ما لم يكُن بالقلب عليم

البارت37

البارت 37

سيف: انجرحتي مو ؟ من تصرف سخيف انجرحتي
لعد اني شصار بيا وشحسيت ؟
اضوكج من المر الي ضوكتينيياه،وبعدنا بالبداية..
يحجي بنتر وبعصبية تركني وطلع واني واكفة
ببلاهة ما فهمت شقصده وشسويتله اني !!
هو اناااني وما يفكر بس بروحه،يأذي ويجرح الناس بدون ما يحس بيهم وبمشاعرهم
بقيت اغليي ويه نفسي،حتى متعشيت ذيج الليلة
فتحت موبايلي صدفة ضحى دازتلي نتيجتي مصورتها لانه اليوم نزلت واني مرحت حتى اجيبها
ولا حسيت بطعم الفرحة حتى،كل شي منزوع مني
رحت انام من ساعة 9 بليل على كد ما كَلبي
مليان جروح وهم ..
فزيت الصبح ساعة 8 على صوت الموبايل يندك بقوة
حيل بس فتحته جمددت بمُكاني ..
جان خالد !!
سديت الباب بوجههُ وركضت خليت شال غطيت شعري وركبتي ورجعت فتحت الباب بعده واكف
والابتسامة على ملامحه،استغربت ! كتله
بنبرة شديدة..محتاج شي؟
باوعلي وهو يبتسم
خالد:صباح الخير لوجهج الحلو
نور: !!!
نور: عفواً ؟ هذا الطابق طابقي شلون صعدت؟
خالد:هسة شلج بالسؤال..ومد ايده لزم ايدي
فتحت عيوني على وسعها،شنو هالجراءة !!
رفعت ايدي الثانية وضربته براجدي بكل قوتي
كمت اصيحح خاالة،سييييف،بس محد رد !!
إلى ان اضطر يترك ايدي واني ادفعه،باوع بنظرة حقيرة ..
خالد:اجيت اصيحج على الاكل،امي تصيحج !
نور:حقير !!! شلونك الك عين تباوع،لك اني مرت
ابن خالتك !!
نور:بعدني اعدل بشالي ومتوترة وبنفس الوكت
متغصبة،شلون يسويي هيجج !! سمعته كال
خالد:راح تتندمين على الراجدي !
غمز بعيونه وراح !! بقيت احجي وادردم،شلون مشكلة
طلعلي هذا،هسة اذا اكول لسيف اطلع
ادور مشاكل وهو بسالفة شهد ما صدكني،حيصدكني
بهيج شغلة !!
استغفرت ربي ونزلت جوا بس نزلت فزيت على
عياط شهد بيا بعدني منزلت
شهد: لج انت شجاببج !!!
نور:خالتي،هي الي صاحتني للريوك!
شهد:ولي منا،وخالتي متصيحج،لاتجذبين !!
نور: احترمي نفسج،الى حد الآن اني محترمتج
وما حجيت حرف يأذيج،واني مدا اجذب
روحي أسالي خالة عذباء !
عذباء: اني مصيحتج،اصلا ليش عاجبني اشوفج بهذا البيت ؟
نور:خاالة بس انتِ ..!!
عذباء: بكل عين صلفة جاية من الصبح تدورين
مشاكل وتجذبين علّية هم،ما ادري سيف منين
جابج وشلاكي عليج وراد يسترج ..
نور: احس رجلّية انشلت،وعيوني الدموع بيها
صامدة،اريد اتحرك،اريد احجي،اريد اكوللهم
اني مظلومة،بس مكدرت،الف تهمة توجهتلي
والساني انعكد،ردت ادافع عن نفسي واخذ حقي
بس احس نفسي مربطة وجني مشلولة
ظليت بمكاني بس واريد ابجي،الشي الي سمعته
حيل جبير وبعمري ما سامعته قبل ولا احد تجرأ
يحجي بهالطريقة وياي
ما ادري شلون حسيت على نفسي وباوعلتها بنظرة
كلتلها"حسبي الله ونعم الوكيل عليج" اكتفيت
بهالجُملة ودا اطلع وحسيت ايد على شعري انمدت
جنت على ثاني درجة على الدراج من الاسفل
التفتت جانت شهد،لزمت شالي ووكع ولزمت شعري
جرته حيييل لدرجة حسيت ركبتي انتهت
باثناء جرتها رجلي التوت وطكت،حسيت روحي طلعت من الوجع وهي بعدها لازمة شعري وخالة
تضحك واني لا حول ولا قوة،اني وحدة وهن
اثنين ومحاوطتني وين اروح،ووين اكدر عليهن؟
دفعتها بكل قوتي،طخت بخالة رجعت انتفضت
بكل قوتها ملكيت حل غير انه اركض بسرعتي للطابق
ركضت واني رجلي ملتوية والوجع موتني مصدكت لزمت الباب وقفلته وراساً كعدت بالكاع بمكاني
من شدة الالم،الالم الي دا احسه بداخلي
اضعاف الألم رجلي،لني مجبورة اعيش
مع ناس نماذج عرمة ومستعدة تتعارك بأي وقت
واني انسانة بسيطة ما اتذكر اخر مرة تعاركت
ويه احد،زحفت نفسي بالكوة لغرفتي ومصدكت
لزمت الفراش كعدت وتغطيت ومخدتي تشهد على
دموعي،بجييت عن كسرانه الي وعن اذيته،وعن خسارتي كباله وعن خسارتي لاهلي وعلى موقف اليوم
وكل موقف جمعني بيه وبسببه اني وضعي
اليوم هيج،بجيت من كُلّ كَلبي،ما حسيت
شوكت غفيت على رغم رجلي طلعت روحي من
الوجع،بس عيوني تعبااانة حيل
فزيت ساعة 1 الظهر واني ما ماكلة ولا متريكة
ولا حتى مسوية اي لكمة للغداء
لزمت الموبايل بقيت ادك على بيبي وعلى خالي
ومحد يرد،ادري بيهم زعلانيين مني وبنظرهم
جذابة اني
بقيت بالفراش حسيت على فتحت الباب بردة
فعل قوية لزمت شال جريته،كل الي ببالي
خالد لان الصبح هبطت،طلع سيف،هستوه راجع من
الدوام
استغربت ليش من يرجع يرجع لغرفتي راساً
وحتى اكله وشربه عندي،وصارله اسبوع تقريبا
من اجيت ينام بغرفتي على الطخم،معقولة
مدا يروح لشهد !!
فززني من تفكيري صوته وهو تعبان كال
شلونج ؟
ويهمك ؟ كتله بنبرة حادة
ما ردلي ..بس باوعلي بنظرة معرفت افسرها واخذ ملابسه وراح للحمام
اني هم غلست وبقبت بفراشي وما اريد اشوفه
حتى شكد مجنت مغثوثة منه ومحزوز خاطري
ورا شوية طلع وشفته من بعيد ينشف
شعره علساس هو شعره مينشف ههه
هو اصلا شعره سرح ما يحتاجله تشفيف
سيف:وين العلاكة الي كتلج عليها ذاك اليوم؟
بالملحق مال كنتور على اليمين
وينها؟ مدا الكاها !
انتفضت من الفراش واني معصبة لان متأكدة
هو يعرف وينها لان ذاك اليوم كدامه حطيتها
كمت بانفعاال من الفراش اني وكايمة صرخت
من الوجع،نسيت رجلي وكمت دست عليها بكل حيلي
ما حسيت الا هو لازمني من اكتافي وساندني
سيف: شصاريلج ؟؟
نور: ولاشي
التفتت اروح بس وجعتني اكثر،بالحقيقة مو شوية
هواااي وجعتي،بس تحملت وضغطت على نفسي
حتى ما اطلب مساعدته
التفتت ارجع وادوس اكثر بس حسيت عليه
لفني تجاههُ وشالني رجعني على الفراش
كعدت وكعدت كبالي على الكرسي،رفع قدمي
خلاها على رجلهُ،لمحت رجلي صاير مُكانها
ازرق ! يعني متأذية بشكلل رهيب
باوعلي بنظرة خوف وحرص وكال شوكت تأذيتي؟
بقيت صافنة عليها ما ادري شصارلي،تضاربت
مشاعري سوا ..الخوف بين حروفهُ والحرص بنظراتهُ
المُترددة حيرت كَلبي،ما ادري اني الي جنت
متشوقة لهيج لهفة شعور منهُ هو ؟
فزيت من تفكيري وكتله ما بيها شي..هسة تخف
اجيت اكوم بس كعدني وباوعلي بنظرة تحذير
وكال اكعدي،لا تتحركين،طلع خارج الغُرفة
ورجع بيده ثلج،حط بهدوء على المكان تأوهت من الوجع الفظييع
شوية وشال ايده وهمس بصوت خايف
ارتاحي ..هسة تطيّب
كام من مكانه،اني هم اعصابي انتهت كمت وياه كومته اندار بسرعة لزمت ياخة قميصه وكتله
تطيب ؟ وكَلبي شيطيبه !!
شبيج ؟ منو أذاج ؟
انتتتتَ،انتَ اذيتني وبسببك حياتي خربت
وبسببك صرت اتعرض لناس شياطيين مثلك
اي انت شيطان،دخلت لحياتي ودمرتني وتزوجتني بالجذب وبالكلاوات،وخليتني اخسر مستقبلي
واهلي وكل شخص اعرفه..بسببك صار اليسوا
والمايسوا يطخني ويأذيني،كل شي صار
بسلامتك انتتتَ
جنت احجي بلا وعي من كرهي وعصبيتي وتحملي
الي فاق حده ما ادري شحجيت بس ادري
كل الي حجيته هو مكبوت بكَلبي من زمان
منفعلة لدرجة لازمة ياخة قميصه بكل قوتي وهو
يباوعلي بالبرود الي يكتلني
ورا مخلصت صرت انهج من تعبي رجعت بهدوء
للفراش حتى اكعد وهو ما ردلي ولا اي كلمة
بس جان يباوعلي وكف كبالي وكال منو وياج؟
عاكد حواجبه وبنتر
ماكو احد
لعد هالجنون هذا خليه لنفسج !! ديري بالج تعيديها !!
هددني وطلع بسرعة من الغُرفة
بقيت احرك بروحي منا رجلي ومنا هذا
مر الوكت بسرعة واني محبوسة بين اربع حيطان
اكلت اي شي بالمطبخ مالي خلك اطبخ ابد
صارت ساعة 11 بليل طفيت الموبايل واجيت انام
لمحته جاي للغرفة
فات ومبين عليه ضاايج شال مخدته بقوة وطبها
على الطخم واني هم غطيت راسي علساس
انان وجنت اشوفه شلون يتكَلب يمين ويسار
وابد ما مرتاح
استبعدته من تفكيري ونمت ..