ما لم يكُن بالقلب عليم

البارت 30/مُفاجئ

بارت 30

طلعت وسديت الباب بس طلعت لزمت نفسي دا تنفس بشكل متسارع،دا أحس بشعور غريب ..كَلبي دا ينبض بشكل رهيب !!
رجعت لغرفتي وكلامه يدور براسي بقيت اتكلب الى ان نمت،كعدت ثاني يوم من وكت ورجعت اقرأ بقوة ونشاط بالتالي هذا مستقبلي ومستحيل اجازف بيه بعد على رغم كل الي بيا درست الى ساعة 12الظهر ونزلت اساعدهم بالغدا وشوف شيحتاجون،تفاجئنت جانت عمة سوسن وميساء وسناء وهي ميساء اصلا صايرة مقيمة عدنا محجيت شي بس سلمت عليهن وجان سلامهن بارد ما عدا سناء شوية احسن منهن درت راسي وللمطبخ احسن مكان بعيد عنهن جانت عمة وسيف كاعدين
سيف شو مدايداوم هاي شكم يوم اضيعه الكاه بالبيت ! ما ادري على شنو يتبشبشون مسمعتهم،بس شفتهم سكتوا كتلها عمة شعجب جايين ؟
نط سيف كال اني عزمتهم ..
يكتت محجيت شي اضافي صار وكت الاكل وعادي صبينا وكملنا،خالو كال،نور جاي من ايدج
اي خالو تدلل
عطالله: حطيله هيل همات
بعيوني رحت اسويه بالمطبخ اني وطب غيث هم جان وجهه تعباااان وجنه مكضيها سهر باوعلي وسلم سلام بارد،اكو شي غررريب،سيف هم تعبان هالايام وكلما احد يحاجيه يكول تعبان وميحجي ليش،وغيث هم،مدااعرف هذا البيت شبيه فعليًا ..
مر الوكت بين سوالف بيبي وعمة سوسن الي مداتباوعلي حتى ولا قبلت تشرب الجاي لان اني الي سويته وبين ميساء ونظرتها الي ما اعرف شفسرها !! وبين ذاك الي موزع عيونه عليّة وعلى ميساء بس لو اعرف شدايدور ببااااالك !!!!!
ترخصت اكمل قريتي وراي امتحاني،كضيتها بين اليوتيوب وبين صديقاتي يدزولي ملخصات وبين لني اقرأ والخص والحمدلله كدرت اسيطر شوية،جنت فاقدة الأمل أنجح هالسنة بسبب الاشياء الي تراكمت عليّة بس الحمدلله دا اكدر اعديها باوعت للساعة ساعة 5 ونص العصر كمت مكاني،وسمعت صوت خالو دا يصيحني كتله ايي خالو جاية
نزلت وتفاجئت جانوا الكل واكفين بالهول مجتمعين ودا يباوعولي من نزلت من الدرج،تلقائيًا الواحد يخاف حتى لو هو بريئ وممسوي شي ..
نطقت واني مترددة صاير شي،خير ان شاء الله !
تقدم سيف كال ايي كل الخير،بما انكم مجتمعين فخليني اشوفكُم فيلم قصير
طفى الضوا وشغل شاشة البلازما ..
مستحييل انسى الي صار بهذا اليوم،مستحيييل انسى
سيف شغل البلازما وياريته ما شغلها،بدت تعرض الاشياء المخباية الاشياء دا احاول اتناساها كل يووم كل يوم انطحن ويه نفسي وشعوري عسى ولعل انسى الجزء الي تدمر من حياتي ،الشاشة بدت تعرض اليوم الي ميساء اجتي على بيتنا ولاكت سيف من الصبح،وعرضت الموقف من جانت خلفي ودا تراقبني وبعدين ...بوحدة من المواقف جان بيدها حباية خلاتها بكلاص العصير،وقدمته لسيف اييي تذكررت !!! نفس اليوم الي تغدينا بيه،وبعدها طلعت هي من البيت،والكاميرا ما صورت شي هنا،اللقطة الي بعدها صورت من اني طلعت،بدون وعي نزلت دموعي وتذكرت حادث ذاك اليوم وبعد هالطلعة شلكيت اني ! طفى سيف البلازما وحول على غير فلاش ورجع شغلها،كاا جملة وحدة، ..
ياريت تلزمون نفسكم هنا ..
اشتغل الفلاش وعرض جيتي على الصيدلية وقرب التصوير من جنت خايفة ومستعجلة،اللقطة الي بعدها من طلعت من الصيدلية وكَابلتني المرّية وتذكرت كل شي عشته وكل الالم رجعلي والجروح الي سديتها انفتحت !!
غمضت عيوني بقوة ومترجية يطلع كابوووس وراح اكوم منه حسيت الدنيا وكفت بيا،مابعد اكدر اوكف على حيلي بقوتي،بس حسيت عليه هو اجا وكف يمي ولزم ايدي وجنه يكلي، تحملي بس ..
ماسمعت غير شهكة بيبي وصراخها من شافتني اني ودا ياخذوني ..
رفعت نظري جانت ميساء يم امها واقصر اذا اكول وجهه كركم مو بس اصفر ! جانت بشكل مرعوبة استئنفت تفكيري وباوعت للشاشة،جان ظاهرة اللقطة الي ذبوني بيها على الشارع !! الي ذبتني جانت مرية بس اني ماكدرت اميز بسبب الضرب والالم الي عشته جنت فاقدة الاحساس والتميزز بس بالتصوير ..التصوير ضربنا كُلنا بصاعقة وعت قلوبنا وعقولنا وعيوننا !! الي ذبتني جانت ميسااااء !!!!!!
بدون وعي نزلت ايديه وتراجعت خطوة للخلف والبيت انكَلب الكل صار يحجي ويصرخ وهذا الي يكول شنو هذا وهذا الي يسال سيف شدايصير الكل واني الي رايحة لغير عالم،الرؤية احسها بدت تتلاشى وشوية شوية انعدت،ما اعرف شلون وشوكت وكعت بس هو سندني ورجعني على الطخم والكل التم على راسي ذبوا مي وصيحوني،شوية وعيييت،راسًا سيف
دقيقة ! الفلم ما انتهى بعدد !!!! راح مشى اللقطات بعد وطلعها من حطت الملح بالكهوة البارحة جانت طالعة بوضوح،وقف الفيديو وحول على الصور،وعرض صورة ميساء وبيبي قبل ثلاثة اسابيع وقرب الصورة الي جان بيد ميساء جان مااااالتي !!!!!
ورجع طلع صورة قديمة حييل بيها اني وياه وامي وجنت لابسه نفس الخاتم !!
الكل باوع على ميساء حتى امها،سيف سد الشاشة وتقدم باتجاهها وكال ووكت الي خليتلي المنوم الي شبه يشل درتي راسج ورحتي لبيتكم وبهاي الاثناء مجان كدامها هدف غير انه تطلع نور تجيب العلاج لان مبين الوضعية مو بس وضعية منوم ..ووكت هي طلعت من الصيدلية لعبتي لعبة ذكية وجبتي مرّية تاخذها بحجة وهمية ووكت تقربت هي انفردتوا بيها واخذتوها انت وياج الشباب الي محد يعرف من وين تعرفيهم !!
عطاللة: سيف شدايصير اني داخل بدوامة مداافهم
ميساء: يابة يجذب علينا كلنا والله جذب ماكو شي حقيقي
سيف: لحد الان ساكتلج احترمي نفسج !! اني اجذب والتصوير هم يجذب ؟ لو انت ماهرة بالجذب وتعرفين كل الاساليب والحيل ..
ميساء: انت طول عمرك حاطط راسك براسي وتريد تثبت اني غلطانة لك شلوننن توصل لهدرجة بحيث تلفق عليّ مقاطع !!!!
سيف: تلفيق مقاطع !! خل يتفضل اخوج ماهو اختصاص حاسبات ؟ ويشتغل بهاي الشغلة،خل يتقضل يكولولنا نكدر نركب فيديوهات ؟
محمد: غيييث شبيك احجيي !!!
الكل دا يباوع لغيث وغيث منزل راسه وما حجى حرف
سيف: ويا ذكية عبالج ما اكدر اوصلج ؟ اني بكل دقيقة شاكك بيج وشاكك بنواياج وبحثت جوا الكاع هم حتى الكى دليل لدنائنتج ..
عذبتيها اسبوعيييين !!! اسبوعين شوفتيها الويل بسبب غيرتج وحقارتج ودنائتج !!! ومو بس هيج بس رجعت حاولتي تأذيها هم وما كفيتي عنها ليشش !!!
عطاللة: ميسااااء باعيليي !! صحيح ؟
خالو صرخ بيها ورج البيت رج وبيبي كاعدة وتبجي وعمة سوسن كاعدة بس تباوع مصدومة من بنتها
ميساء بكل عين صلفة تباوع لابوها وتحلف جذب هم انها بريئة وما سوت شي وسيف يفتري عليها
اجا عمي وكف كبالها هو وغيث وسيف زاد النار حطب وكال وما اكتفت بهالنذاالة !! حتى تسمم الامعاء جان بسببها هيي
هي الي حطتها المادة القوية بأكلها بيوم زواج قبس
سيف بس كمل جملته ما حسينا الا على صوت الراجدي ..
خالي واكف كبالها وضربها بكف اني من يمي حسيت بيه
كال جملة بس ..يا حسافة السنييين الي ربيتج بحضني ..
ميساء دموعها ما نزلت حاى وبعد الراجدي انتفضت راسًا وكامت تحجي وتصرخ،ايييي اني سويت كل هذا ومستعدة تسوي اكثررر،لك انتت ضربتني ذاك اليوم بسببها هي ( وجهت كلامها لسيف)
كلما تصيرلك فرصة تحسسني بعدم اهميتي وبس هس الها اهكية بس هييي الي تهتملها وتباوعلها لك اني كضيت عمري اركض حتى احد يباوعلي،بالاخير بس ماتزا اهلها اجتي واخذتك واخذت اهتمامك وحرصك واخذت بيبي واخذت الكلللل !!!!!
من جنت جاهلة وبس نور بس نور بس نور المبجلة واني ولاشيييي
اني اكرههاا ومستعدة ادمرها أكثر وأكثر،اني حاولت اشوه منظرهااا حتى محد يباوعلها بعد لا انت ولا حتى غيررك،حاولت ادمرهااا وأأذيها واشوه ايديها وكل شي بيهااا بس مع هذا بالعرس هي بس الي لفتت النظر وكلهن اهتموا الها بسس !!!
جنت دا اباوع ومصدومة كل هذا الكرره الي ؟ اني الي ما اذيتها بيوم من الايام،جنت اخذ النستلة واقسمها نصين نص الي ونص الها،جنت اخليها تفوز حتى تفرح باي لعبة حتى لو اني اخسر،كبرنا واهي بقت بطبعها الي تكرهني بيه وبقيت اني الي اتجنبها وما أاذيها،ما اذكر فد يوم جرحتها لو حاولت اخذ مكانها مثل مداتكول،من لما اجيت وجنت اشوفها هي ومحاولاتها حتى تقلل مني وتجرحني وخاصة بعد ما رجعت من خطفي وجنت اغلس وما ارد بس اليوم !!
اليوم انصدمت بالكره والحقد الي عامي كلبها وعيونها !! فزيت من تصادم الافكار براسي على صوت راجدي ثاني جان من غيث،ضربها بشكل اقوى وجر شعرها وهي بكل عين صلفة ولا بجت حتى !!
غيث: اني شلون جنت حامي نماذج العفو بذيئة مثلج !!! لج افضل تموتين ولا تكونين عار انج اختي بحياتي جاوبته لك حتى انت شكد احقد عليك !!!
طول عمرك مسوي نفسك البطل بعين ابوك وتاركنا كلنا،وابوك الي لاحكك ركض،طول عمري احقد عليك واتمنى ادمرررك حتى زواجك اني خررربته
شو هي كالت هيج ولزمها يضرب بيها بقوة اني من يمي انتهييت وكلت خلص راح تموت بين ايديه بس سيف جان واكف وماعنده ردة فعل باوعتله
كتله سيف عفييية !!!
خليها تتأدب
سيف راح تموووت عفية وكفه !! بيبي وكلامها والكل داصرخ وغيث فقد اعصابه وهو اصلا انفعالي ونهاها نهيي كلت مستحييييل تطلع سالمة
سيف البنية راح تموتت
شنوو انتِ ؟؟ لج هي السبب بحالتج ووضعج وتردين نتركهاا !!!!
سيف نتناقش بعدين بس وكفه عفيية
واخيرا قبل يسمع كلامي وراح جره لغيث بالكووة وبعده عنها بس جره محد راح ساعدها ودمها جان دا ينزل من ايديها الي نجرحت وجبينها انجرح هم وشعرها انكفش ووضعها اسؤء من السؤء،مشيت اني لوحدي بإتجاهه مديت ايدي على جرحها دفرت ايدي بقوة و وكفت على حيلها وكالت لا تعتقدين حنغر بسوالف البراءة والانسانية مالتج !!! حبقى وياج وبكابوسج واحلامج وابقى بالصورة المرعبة ااي راح تدمرج
قاطعتها واستجمعت قوتي وكلتلها،الي ترديه سويييه الي دا اسويه اني لوجه الله والفرق بيني وبينج واضح،الفرق اني الي اظن خير بالناس وانتِ الي تدمرين نفسج بالظن السيئ،يمكن اكون حاقظة عليج وعلى اذيتج بس صدكيني ولا يوم راح أاذيج مثل ما انت سويتي ..
حسيت على ايدي انجرت باوعتلي عمة سوسن وكالت ابتعدييي عن بنتييي كَلبتي البيت كله ضدها انت وبنت عمج سحرتوا ابني واخذتوه منيي
نور: عمة شدا تحجين،احنا ناس مؤمنين شنو سحر شنو اخذناه!! وبنتج مو اني الي لفقت عليها تُهم هذي حقيقتها،شالت ايدها ح
تضربني بس سيف لزم ايدها وكاللها خليني محترمج خالتي لهنا وبس ..
اني تحملت تفاهاتكُم وخططكم جنكم مجرمين دوليين،وتحملت تجاوزكم وقلة احترامكم بس لهنا وبس ..يفضل تطلعون من البيت بنفسكم ..
ميساء: عوفيه يمه خل يبقى عبدها لنور هي كالت هي الجملة وهو كاز وذبوا عليه وكال مررتي !!
مرتي هي،سؤاء عجبج او لا !! على الاقل محاولت تأذي احد وتكون وصمة عار مثلج !!
سوسن: وانت مصدكها !!!
سيف: اثق بيها اكثر من اثق بيكم،صدكيني ..
جنت واكفة واسمع الكلام واحس كل شي حلم وكل شي كابوس،الكلام الوحيد الي انطبع بذاكرتي هو كلامه ..بس جملته هي الي انطبعت بدماغي،معقولة !!!
مجنت اعرف شراح يصير،بس الي اعرفه هذا اليوم كَلب حياتي 180 درجة ..
خالو عطاللة راسًا كال هاي كدامكم كلكم اني اتبرأ منها ومن امها،وحضري نفسج الطلاك راح يوصلج بعد شكم يوم
بقينا نباوع بوجهه لهدرجة !! ما ردت تخرب بيوت بسبب فكتله بس خالوو
كال لا نور ذني تجاوزن الحد وما خلن حد اصلا وما يشرفني ببنت عار وزوجة تركض خلف القطيع وتتستر الها هم
شالن غراضهن وطلعن من البيت بس سناء بقت الكل رجع كد لمكانه بس غيث جان منصي راسه تقرب من سيف وحضنه قوووي
غيث: اسسسف،اسف سيف
سيف: مصار شي
غيث: اني خربت علاقتي وياك لانك اتهمتها ذاك اليوم بس مجنت متخيل راح توصل لهدرجة من الحقارة والدنائة،هوايي اسف
سيف: اني ما اريد اخسرك انت اخوي وجزء مني،والخطأ وارد بين الاخوة وحتى العركات،فأنسى وروح تواصل ويه خطيبتك شوكت نفرح بيك
غيث رفع راسه والضحكة على ملامحه بس عمي عطالله كاعدة على صفحة والكل اصلا مصدوميين الا خالو نطق وكسر السكوت وكال سيف شوكت لكيت كل هذا ؟
سيف: عمي اني مجنت اروح للدوام اصلاً،جنت اروح وابحث بمل زاوية هي مرت بيها وحتى رحت وطلبت من المحلات الي جانت يم الصيدلية حتى ينطوني التصوير اكيد رفضوا بس قنعتهم هي ذكية بس مو اذكى مني،هي ما فكرت اكو كاميرات ببقية المحلات هم،وحتى من رجعت نور،كتلك يابة الكاميرات عاطلة وابد مداتصور،جان جذب ..
ميساء جانت واكفة تتسمع وجنت اعرف هي واكفة فخدعتها حتى تسوي الي تريده واكشفها ..
بيبي: اخخخ يا ربي شنو هالمصايب،يا ربي رحمتك
نور: بيبي عفية اهدي لا يرتفع ضغطج،الموضوع انتهى وهاهية
بيبي: لج لو صايرلج شي ما اسامح نفسي والله
نور: بيبي شهالحجيي !! هياتني واكفة كدامج ومابيا شي وبعدين الحياة بيد رب العالمين محد يعرف شوكت حيموت ! كومي بيبي وياي
كومتها هي وعمة سلمى للغرفة شوية ارتاحن طلعت من الغرفة مجان اكو احد الكل متفرق بس اني باقية من بقيت وحدي استجمعت الموقف وتذكرت كل شي والاهم تذكرت كلامه وحمايته الي،ما ادري الي دا احسه شنو بس هو غرريب،غررريب هواي ..
صعدت لغرفتي اريح دماغي من الصراخ والصياح والبجي الي صار كَبل شوية ما احس شلون اخذتني الغفوة وفزيت ساعة 8 بليل عزاا،شلون محسيت !!
كمت راسًا نزلت جوا شو محد موجود! فتحت الباب على كيفي جانوا مسترخين بيبي وعمة وخالو طلع برا هو وخالو عطالله دا ايمشي غيث
نور: دقييييقة دقيقة
غيث: يا ساتر،هاي شبييج !!! خوفتيني عبالي بيج
نور: بيك ولا بيا عيني
غيث: اي عادي عود بنت عمج تترمل شعلية انيي
نور: الف واحد يركض وراها عود انت توكل وهي تنجاز بعدين
غيث: اسكتي عااد !! شرايدة
نور: عفية اشتري عشاء جاهز من برا محد بيه حيل يسوي اكل اليوم وشفت الوضع انت
غيث: اي خوش،الطلبية مثل كل مرة مو ؟
نور: اي مثل كل مرة،دقيقة دقيقة اطلب معلاك لسيف لان ما ياكل البيتزا وهالامور
غيث: وتعرفين شيأكل هم ! يلا عمي رايحين
انتظرته شوية وتصفحت بالنت واجا،عادي صبينا الاكل وكملنا سيف دزوا عليه مقبل يجي كال مشغول حييل دا ارتب السلم الوظيفي
لميت الاكل وكل واحد رجع لمكانه،رجعت حجيت كل شي لرياام بس امنتها متكول لغيث انه كلتلها مترهم انقل سوالف اخته لخطيبته !
وقبس هم رجعت تدكك وخبصتني
سؤال انت شلون احمد متحملج الله عليج؟
لج اني نعمة بس انتوا ما تقدروها فرفوشة واضحك وووني اكو مثلي ياا
بعمرج ما راك تكبرين قبس لو يصير عندج درزن جهالل،اكول هذا مو صوت احمد دا يصيحج ؟
ايي هو
لعد روحيله يلا،وبعدين خابريني
سديته منها واني اضحك،قبسس ما فد يوم خابرتها ما ضحكتني وياها،حتى سيف كال ذاك اليوم قبس المختلة مكانها فارغ بالبيت ..بنص تفكيري اجا هو
اووه هم انت !!!! شوكت تطلع من بالي عااد !!!! كمنت وكفت على حيلي اني لازم اشكره على الشي الي سواه لو غير واحد مجام تعب نفسه حتى،بس هو صارله مدة مو قليلة هلكان وتعبان،ودتني رجلّية تلقائيًا لغُرفته،مشيت واني اتذكر جملته"اثق بيها اكثر ما اثق بأي واحد منكم"
هالجملة نحفرت بكَلبي وكَلبت مشاعري واحاسيسي وكَلبت احوالي تماماً،دكيت الباب وفتحلي هو
سيف: اكو شي؟
نور: لا ماكو شي،بس لازم اكلك شي
ابتعد من يم الباب بمعنى فوتي،بس فتت فزيت على صوت الباب انسد التفتت،تغير وضعي صرت اريد اطلع بسرعة واشرد وكف كبالي وكال
شبيج؟ شو مو طبيعية؟
عزاا هذا يقرأ افكاري !! كتله لا ماكو شي بس اني
استجمعتت قوتي ووكفت كباله بقوة وكتله يعني بس اجيت اشكرك على كل شي سويته،ادري تعبت انت حتى ينتهي هذا الموضوع ولذلك اني ممنونة الك،التفتت بسرعة اريد اطلع مصدكت شلون شكرته بسرعة دا اطلع بس لزم ايدي وقربني اله وكال
بس شُكرًا ما تكفي !
نزلت نظري وشتته لبقية ارجاء الغرفة وكتله لعد ؟
جاوبني وكال جزاتي تكون شي أثمن ..
باوعتله بتردد وخوف من قربه ومن شعوري وخوفي من شعوري بحضرة وجوده،حسيت كل شي بيا دا ينبض بقوة،كل شي بيا مو طبيعي ..مو طبيعي بقربه

البارت مُفاجئ ألكُم ولعيونكم،وشكراً على تفاعلكم
ومتعمدة نزلت البارت لان ادري تردون انتهاء ميساء
لكن للقصة استمراية ولسة مجرد البداية
اكتبولي ارائكم وتوقعاتكم بالبارت القادم
واعذروني على التقصير 🖤
______
ريام الزُبيدي