ما لم يكُن بالقلب عليم

البارت 5

البارت الخامس
دكيت عليها مرتين وثلاثة ماكو رد،خفت هواية عندي رقم زوجة خالها دكيت عليها ورحبت بيا طلبت منها تنطي الموبايل لنور الصوت جان ما واضح،بعدين سمعت صوت نور عن قرب ارتاحيت جنت خايفة لا صايرلها شي !
ريام:نور وينج ؟
وياج ريام
شبيه صوتج نور ؟ احجيلي الصدُك
مابيه شي شلونج انت
نور باعي ادري بيج مو زينة بس لخاطري فكري لمرة ..لمرة وحدة بس ! فكري انت محظوظة عندج خال كدر يطلعج وينقذج من ناس جانوا راح يبوكوج وفوكاها ينطوج لأقرب واحد ! اشكري ربج وبالاخير هذا لعبة وتنتهي عن قريب فكاغي تشيلين هم وتكبرين الامور
نور:دا تحجي ريام واثناء حجيها تذكرت طبت سيف وكلامه !!
نور وينج ؟ مودااحجي وياج ؟
وياج
ابدا مو وياي،تعالي اكلج منو هذا الحلو ؟
منو ؟
لج عمامج اجوي واحد من عدكم وصلهم منو هذا؟
ما ادري مشفت
ابقي ابقي هيج ..لج دا احجي صدُك واحد طويل وأسمر وضعيف
سيارة بيضاء؟
اي اي هو،جان بسيارة بيضاء هذا منيللكم ؟
هذا ابن خالي عُمَر
اي وهو شلون ابن خال !
شو صايرة عينج زايغة شكو؟
دا اشاقة وياج حبيبتي اريد اونسج شوية،اكول رجعتي لدوامج ؟
اي داومت اليوم،واخذنا تحضير
يلا لعد روحي اقري اريدج اولى كالعادة،ادري انت سبعة وتجيبيها،ها ولا تنسين عود سلمينا على عمة سلمى وأبنها
يلا سلمينا ..
ابتسمت على خفة دم ريام،هي دا تحجي هيج حتى تغير إلي الجو شوية،صدُك بس هي ألي تفهمني بالحياة وتساعدني وبقلب أبيض وصافي ..
دعيت تسهل علية الأمور طلعت كُتبي وكعدت أقرأ وتناسيت كُلّ شيء
مرت الايام بين دوامي وبين البيت وبيبتي وعمة سلمى شايلين أغلب شغل البيت علمود قرأيتي،سيف نادر أشوف يطلع الصبح ويرجع بليل وأني هم أتعمد أختفي لا اربده يشوفني ولا اشوفه.. اليوم حيجون بنات خالي محمد من البصرة هن متزوجات وكُلّ ستة أشهُر تقريباً يسوللهن زيارة عندنا
حضرنا كل شي ورتبنا اجوي مدائن ومسرّة واطفالهن
اني منزلت بالبداية استحيت شوية
تقريباً ورا نصف ساعة بيبتي صاحتني نزلت جنت لابسة قفطان أحمر بسيط وحيل مُناسب وكُلش حسيته لايكلي وحجاب عليه،اول منزلت فتحت باب غُرفة الإستقبال صار بوجهي سيف
جان كاعد بالصدر وعلى صفحة خالي وازواج بنات خالي
سلمت على مسرّة ومدائن اول ما شافوني حظنوني حييل
مسرة:كبرانة وصايرة عروس !
مدائن:أي باعيلها يا ماشاءالله
بيبتي:خجلتن البنية تعالي أُكعدي يمي
رحت كعدت يمها وكالعادة الرياجيل بدوا يحجون بالسياسة وصراحةً اني حيل احبها واتابع هيج أمور بس خجلت اتناقش ويا خالي كدام الكل فالتزمت السكوت قاطع تفكيري صوت رجولي صوت ..صوت سيف وهو بدا يناقش زوج مدائن بكُل ثقة !
صار وكت العشا صبينا وشلنا مدائن ومسرة ساعدوني ومقبلوا اغسل لوحدي
عمومًا خلصنا ارتاحينا شوية
سيف : خالي محتاج شي ؟
وين رايح ابني؟
صديقي خابرني لازم اشوفه علمود الشغل وباجر هو طالع للبنان ولازم اوديله الملفات
انت شوكت ترتاح ؟ من الصبح الى الليل بس شغل !
طالع اجيب الملفات من غُرفتي
غيث"زوج مدائن" تعال تعال احجي وياك ..نور هسة تجيبهن
نور تعالي جيبي الملفات من غرفة سيف
بس ! ما اكدر ..اقصد ما اعرفهن !!
اني اروح اجيبهن
لا سيف اكعد عندي موضوع وياك نور موجودة
شلونهن الفايلات ؟
بغلاف أصفر
نور: غيث يصير زوج مدائن عُمره ثلاثين سنة تقريبا
من زمان بيبني وبينه حجي إعتيادي،اليوم احرجني بشكل من كال على الملفات .الكل يدري احنا علساس العلاقة علاقة اخوة او عادي كابن خال لكن محد يدري العداوة إلي بيني وبينه
اضطريت تحت كلام غيث اصعد فوك ترردت ادخل لغُرفته دخلتها وفعلاً جان أكو الملفات اخذتهن وطفى الكهرب ! جان اكو مثل الشمعة محطوطة بِكُزاز مثل الكوب،عمومًا الشمعة جانت شغالة تقربت شلتها بيد والملفات بيد ثانية دا امشي وصلت للباب وانطخيت بيه الشمعة وكعت على الملفات حركت اطرافهن
والكزار تطشر على الأرض وطفر على أيدي جرح إيدي حيل واجا الكهرب وبنفس الوقت اجا سيف
اجا معصب جان وشاف الملفات طرفهن محترك طش غضبه بيه
سيف:طبيت شفتها بباب الغُرفة والكزاز بالارض الملفا واكعة بالارض وطرفهن محترك
انت شوكت الواحد يعتمد عليج ؟ هن ملفات مكلفتي نفسج تجيبيهن مثل الناس ؟ طول عمرج تبقين فاهية وبلا تركيز
حجيت وياها وهي ولا باوعت بوجهي اموت واعرف ليش متباوع ؟ كلما اشوفها تتصرف وكأنهُ أني مموجود نِهائي،ادنيت اخذ الملفات من الأرض لمحت أيدها دا تنزف وهي حتى ممتوجعة !!! وواكفة وكأنهُ لا اني الي حجيت وياها هيج كلام ولا هي المجروحة ايدها وألم الكُزاز يصير قوي !
تركتها ومشيت رحت على صديقي ..
مدائن:بيبي وينج ؟ نور يمج ؟
غيث:لا طلعت فوك ومشفتها بعد
مدائن :هسة طالعة اشوفها
مدائن : طلعت فوك وشفت نور بغُرفتها كاعدة عل سريرها بصمت تام وإيدها دا تنزف
نور شبيج ؟ شبيها إيدج ؟
مدائن سألتني واني مجاوبتها جنت احس اني بغير عالم تمامًا،إلى أن حسيت على هزتها إلي
ها مدائن ؟
شبيج حبيبتي شبيها إيدج ؟
ها ! لا مبيها شي لا تخافين
شنو ما بيها شي ؟ باعيلها دا تنزف الجرح عميق تعالي اضمدلجياه
لا ميحتاج والله هي تطيب
شنو هي تطيب ؟ تعاي يلا
مدائن : اخذتها لنور على صفحة وضمدتلها جرحها
عادي اسألج سؤال ؟
باوعتلها بوجه مُبستم..اي تفضلي؟
شبيج انت وسيف ؟ ليش دا احسكم مو طبيعين ابد !
شنو ؟ لا شكو قابل اطمئني ماكو شي
نور !! صارحيني شبيج وياه ؟ هو نزل جان متعصب وانت هيج وضع ايدج،شصاير؟ واكثر من مرة ملاحظة اني المكان الي هو بيه انت تختفين منه !
مدائن صدُك عندي قراية وإمتحان اترخص ما بقى وكت
مدائن : سالتها لنور وجان واضح عليها التردُد وتهربت بأي طريقة واني هم عفتها بعدين أعرف شصاير نزلت جوا كعدت ويه امي ومسرة نيمت جهالي وسألت امي على سالفة سيف ونفس الحجي كالت انه ماكو شي بيناتهم !
سيف:رحت بدلت الملفات من الشركة بسببها وبعدين رحت انطيتهن لصديقي ورجعت على البيت،طبيت على الغُرفة الكُزاز بعده مطشر بالأرض وفعلاً الشمعة واكعة،صحت ماريا"المُنظفة بالبيت" لمتهن وطلعت
تمددت على سريري،أني شدايصير بيا ؟
ليش كلما اشوفها انفجر بوجهها واغثها واطلع !!
نور:معدت الصبح اليوم يوم نتائجي ومتوترة طلعت بدون ريوك حتى اجاني خطي ورحت استلمت النتيجة وجنت طالعة من الاربعة الأوائل حيل فرحت
مها:نور انت زينة؟ باعي وجهج شلونه
لا مبيه شي بس لان ما اكلت فتعبانة هسة حيطي ابو حيدر وارجع للبيت لا تخافين
مها:لتخلين بالي من ترجعين خابريني عفية
سيف:نزلت اتريك بيبتي مجانت موجودة رايكة لبيت عمة سلمة اختها جاية من الحج وخالي بالشغل وموجودة بس ماريا دك موبايلي شفته رقم عمر
عمر:سيف وينك انت؟
بالبيت شبيك عمر؟
باوع ابوية وينه ؟ ادك عليه ويطلع مشغول
خالي بالشغل يجوز دا يخابر احد،صاير شي ؟
عمر اني بالجامعة ابو حيدر دك عليه مستعجل يكول ابوك دا ادك عليه وماكو وبنتكم فاقدة الوعي ! واني مااكدر اروح عليها الجامعة بعيدة
على كيفك عمر منو تقصد ووينها هسة انطيني رقم الخط
لك شبيك دا اقصد على نور ابو حيدر يكول ما اكدى اجيبها لوحدي وهي فاقدة الوعي وهسة هي بغرفة الادارة بمدرستها،فدوة روح عليها ولا تكول لبيبتي هسة يجوز تخاف حيل
هسة اروح ..
سيف:رحت على المدرسة جانت فارغة تقريباً طبيت للإدارة استفسرت عن المديرة ،هي استغربت بالبداية بس عرفتها عن نفسي وطلبت اخذ نور هذا الحجي كُله واني لسه مشايفها لنور ولا اعرف هي وين حاطينها
المديرة رفضت حيل لان البنت امانة حاولت اقنعها ماكو ..ملكيت حل غير انه اتصل بعمة سلمى هي تعرفها خابرتها وفهمتها وانطيت الموبايل للمديرة نوعا ما اقتنعت لان تعرفنا وعرفت اني جاي بصيغة ابن خالها طببتنا للغرفة وشفتها جانت على القنفة محطوطة وبنصف وعي تمامًا
تقربت منها بِلُطف حاوطتها بين إيدي وشلتها للسيارة وهي بعدها فاقدة الوعي رشيت عليها قطرات مي وبلا فائدة وصلت البيت حليت حزام الامان عنها
طبيت
ماريا بسرعة جيبي جهاز قياس الضغط وكلاص مي
حطيتها على القنفة بالهول قست ضغطها فعلاً جان حيل هابط
خابرت على مسرة
مسرة انت وبيبي هسة تجون
شكو سيف شصاير؟
مسرة نور فاقدة الوعي واني لوحدي بالبيت تعالوا شوفزا شبيها وشمحتاجة
شوكت فقدت الوعي؟
مسرة مو وكت الحجي هسة،استعجلوا
اي اي هسة مسافة الطريق وبس ..
خابرت مسرة وجبت كُرسي وكعدت بصفها انتظرت يجون بلحظة شدني الضماد بإيدها تذكرت ليلة البارحة وشون بهدلتها !! رفعت نظري على ملامحها اكتفيت بس بمُراقبتها قاطع تفكيري صوت بيبي تلقائياً أني ابتعدت واجتي بيبي عليها خايفة
بيبي لا تخافين ماكو شي خطير،بس قست ضغطها وعندها هبوط حاد
مدائن:بس الهبوط مو يخليها هيج لهدرجة فاقدة الوعي ! اخاف بيها غير شي؟
بيبي: جيبوا مي
سيف:دك موبايلي حسن دا يخابرني طلعت بالكراج احجي وياه خلصت مكالمة طبيت شفتها رجعت لوعييها شوية
بيبي:كومي نور اخذج للدكتور
بيبي مابيا شي ما أروح
مسرة:ماكو هيج حجي،مدائن خابري غيث يحجز عن دكتورتج
لا مسرة ما اريد،ما اروح
مدائن:انت مدا تشوفين وجهج شكد اصفر وتعبان ؟
نور:مي،محتاجة مي
طلبت مي وانمد إلي كلاص مي من إيد سيف ! اخذته بتردُد
بيبي والله صرت زينة
ليش تقلقيني عليج روحي للدكتور بنتي
بيبي!!
مسرة:نور اليوم مجنتي رايحة للنتائج ؟
ها اي صدُك،دوختي نستني اكوللكم..طلعت من جنطتي النتيجة وانطيتها لبيبتي شفت ملامح الفرحة عليها ونفس الشي لمسرة ومدائن حظنوني وهُم يباركولي
مدائن:اني كايمة اسوي غدا لإن تأخرنا حيل اليوم وانت سيف تعال كم دقيقة وياي
مدائن:شبيك سيف مو على بعضك ؟
ما بيا شي بس شوية تعبان من الدوام
سيف اصدقني القول،شبيك ؟ نور منو جابها؟
اني جبتها،ليش؟
ماكو شي،عفية خابر ابوية خلي يجي على البيت من وكت
هسة اخابره..مدائن سألتني وحسيت من عيونها أكو قلق !

يتبع ..
شاركوني بأرائكم بالقصة وتوقعاتكُم للأحداث القادمة ؟
القصة من هذا البارت أبتدت فعليًا،الأحداث الجاية أفضل ..
______
ريام الزُبيدي