من عمرها وفاهمة وواعية تاليها اتجازى هيج !!!
عمر: اكيد اكو شي خطأ نوور باعيلي واحجي لا تخافيين،ليش سويتي هيييج !!!! ليش وافقتي من ورانا وفوكاها زوحة ثانية !!!
ما حسيت على ضربة سيف لعمر ووكعه بالارض وكاله لا تتدخل بيني وبين مرتي !! كام عمر ودفعه
بس عمة سلمى دخلت وسيط بينهم وخالصتهم
ودموعي تنزل واحس راح افقد السيطرة على نفسي خلصص
سيف صار لوحش وتعادا ويه الكل،صار يتصرف بخشونة،باوعلي والدم ينزف من كصته لان عمر ضربه بالخاتم الي جان بيده،كال وين جنطتج
من بين دموعي وحسراتي كتله فوك ..
راح جابها وجر ايدي نطلع
خالي: ويين رايحيين ؟؟؟ انتوا شنو حاسبين نفسكم ؟؟ وين كاعدين احنا تاخذها وتطلع بلا طلب وبلا اذن
سيف: هي مرتييي !!!! و وين ما اروح بيها براحتي !!
سيف: تذكر شغلة بس تطلع من عتبة هذا الباب مالك رجعة هنا وانتِ !
انتِ نفس الحجي بس تخطي رجلج مالج مكان هنا ابداً !!!
سمعت كلامه وانهاريت ودموعي ما انتهت
ما اكدر احجي ليش ما اكدر احجي الي اني بيه
ما اكدر احجي حسراتي ووجعيي،خسرت كل شي والأهم خسرت الببت الي حوانب ورباني وبفضله كل شي سويت !!
خنتهم وخسرتهم،اكثر من هالخسارة !!!! يا اما اعرض حياتي وحياة ريام للهدم تمااااماً يا اما اخسرهم
وبالحالتين اني خاسرتهم خاسرتهم
سكتت محجيت شي لكلام خالي بس فزيت
على سحبة سيف سحبني قوي وركبنا بالسيارة واسمع عمة تريد تجي تودعني بس خالي منعها وصرخ بيها ..
وصلت لبيت اول مرة اشوفه،جان مو حيل جبير يعني وسط مساحته زينة طابقين
طبيت جان كامل من كل شي وصلت الهول ذبيت جنطتي سمعت صوته كال بخشونة مكانج فوك !
صعدت فوك جان شي مقررف
ابدا مو كامل وفارغ وبيه ثلاثة غرف بس وحدة منهم بيها سرير وقديم،استنكفت على نفسي اني حعيشش هنااا !!!!!!!!!
دا افكر وحسيت عليه جاي باتجاهي يتقدم،تنفست بعمق وقويت نفسي وكتله شدا تسوي؟؟
مجان يردلي بس مستمر يتقدم رجعت كتله نفس الجملة جان دا يباوعلي ببرووود يقتل،وابتيامة انتصار وفوز
استحقرته واستحرقت اليوم الي جمعني بيه،صار قريب حيل غمضت عيوني وقلبي يلهج بالدُعاء
فتحت عيوني على صوته وهو يكول
لا تخافين ما المس وحدة مثلج ..
كال هالجملة وابتعد عني..
حسسني انسانة رخيصة،انسانة بدون كرامة،انسانة بدون احترام
للمرة شكد يجرحني !! للمرة شكد يأذيني !!
وصل يم الباب كتله راح اعيش بهالقرف !!
اي تعيشين ! ضرتج جوا مُكانها وانتِ هنا ..
ضرتي ؟ صحيح ..نسيت جذبك علّية
احجي الي تردينه ما يهمني ! سويت الي اريده واكثر ..
كال هيج وطلع وسد الباب
كعدت بالارض محتمية بنفسي،ودموعي ملجائي
طلعت من بيتي بهدومي وورثي وطلعت من بيت خالي بجنطة ملابس بس !!
كل شي انسلبت انييي !!!! الغرفة باردة جنا بالشتا وماكو لا صوبة ولا مدفئة ولا أي شي الدنيا برا تمطر واني جسمي برود ابرد بسرعة،ردت شي ادفى بيه ماكو ثلاثة وجبات اني مماكلة ونفسيي بعدها مسدودة متحملت برودة الكاع وهي حتى ممفروشة طلعت بهول الطابق الثاني وانصدمت سمعت صوته ويه مرته !! يعني صدك ؟ صدك اني تزوجت وثانية !! صدك انتهت حياتي بهذا الشكل البائس !! استحيفت على نفسي اني الي جنت مدللة اواجه كل هاي الظروف بعمر ال 19 بس !!!
رجعت كعدت بالظلام بالغرفة الي كل شي بيها يوحي بالخوف والبرد كعدت على السرير الي شبه جان ويتكسر بدفعة
فتحت جنطتي شكو شي لبسته وبعدني بردانة
عشت كأبة وحزن عمييق دمر أشلائي،جنت بكل دقيقة اموت وأحتييّ
يمكن صارت الساعة 12؟ ما ادري حتى موبايلي طفى وماكو ساعة ولا اكو ضوا حتى اعرف شكد بالضبط
من تعبي وعيوني الي هلكت هاي يومين غفييت وياريتني ما غفيت فزيت على صوت قوي حييل بالغرقة خلاني ارجف،وايديه ترتعش
باوعت وانصدمت !!!!

يتبع ...
ارائكم ؟ وتوقعاتكُم ؟؟